ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଏକ ନୂଆ ବୟାନକୁ ନେଇ ରୁଷ-ୟୁକ୍ରେନ ଯୁଦ୍ଧ ଏବଂ ଆମେରିକାର ବୈଦେଶିକ ନୀତିକୁ ନେଇ ଚର୍ଚ୍ଚା ତୀବ୍ର ହୋଇଛି। ଆମେରିକାରେ ହେବାକୁ ଥିବା G20 ବୈଠକରେ ପୁଟିନ ଯୋଗଦେଲେ ତାଙ୍କୁ ସ୍ୱାଗତ କରିବେ ବୋଲି ଟ୍ରମ୍ପ କହିଛନ୍ତି। ତେବେ ପୁଟିନ ନିଜେ ଯୋଗଦେବେ କି ରୁଷ ପକ୍ଷରୁ ଅନ୍ୟ କୌଣସି ପ୍ରତିନିଧି ଯୋଗଦେବେ, ତାହା ଏପର୍ଯ୍ୟନ୍ତ ସ୍ପଷ୍ଟ ନୁହେଁ।

୨୦୨୬ରେ G20ର ଅଧ୍ୟକ୍ଷତା ଆମେରିକା କରୁଛି। ଅକ୍ଟୋବର ୩୦-୩୧ରେ ଜର୍ଜିଆର ଆଟଲାଣ୍ଟାରେ G20 ବିଦେଶ ମନ୍ତ୍ରୀମାନଙ୍କ ବୈଠକ ଏବଂ ଡିସେମ୍ବର ୧୪-୧୫ରେ ଫ୍ଲୋରିଡାର ମିଆମିରେ G20 ନେତାମାନଙ୍କ ଶିଖର ସମ୍ମିଳନୀ ହେବାକୁ ଥିବା ସୂଚନା ମିଳିଛି। ରୁଷ ଓ ଭାରତ ଉଭୟ G20ର ସଦସ୍ୟ ଦେଶ।

ୟୁକ୍ରେନ ଯୁଦ୍ଧ ସମ୍ପର୍କରେ ସାମ୍ବାଦିକମାନେ ପଚାରିବାରୁ ଟ୍ରମ୍ପ କହିଛନ୍ତି ଯେ ଯୁଦ୍ଧ ଆରମ୍ଭ ସମ୍ପର୍କରେ ସେ ସବୁ ତଥ୍ୟ ଜାଣନ୍ତି ଏବଂ ତାଙ୍କର ମୁଖ୍ୟ ଲକ୍ଷ୍ୟ ହେଉଛି ଯୁଦ୍ଧକୁ ଶେଷ କରିବା। ଏହା ସହିତ ରୁଷ ଓ ଚୀନ୍ ସହ ପରମାଣୁ ଅସ୍ତ୍ର ସମ୍ପର୍କିତ ଚୁକ୍ତି କରିବାକୁ ଇଚ୍ଛା ଥିବା କଥା ମଧ୍ୟ ସେ କହିଛନ୍ତି।

ୟୁକ୍ରେନର Starshield ବ୍ୟବହାର ଉପରେ ଆମେରିକା କଟକଣା ଲଗାଇଛି କି ନାହିଁ ବୋଲି ପଚରାଯିବାରୁ ଟ୍ରମ୍ପ ଏହାକୁ ଅସ୍ୱୀକାର କରିଛନ୍ତି। ଅନ୍ୟପକ୍ଷରେ, ରୁଷ ସହ ଆମେରିକାର ସମ୍ପର୍କ ଏବଂ ୟୁକ୍ରେନକୁ ନେଇ ଟ୍ରମ୍ପଙ୍କ ଆଭିମୁଖ୍ୟକୁ ନେଇ ଆନ୍ତର୍ଜାତିକ ସ୍ତରରେ ଚର୍ଚ୍ଚା ଜାରି ରହିଛି।