ସରକାରୀ ସ୍କୁଲ୍ରେ ଶିକ୍ଷାର ମାନ ଓ ମୌଳିକ ସୁବିଧାକୁ ନେଇ ପୁଣି ଉଠିଛି ପ୍ରଶ୍ନ। ସ୍କୁଲ୍ର ଛାତ ଫାଟିଛି, ଶୌଚାଳୟ ଅପରିଷ୍କାର, ପିଇବା ପାଣିର ଅଭାବ ଏବଂ କମ୍ପ୍ୟୁଟର ଅଚଳ। ଏଭଳି ଅନେକ ସମସ୍ୟାର ଚିତ୍ର ସାମ୍ନାକୁ ଆଣିଛି କକରୋଚ୍ ଜନତା ପାର୍ଟି (CJP)।
ପ୍ରେସ୍ ଟ୍ରଷ୍ଟ ଅଫ୍ ଇଣ୍ଡିଆ (PTI)ର ରିପୋର୍ଟ ଅନୁଯାୟୀ, CJP ପକ୍ଷରୁ ପଶ୍ଚିମ ଉତ୍ତରପ୍ରଦେଶର ୪ଟି ଜିଲ୍ଲାର ୨୦ଟି ସରକାରୀ ସ୍କୁଲ୍ରେ ସାମାଜିକ ଅଡିଟ୍ କରାଯାଇଥିଲା। ଏହି ଯାଞ୍ଚରେ ସ୍କୁଲ୍ଗୁଡ଼ିକର ମୌଳିକ ଭିତ୍ତିଭୂମି, ପରିମଳ ବ୍ୟବସ୍ଥା, ଶିକ୍ଷକଙ୍କ ଉପଲବ୍ଧତା, ସୁରକ୍ଷା ଓ ଶିକ୍ଷାଦାନ ସମ୍ପର୍କିତ ବିଭିନ୍ନ ସମସ୍ୟା ପଦାକୁ ଆସିଛି।
CJPର 'School Thik Karo' ଅଭିଯାନ ଅଧୀନରେ ହାପୁର, ମେରଠ, ସାହାରନପୁର ଓ ପିଲିଭିତ୍ ଜିଲ୍ଲାର ୨୦ଟି ସରକାରୀ ସ୍କୁଲ୍ରେ ଯାଞ୍ଚ କରାଯାଇଥିଲା।
ଏହି ଯାଞ୍ଚରେ ପିଇବା ପାଣି, ଶୌଚାଳୟ, ଦିବ୍ୟାଙ୍ଗଙ୍କ ପାଇଁ ସୁବିଧା, ଶିକ୍ଷକଙ୍କ ଉପସ୍ଥିତି, ସରକାରୀ ଯୋଜନାର ଲାଭ, ମଧ୍ୟାହ୍ନ ଭୋଜନ ଓ ପିଲାଙ୍କ ସୁରକ୍ଷା ଆଦି ବିଷୟକୁ ଗୁରୁତ୍ୱ ଦିଆଯାଇଥିଲା।
CJPର ସହ-ସଂଯୋଜକ ସୌରଭ ଦାସ ହାପୁରରେ ଏକ ଟିମ୍ର ନେତୃତ୍ୱ ନେଇଥିବା ବେଳେ ଦଳର ଅନ୍ୟ ସଦସ୍ୟମାନେ ମେରଠ, ସାହାରନପୁର ଓ ପିଲିଭିତ୍ରେ ଯାଞ୍ଚ କରିଥିଲେ।
ସାମାଜିକ ଅଡିଟ୍ରେ ସବୁଠାରୁ ଚିନ୍ତାଜନକ ତଥ୍ୟ ହେଉଛି ପିଇବା ପାଣି ଓ ପରିମଳ ବ୍ୟବସ୍ଥା। ଯାଞ୍ଚ ହୋଇଥିବା ୯ଟି ସ୍କୁଲ୍ ମଧ୍ୟରୁ ୬ଟିରେ ସୁରକ୍ଷିତ ପିଇବା ପାଣିର ବ୍ୟବସ୍ଥା ନଥିବା ଜଣାପଡ଼ିଛି।
ସେହିପରି ଅତିକମ୍ରେ ୧୦ଟି ସ୍କୁଲ୍ରେ ଶୌଚାଳୟ ଅଚଳ କିମ୍ବା ଠିକ୍ ଭାବେ ରକ୍ଷଣାବେକ୍ଷଣ ହେଉନଥିବା ଦେଖାଯାଇଛି। ୭ଟି ସ୍କୁଲ୍ରେ ଦିବ୍ୟାଙ୍ଗ ପିଲାଙ୍କ ପାଇଁ ରାମ୍ପ୍ ଓ ସୁଗମ ଶୌଚାଳୟ ଭଳି ସୁବିଧା ନାହିଁ।
ଆଧୁନିକ ଶିକ୍ଷା ବ୍ୟବସ୍ଥାରେ କମ୍ପ୍ୟୁଟର ଶିକ୍ଷାର ଗୁରୁତ୍ୱ ବଢ଼ୁଥିବା ବେଳେ ଅଡିଟ୍ରେ ଆହୁରି ଏକ ଚିନ୍ତାଜନକ ତଥ୍ୟ ସାମ୍ନାକୁ ଆସିଛି।
୧୨ଟି ସ୍କୁଲ୍ରେ କାର୍ଯ୍ୟକ୍ଷମ କମ୍ପ୍ୟୁଟର ନାହିଁ।
୮ଟି ସ୍କୁଲ୍ରେ କାର୍ଯ୍ୟକ୍ଷମ ଲାଇବ୍ରେରୀ ନାହିଁ।
୧୦ଟି ସ୍କୁଲ୍ରେ ଖେଳପଡ଼ିଆ କିମ୍ବା ସୁରକ୍ଷା ପାଚେରିର ଅଭାବ ରହିଛି।
ଏଥିସହ କେତେକ ସ୍କୁଲ୍ରେ ଫାଟିଥିବା ଛାତ, ଅସୁରକ୍ଷିତ ପ୍ରବେଶ ଦ୍ୱାର ଓ ସୁରକ୍ଷା ବ୍ୟବସ୍ଥାର ଅଭାବ ମଧ୍ୟ ଚିହ୍ନଟ ହୋଇଛି।
ଅଡିଟ୍ ସମୟରେ ଏକ ସ୍କୁଲ୍ରେ ଶ୍ରେଣୀଗୃହ ଅଭାବ ଯୋଗୁଁ ପିଲାମାନେ ବାରଣ୍ଡାରେ ବସି ପାଠ ପଢ଼ୁଥିବା ଜଣାପଡ଼ିଛି।
ହାପୁରର ଗୋଟିଏ ସ୍କୁଲ୍ରେ ୧୭୬ ଜଣ ଛାତ୍ରଛାତ୍ରୀ ପଢ଼ୁଥିବା ବେଳେ ସେଠାରେ ଅସୁରକ୍ଷିତ କୋଠା, ଅଚଳ ଶୌଚାଳୟ, ପିଇବା ପାଣିର ଅଭାବ ଓ ଆବଶ୍ୟକ ସହାୟକ କର୍ମଚାରୀଙ୍କ ଅଭାବ ଥିବା ଟିମ୍ ରିପୋର୍ଟ କରିଛି।
ଅନ୍ୟ ଏକ ସ୍କୁଲ୍ରେ ନିୟମିତ ସଫେଇ କର୍ମଚାରୀ ନଥିବାରୁ ସପ୍ତାହକୁ ମାତ୍ର ଥରେ ସଫେଇ କରାଯାଉଥିବା ଜଣାପଡ଼ିଛି।
ସାହାରନପୁରର ଫତେହପୁର ଜାଟ୍ ଅଞ୍ଚଳରେ ଥିବା ସ୍କୁଲ୍ରେ ମଧ୍ୟ ପିଇବା ପାଣି, ପରିଷ୍କାର ଶୌଚାଳୟ, କମ୍ପ୍ୟୁଟର ଓ ଲାଇବ୍ରେରୀର ଅଭାବ ଦେଖିବାକୁ ମିଳିଛି। ପିଲିଭିତ୍ରେ ଯାଞ୍ଚ ହୋଇଥିବା ସ୍କୁଲ୍ଗୁଡ଼ିକରେ ମଧ୍ୟ ପାଣି, ଶୌଚାଳୟ ଓ ଖେଳପଡ଼ିଆ ସୁବିଧାକୁ ନେଇ ସମସ୍ୟା ଚିହ୍ନଟ ହୋଇଛି।
ଯାଞ୍ଚ ସମୟରେ ୩ଟି ସ୍କୁଲ୍ରେ ଛାତ୍ରଛାତ୍ରୀଙ୍କ ଉପସ୍ଥାନ ୮୦ ପ୍ରତିଶତରୁ କମ୍ ଥିବା ମଧ୍ୟ ଜଣାପଡ଼ିଛି।
ତେବେ କେତେକ ସ୍କୁଲ୍ରେ ପାଠ୍ୟପୁସ୍ତକ ଓ ୟୁନିଫର୍ମ ଠିକ୍ ସମୟରେ ବଣ୍ଟନ ହେଉଥିବା ସହ ମଧ୍ୟାହ୍ନ ଭୋଜନ ନିୟମିତ ଦିଆଯାଉଥିବା ଅଡିଟ୍ରେ ଉଲ୍ଲେଖ ରହିଛି। କିନ୍ତୁ ଏହି ସୁବିଧାଗୁଡ଼ିକ ଥିଲେ ମଧ୍ୟ ସ୍କୁଲ୍ର ମୌଳିକ ଭିତ୍ତିଭୂମି ସମସ୍ୟା ଦୂର ହୋଇନାହିଁ ବୋଲି CJP କହିଛି।
ଏହି ସମସ୍ୟାଗୁଡ଼ିକର ତୁରନ୍ତ ସମାଧାନ ପାଇଁ CJP ପକ୍ଷରୁ ହାପୁରର ମୌଳିକ ଶିକ୍ଷା ଅଧିକାରୀଙ୍କୁ ଏକ ଦାବିପତ୍ର ଦିଆଯାଇଛି।
ଏଥିରେ ପିଇବା ପାଣି ଓ ଶୌଚାଳୟ ବ୍ୟବସ୍ଥା ସୁଧାରିବା, ଅସୁରକ୍ଷିତ କୋଠାର ମରାମତି, ପର୍ଯ୍ୟାପ୍ତ ଶିକ୍ଷକ ଓ ସହାୟକ କର୍ମଚାରୀ ନିଯୁକ୍ତି ଏବଂ ଶିକ୍ଷା ସମ୍ପର୍କିତ ସୁବିଧା ବଢ଼ାଇବାକୁ ଦାବି କରାଯାଇଛି।
CJP କହିଛି ଯେ, ଏହି ଅଭିଯାନ ଶିକ୍ଷକ କିମ୍ବା ସ୍କୁଲ୍ କର୍ମଚାରୀଙ୍କୁ ଟାର୍ଗେଟ୍ କରିବା ପାଇଁ ନୁହେଁ। ବରଂ ସରକାରୀ ସ୍କୁଲ୍ଗୁଡ଼ିକୁ ଆବଶ୍ୟକ ଭିତ୍ତିଭୂମି ଓ ସୁବିଧା ଯୋଗାଇଦେବା ପାଇଁ ସରକାରଙ୍କୁ ଉତ୍ତରଦାୟୀ କରିବା ଏହାର ମୁଖ୍ୟ ଉଦ୍ଦେଶ୍ୟ।
କଲେଜ୍ ଜୀବନର ବନ୍ଧୁତା, ପ୍ରେମ, ମଜାମସ୍ତି ଓ ଛାତ୍ର ରାଜନୀ...
ଭାରତୀୟ ଅର୍ଥନୀତିକୁ ‘ମୃତ’ ବୋଲି କହିବା ସହ...
ମୁମ୍ବାଇ: ଭାରତୀୟ ମନୋରଞ୍ଜନ ଜଗତ ପାଇଁ ଆସିଛି ଏକ ବଡ଼ ଖୁସ...
ନୂଆ ଟ୍ରେନ୍‌ରେ ଯାତ୍ରା କରିବାର ଉତ୍ସାହ ଅଲଗା। ବିଶେ...
ପେଟର ଚର୍ବି କମାଇବାକୁ ତ୍ରିଗୁଣ କାଢ଼ା! ଜିରା-ଜୁଆଣି ସହ ୫...
ଦାମୀ ଫେସିଆଲ୍ ନୁହେଁ, ଘରେ ତିଆରି କରନ୍ତୁ ଏହି ଜୁସ୍! ଗାଜ...
ଭାରତୀୟ ସିନେମାର ଭବ୍ୟତାକୁ ନେଇ ଏବେ ଚର୍ଚ୍ଚାରେ ରହିଛି ଫି...
ତୁର୍କୀର ଆଣ୍ଟାଲ୍ୟାରେ ଆୟୋଜିତ ଜାତିସଂଘ ଜଳବାୟୁ ସମ୍ମିଳନୀ...