ଉତ୍ତରପ୍ରଦେଶରେ ଛାତ୍ରଛାତ୍ରୀଙ୍କ ଶିକ୍ଷାକୁ ଆର୍ଥିକ ସହାୟତା ଯୋଗାଇବା ଦିଗରେ ରାଜ୍ୟ ସରକାର ଏକ ବଡ଼ ପଦକ୍ଷେପ ନେଇଛନ୍ତି। ଲକ୍ଷ୍ନୌରେ ଆୟୋଜିତ ଏକ କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ୪.୬୦ ଲକ୍ଷରୁ ଅଧିକ ଛାତ୍ରଛାତ୍ରୀଙ୍କୁ ୧୪୮ କୋଟିରୁ ଅଧିକ ଟଙ୍କାର ଛାତ୍ରବୃତ୍ତି ଓ ଫିସ୍‌ ରିଇମ୍ବର୍ସମେଣ୍ଟ ହସ୍ତାନ୍ତର କରିଛନ୍ତି। ଏହି ଅର୍ଥରାଶି ସିଧାସଳଖ ଛାତ୍ରଛାତ୍ରୀଙ୍କ ବ୍ୟାଙ୍କ ଖାତାକୁ ପଠାଯାଇଛି। 

କାର୍ଯ୍ୟକ୍ରମରେ ଯୋଗୀ ଆଦିତ୍ୟନାଥ କହିଛନ୍ତି ଯେ ଆର୍ଥିକ ଅଭାବ ଯୋଗୁଁ କୌଣସି ପିଲାର ପାଠପଢ଼ା ବନ୍ଦ ହେବା ଉଚିତ୍ ନୁହେଁ। ପ୍ରତ୍ୟେକ ଯୋଗ୍ୟ ଛାତ୍ରଛାତ୍ରୀଙ୍କ ନିକଟରେ ଛାତ୍ରବୃତ୍ତି ପହଞ୍ଚାଇବା ସରକାରଙ୍କ ଲକ୍ଷ୍ୟ ବୋଲି ସେ କହିଛନ୍ତି।

ସେହିପରି ବର୍ତ୍ତମାନର ୪.୬୦ ଲକ୍ଷ ଛାତ୍ରଛାତ୍ରୀଙ୍କ ଠାରୁ ଛାତ୍ରବୃତ୍ତିର ପରିସରକୁ ଭବିଷ୍ୟତରେ ୭୦ ଲକ୍ଷ ଛାତ୍ରଛାତ୍ରୀ ପର୍ଯ୍ୟନ୍ତ ବଢ଼ାଇବାକୁ ସରକାର ଲକ୍ଷ୍ୟ ରଖିଥିବା ସେ ଘୋଷଣା କରିଛନ୍ତି। ସମାଜ କଲ୍ୟାଣ, ପଛୁଆ ବର୍ଗ କଲ୍ୟାଣ ଓ ସଂଖ୍ୟାଲଘୁ କଲ୍ୟାଣ ବିଭାଗକୁ ଯୋଗ୍ୟ ଛାତ୍ରଛାତ୍ରୀଙ୍କ ଖାତାରେ ପ୍ରତିମାସ ଟଙ୍କା ପହଞ୍ଚାଇବା ନିଶ୍ଚିତ କରିବାକୁ ମଧ୍ୟ ନିର୍ଦ୍ଦେଶ ଦିଆଯାଇଛି। 

ଯୋଗୀ ଆଦିତ୍ୟନାଥ ଛାତ୍ରବୃତ୍ତି ବଣ୍ଟନରେ ଡିଜିଟାଲ୍‌ ବ୍ୟବସ୍ଥାର ଭୂମିକା ଉପରେ ମଧ୍ୟ ଜୋର ଦେଇଛନ୍ତି। ପୂର୍ବତନ ସମାଜବାଦୀ ପାର୍ଟି ସରକାର ସମୟର ଛାତ୍ରବୃତ୍ତି ବ୍ୟବସ୍ଥାକୁ ନେଇ ସେ କିଛି ଅଭିଯୋଗ ମଧ୍ୟ କରିଛନ୍ତି। ତାଙ୍କ ଦାବି ଅନୁସାରେ, ପୂର୍ବରୁ ପ୍ରତି ୧୦୦ ଜଣଙ୍କ ମଧ୍ୟରୁ କେବଳ ୬୦ରୁ ୭୦ ଜଣ ଛାତ୍ରଛାତ୍ରୀ ଛାତ୍ରବୃତ୍ତିର ଲାଭ ପାଉଥିଲେ। ଏହି ଦାବିକୁ ଯୋଗୀଙ୍କ ରାଜନୈତିକ ଅଭିଯୋଗ ଭାବେ ଦେଖାଯିବା ଉଚିତ।

ସରକାରଙ୍କ ଦିଆଯାଇଥିବା ଆକଳନ ଅନୁସାରେ, ଗତବର୍ଷ ଅନୁସୂଚିତ ଜାତି ଓ ଜନଜାତିର ୨୬.୨୬ ଲକ୍ଷ ଛାତ୍ରଛାତ୍ରୀଙ୍କ ପାଇଁ ୨,୭୫୦ କୋଟି ଟଙ୍କା, ସଂଖ୍ୟାଲଘୁ ବର୍ଗର ୫.୮୯ ଲକ୍ଷ ଛାତ୍ରଛାତ୍ରୀଙ୍କ ପାଇଁ ୩୬୦ କୋଟି ଟଙ୍କା ଏବଂ ପଛୁଆ ବର୍ଗର ୩୭ ଲକ୍ଷ ଛାତ୍ରଛାତ୍ରୀଙ୍କ ପାଇଁ ୩,୦୭୨ କୋଟି ଟଙ୍କା ଦିଆଯାଇଥିଲା। 

କେବଳ ଛାତ୍ରବୃତ୍ତି ନୁହେଁ, ସରକାରୀ ସ୍କୁଲର ଭିତ୍ତିଭୂମି ଉନ୍ନତି, ଶୌଚାଳୟ, ପାନୀୟ ଜଳ, ଫର୍ନିଚର, ୟୁନିଫର୍ମ, ବହି, ବ୍ୟାଗ୍‌, ସ୍ୱେଟର ଓ ଜୋତା ଭଳି ସୁବିଧା ଯୋଗାଇ ଦିଆଯାଉଥିବା ନେଇ ମଧ୍ୟ ମୁଖ୍ୟମନ୍ତ୍ରୀ ସୂଚନା ଦେଇଛନ୍ତି। JEE ଓ NEET ପାଇଁ ମୁଖ୍ୟମନ୍ତ୍ରୀ ଅଭ୍ୟୁଦୟ କୋଚିଂ ମାଧ୍ୟମରେ ଛାତ୍ରଛାତ୍ରୀଙ୍କୁ ରାଜ୍ୟ ଭିତରେ ପ୍ରସ୍ତୁତି ସୁବିଧା ମିଳୁଥିବା କଥା ମଧ୍ୟ ସେ କହିଛନ୍ତି।

ଏହା ସହିତ ଆସନ୍ତା ମାସରେ ୫୦ ହଜାର ମେଧାବୀ ଛାତ୍ରୀଙ୍କୁ ସ୍କୁଟର ଦିଆଯିବ ବୋଲି ଯୋଗୀ ଆଦିତ୍ୟନାଥ ଘୋଷଣା କରିଛନ୍ତି। ଛାତ୍ରଛାତ୍ରୀଙ୍କ ପାଇଁ ଅର୍ଥର ଅଭାବ ନାହିଁ ବୋଲି ସେ ଦୋହରାଇଛନ୍ତି।