ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ରୁଷ ସହ ଜଡ଼ିତ କିଛି ନୂଆ ପ୍ରତିବନ୍ଧକ, ବାଣିଜ୍ୟିକ କଟକଣା ଏବଂ ଟାରିଫ୍କୁ ଲାଗୁ କରିବାରୁ ସାମୟିକ ଭାବେ ଛାଡ଼ ଦେଇଛନ୍ତି। ଅକ୍ଟୋବର ୧୬ରେ ଜାରି ହୋଇଥିବା ଏକ Executive Order ମାଧ୍ୟମରେ ସେ ଏହି ପଦକ୍ଷେପ ନେଇଛନ୍ତି ଏବଂ ଏହାକୁ ଆମେରିକାର ଜାତୀୟ ସ୍ୱାର୍ଥ ଦୃଷ୍ଟିରୁ ଆବଶ୍ୟକ ବୋଲି ଦର୍ଶାଇଛନ୍ତି।

‘Lindsey O. Graham Sanctioning Russia and Iran Act of 2026’ ଅନୁସାରେ ରୁଷରୁ ଅଶୋଧିତ ତେଲ ଓ ପ୍ରାକୃତିକ ଗ୍ୟାସ କିଣୁଥିବା ବଡ଼ ଦେଶଗୁଡ଼ିକର ସାମଗ୍ରୀ ଉପରେ ୧୦୦% ପର୍ଯ୍ୟନ୍ତ ଅତିରିକ୍ତ ଶୁଳ୍କ ଲାଗିପାରୁଥିଲା। ଭାରତ ଓ ଚୀନ୍ ଭଳି ରୁଷ ତେଲର ବଡ଼ ଆମଦାନିକାରୀ ଏହାର ପ୍ରଭାବରେ ପଡ଼ିପାରୁଥିଲେ।

ଟ୍ରମ୍ପଙ୍କ ନିର୍ଦ୍ଦେଶରେ ରୁଷରୁ ଆମଦାନି ହେଉଥିବା ସାମଗ୍ରୀ ଉପରେ ପ୍ରସ୍ତାବିତ ୫୦୦% ଶୁଳ୍କ ଏବଂ ରୁଷ ତେଲ-ଗ୍ୟାସ କିଣୁଥିବା ପ୍ରମୁଖ ଦେଶଗୁଡ଼ିକ ଉପରେ ପ୍ରସ୍ତାବିତ ୧୦୦% ଟାରିଫ୍କୁ ମଧ୍ୟ ଛାଡ଼ ଦିଆଯାଇଛି। ତେବେ ଏହି ଛାଡ଼ ସ୍ଥାୟୀ ନୁହେଁ; ଭବିଷ୍ୟତରେ ପୁଣି କଟକଣା ଲାଗୁ କରିବାର ଅଧିକାର ଆମେରିକୀୟ ପ୍ରଶାସନ ପାଖରେ ରହିଛି।

ଭାରତ ପୂର୍ବରୁ ଏହି ଆଇନକୁ ନେଇ ଆମେରିକାକୁ ନିଜର ଚିନ୍ତା ଜଣାଇଥିଲା। ନୂଆ ପଦକ୍ଷେପ ଫଳରେ ଭାରତ-ଆମେରିକା ବାଣିଜ୍ୟିକ ସମ୍ପର୍କ ଉପରେ ତୁରନ୍ତ ଚାପ କିଛି ମାତ୍ରାରେ କମିବା ସହ ରୁଷ ତେଲ ଆମଦାନି ସମ୍ପର୍କିତ ୧୦୦% ଟାରିଫ୍ ଆଶଙ୍କା ମଧ୍ୟ ଏବେ ଟଳିଛି।