ଭାରତୀୟ କ୍ରିକେଟର ଉଦୀୟମାନ ତାରକା ବୈଭବ ସୂର୍ଯ୍ୟବଂଶୀଙ୍କ ସିନିୟର ଟିମ୍ରେ ଡେବ୍ୟୁ ଆଶାଅନୁଯାୟୀ ହୋଇପାରିନାହିଁ। ମଙ୍ଗଳବାର ଶ୍ରୀଲଙ୍କାର ରଣଗିରି ଡାମ୍ବୁଲା ଷ୍ଟାଡିୟମରେ ଆରମ୍ଭ ହୋଇଥିବା ଶ୍ରୀଲଙ୍କା ‘ଏ’ ବିପକ୍ଷ ୱାନଡେ ସିରିଜ୍ର ପ୍ରଥମ ମ୍ୟାଚ୍ରେ ସେ କେବଳ ୧୪ ରନ୍ ସଂଗ୍ରହ କରି ପାଭିଲିୟନ୍ ଫେରିଛନ୍ତି।

ପ୍ରଭସିମ୍ରନ ସିଂହଙ୍କ ସହ ଓପନିଂ କରିଥିବା ବୈଭବ ଆରମ୍ଭରୁ କିଛି ଆକର୍ଷଣୀୟ ସଟ୍ ଖେଳିଥିଲେ। କିନ୍ତୁ ଦଳର ସ୍କୋର ୧୬ ରନ୍ ଥିବାବେଳେ ଚତୁର୍ଥ ଓଭରରେ ବଡ଼ ସଟ୍ ଖେଳିବାକୁ ଯାଇ ସେ ନିଜ ୱିକେଟ୍ ହରାଇଥିଲେ। ବଲ୍ ବ୍ୟାଟ୍ର ଧାର ଛୁଇଁ ମିଡ୍-ଅଫ୍ରେ କ୍ୟାଚ୍ ହୋଇଥିବାରୁ ତାଙ୍କ ଇନିଂସ୍ର ଶେଷ ଘଟିଥିଲା।

ବୈଭବଙ୍କ ଆଉଟ୍ ପରେ ପରବର୍ତ୍ତୀ ବଲ୍ରେ ପ୍ରଭସିମ୍ରନ ସିଂହ ମଧ୍ୟ ପାଭିଲିୟନ୍ ଫେରିଯାଇଥିଲେ। ଫଳରେ ଭାରତ ‘ଏ’ ଦଳ ଆରମ୍ଭରୁ ଦୁଇଟି ଗୁରୁତ୍ୱପୂର୍ଣ୍ଣ ୱିକେଟ୍ ହରାଇ ଚାପରେ ପଡ଼ିଥିଲା। ପରେ ପ୍ରିୟାଂଶ ଆର୍ଯ୍ୟ ୩୨ ରନ୍ କରି ରନ୍ଆଉଟ୍ ହେବାରୁ ସ୍କୋର ୬୯/୩ରେ ପହଞ୍ଚିଥିଲା।

ଏହି ସମୟରେ ଅଧିନାୟକ ଋତୁରାଜ ଗାଏକ୍ବାଡ୍ ଓ ତିଳକ ବର୍ମା ଦାୟିତ୍ୱପୂର୍ଣ୍ଣ ବ୍ୟାଟିଂ କରି ଦଳକୁ ସଙ୍କଟରୁ ଉଦ୍ଧାର କରିଥିଲେ। ଉଭୟ ଶତକୀୟ ଭାଗୀଦାରୀ ଗଢ଼ି ଇନିଂସ୍କୁ ସ୍ଥିରତା ପ୍ରଦାନ କରିଥିଲେ। ଶେଷ ଖବର ସୁଦ୍ଧା ଭାରତ ‘ଏ’ ୩୮ ଓଭରରେ ୩ ୱିକେଟ୍ ହରାଇ ୧୭୯ ରନ୍ ସଂଗ୍ରହ କରିଥିଲା। ଋତୁରାଜ ୮୩ ରନ୍ ଏବଂ ତିଳକ ବର୍ମା ୪୦ ରନ୍ କରି ଅପରାଜିତ ରହିଥିଲେ।

ଯଦିଓ ବୈଭବଙ୍କ ଡେବ୍ୟୁ ନିରାଶାଜନକ ରହିଛି, ତଥାପି ତାଙ୍କ ପ୍ରତିଭା ଓ ସାମର୍ଥ୍ୟକୁ ଦେଖି ଆଗାମୀ ମ୍ୟାଚ୍ଗୁଡ଼ିକରେ ଭଲ ପ୍ରଦର୍ଶନ କରିବେ ବୋଲି କ୍ରିକେଟ୍ ପ୍ରେମୀମାନେ ଆଶା ରଖିଛନ୍ତି।