ଉତ୍ତରପ୍ରଦେଶରେ ସୋମବାର ସନ୍ଧ୍ୟାରେ ଘଟିଥିବା ଦୁଇଟି ପୃଥକ ସଡ଼କ ଦୁର୍ଘଟଣାରେ ମୋଟ ୯ ଜଣଙ୍କର ପ୍ରାଣହାନି ଘଟିଥିବାବେଳେ ୨୨ ଜଣ ଆହତ ହୋଇଛନ୍ତି। ଉଭୟ ଘଟଣା ପରେ ସ୍ଥାନୀୟ ପ୍ରଶାସନ, ପୋଲିସ ଓ ଉଦ୍ଧାରକାରୀ ଟିମ୍ ତୁରନ୍ତ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଚଳାଇଥିଲେ।

ପ୍ରଥମ ଦୁର୍ଘଟଣା ମଥୁରା ଜିଲ୍ଲାର ଯମୁନା ଏକ୍ସପ୍ରେସୱେର ରାୟା ଥାନା ଅଞ୍ଚଳର ୧୧୨ ନମ୍ବର ମାଇଲଷ୍ଟୋନ୍ ନିକଟରେ ଘଟିଥିଲା। ଲକ୍ଷ୍ନୌରୁ ନୋଏଡା ଅଭିମୁଖେ ଯାଉଥିବା ପ୍ରାୟ ୬୫ ଜଣ ଯାତ୍ରୀବାହୀ ଏକ ଡବଲ୍-ଡେକର ସ୍ଲିପର ବସ୍ ଆଗରେ ଯାଉଥିବା ଏକ ଟ୍ରେଲରକୁ ପଛପଟୁ ଧକ୍କା ଦେଇଥିଲା। ଏହି ଦୁର୍ଘଟଣାରେ ୪ ଜଣଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିବାବେଳେ ୧୯ ଜଣ ଆହତ ହୋଇଛନ୍ତି। ଆହତମାନଙ୍କୁ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି।

ଦ୍ୱିତୀୟ ଦୁର୍ଘଟଣା ଫିରୋଜାବାଦ ଜିଲ୍ଲାରେ ଘଟିଥିଲା। ପ୍ରବଳ ଝଡ଼ ଓ ପବନ ପ୍ରଭାବରେ ରାସ୍ତା କଡ଼ରେ ଥିବା ଏକ ବିଶାଳ ନିମ୍ବ ଗଛ ଉପୁଡ଼ି ଏକ ଚଳନ୍ତା ଇ-ରିକ୍ସା ଉପରେ ପଡ଼ିଯାଇଥିଲା। ଏହି ଘଟଣାରେ ୫ ଜଣଙ୍କର ମୃତ୍ୟୁ ଘଟିଥିବାବେଳେ ୩ ଜଣ ଗୁରୁତର ଆହତ ହୋଇଛନ୍ତି।

ଜିଲ୍ଲା ମାଜିଷ୍ଟ୍ରେଟ୍ ସନ୍ତୋଷ କୁମାର ଶର୍ମାଙ୍କ ସୂଚନା ଅନୁସାରେ, ଇ-ରିକ୍ସାଟି ଏତା ଜିଲ୍ଲାର ଆୱାଗଡ଼ରୁ ଫରିହା ଅଭିମୁଖେ ଯାଉଥିବା ବେଳେ ହଠାତ୍ ଗଛଟି ଉପୁଡ଼ି ପଡ଼ିଥିଲା। ଇ-ରିକ୍ସାରେ ଥିବା ୮ ଜଣ ଯାତ୍ରୀ ଗଛ ତଳେ ଫସି ଯାଇଥିଲେ।

ପୋଲିସ, ଅଗ୍ନିଶମ ବାହିନୀ ଓ ସ୍ଥାନୀୟ ଲୋକମାନେ ଜେସିବି ମେସିନ ସାହାଯ୍ୟରେ ଗଛକୁ ହଟାଇ ଯାତ୍ରୀମାନଙ୍କୁ ଉଦ୍ଧାର କରିଥିଲେ। ତେବେ ହସ୍ପିଟାଲରେ ପହଞ୍ଚିବା ପୂର୍ବରୁ ୫ ଜଣଙ୍କର ମୃତ୍ୟୁ ଘଟିଥିଲା। ମୃତକମାନେ ହେଲେ ଗଜେନ୍ଦ୍ର (୨୮), ହରେଶ ପାଲ୍ (୫୯), ବିଷ୍ଣୁ (୨୦), ଅମନ (୧୭) ଏବଂ ଗଙ୍ଗା ସିଂହ (୬୫)।

ପୋଲିସ ମୃତଦେହଗୁଡ଼ିକୁ ବ୍ୟବଚ୍ଛେଦ ପାଇଁ ପଠାଇଥିବା ବେଳେ ଉଭୟ ଘଟଣାର କାରଣ ନେଇ ତଦନ୍ତ ଆରମ୍ଭ କରିଛି।