ରୁଷ-ୟୁକ୍ରେନ ଯୁଦ୍ଧ ମଧ୍ୟରେ ୟୁକ୍ରେନ ପୁଣିଥରେ ରୁଷ ଉପରେ ବଡ଼ ଧରଣର ଡ୍ରୋନ୍ ଆକ୍ରମଣ କରିଛି। ରାତିସାରା ଚାଲିଥିବା ଏହି ଆକ୍ରମଣରେ ରୁଷର ଦ୍ୱିତୀୟ ବୃହତ୍ ସହର ସେଣ୍ଟ ପିଟର୍ସବର୍ଗର ତୈଳ ଟର୍ମିନାଲ୍ ଏବଂ ଲେନିନଗ୍ରାଡ୍ ଅଞ୍ଚଳର ଭିସୋତ୍ସ୍କ ବନ୍ଦରକୁ ଲକ୍ଷ୍ୟ କରାଯାଇଛି।

ସେଣ୍ଟ ପିଟର୍ସବର୍ଗର ଗଭର୍ଣ୍ଣର ଆଲେକ୍ସାଣ୍ଡର ବେଗଲୋଭ କହିଛନ୍ତି, ସହର ଉପରେ ବଡ଼ ଧରଣର ଡ୍ରୋନ୍ ଆକ୍ରମଣ ହୋଇଥିଲା। ତୈଳ ଟର୍ମିନାଲ୍ କ୍ଷତିଗ୍ରସ୍ତ ହୋଇଥିଲେ ମଧ୍ୟ କୌଣସି ମୃତାହତ ଘଟିନାହିଁ ଏବଂ ପରିସ୍ଥିତିକୁ ନିୟନ୍ତ୍ରଣକୁ ଅଣାଯାଇଛି।

ଲେନିନଗ୍ରାଡ୍ ଅଞ୍ଚଳର ଗଭର୍ଣ୍ଣର ଆଲେକ୍ସାଣ୍ଡର ଦ୍ରୋଜଦେଙ୍କୋ କହିଛନ୍ତି, ଫିନଲ୍ୟାଣ୍ଡ ଉପସାଗର କୂଳରେ ଥିବା ଭିସୋତ୍ସ୍କ ବନ୍ଦରକୁ ମଧ୍ୟ ଡ୍ରୋନ୍ ଆକ୍ରମଣ କରାଯାଇଛି। ଏହି ବନ୍ଦର ମାଧ୍ୟମରେ ତୈଳ, ଶସ୍ୟ, କୋଇଲା ଓ ତରଳ ପ୍ରାକୃତିକ ଗ୍ୟାସ ପରିବହନ କରାଯାଏ।

ରୁଷ ପ୍ରଶାସନର ଦାବି ଅନୁସାରେ, ଲେନିନଗ୍ରାଡ୍ ଅଞ୍ଚଳରେ ୭୨ଟି ଡ୍ରୋନ୍ ଭୂପାତିତ କରାଯାଇଛି। ସେହିପରି ପସ୍କୋଭ ଅଞ୍ଚଳରେ ମଧ୍ୟ ୩୦ରୁ ଅଧିକ ଡ୍ରୋନ୍ ଧ୍ୱଂସ କରାଯାଇଥିବା ବେଳେ ଏକ କାରଖାନା ସମେତ କିଛି ସ୍ଥାନରେ ସାମାନ୍ୟ କ୍ଷୟକ୍ଷତି ଓ କିଛି ଲୋକ ଆହତ ହୋଇଥିବା ସୂଚନା ମିଳିଛି।

ଚଳିତ ବର୍ଷ ୟୁକ୍ରେନ ରୁଷର ତୈଳ ଓ ଶକ୍ତି ଭିତ୍ତିଭୂମି ଉପରେ ଆକ୍ରମଣ ବଢ଼ାଇଛି। ଏହା ଫଳରେ ରୁଷର କିଛି ଅଞ୍ଚଳରେ ଇନ୍ଧନ ଯୋଗାଣ ମଧ୍ୟ ପ୍ରଭାବିତ ହୋଇଛି।

ଉଲ୍ଲେଖଯୋଗ୍ୟ, ୟୁକ୍ରେନ ସୀମାଠାରୁ ପ୍ରାୟ ୯୦୦ କିଲୋମିଟର ଦୂରରେ ଅବସ୍ଥିତ ସେଣ୍ଟ ପିଟର୍ସବର୍ଗ ଉପରେ ପୂର୍ବରୁ ମଧ୍ୟ ୟୁକ୍ରେନ ଡ୍ରୋନ୍ ଆକ୍ରମଣ କରିଥିଲା। ତୈଳ ଟର୍ମିନାଲ୍ ଓ ଯୁଦ୍ଧ ଜାହାଜ ମଧ୍ୟ ପୂର୍ବରୁ ଏହାର ଲକ୍ଷ୍ୟ ହୋଇଥିଲା।