ଚର୍ଚ୍ଚିତ ଟିସିଏସ୍ ନାଶିକ ଧର୍ମାନ୍ତରଣ ଓ ମହିଳା ଉତ୍ପୀଡ଼ନ ମାମଲାରେ ବଡ଼ ସଫଳତା ହାସଲ କରିଛି ପୁଲିସ। ଏହି ମାମଲାରେ ମୁଖ୍ୟ ଅଭିଯୁକ୍ତ ଭାବେ ଚିହ୍ନଟ ସସ୍ପେଣ୍ଡ ହୋଇଥିବା କର୍ମଚାରୀ ନିଦା ଖାନଙ୍କୁ ମହାରାଷ୍ଟ୍ରର ଛତ୍ରପତି ସମ୍ଭାଜୀନଗରରୁ ଗିରଫ କରାଯାଇଛି। ପୁଲିସ ସୂଚନା ଅନୁଯାୟୀ, ସେ ପ୍ରାୟ ୨୫ ଦିନ ଧରି ଫେରାର ଥିଲେ।

ସ୍ପେଶାଲ୍ ଇନଭେଷ୍ଟିଗେସନ୍ ଟିମ୍ (SIT) ନିଦା ଖାନଙ୍କ ଗତିବିଧି ଉପରେ ନଜର ରଖିଥିଲା। ପରେ ନାରେଗାଓଁ ଅଞ୍ଚଳର ଏକ ଫ୍ଲାଟ୍ରେ ସେ ପରିବାର ସଦସ୍ୟଙ୍କ ସହ ଲୁଚି ରହିଥିବା ଖବର ମିଳିବା ପରେ ଦେରରାତିରେ ଚଢ଼ାଉ କରି ତାଙ୍କୁ ଗିରଫ କରାଯାଇଥିଲା। ପରେ ତାଙ୍କୁ ନାଶିକକୁ ଆଣି ଅଧିକ ପଚରାଉଚରା କରାଯାଉଛି।

ଏହି ମାମଲା ପ୍ରଥମେ ସେତେବେଳେ ସାମ୍ନାକୁ ଆସିଥିଲା, ଯେତେବେଳେ ଟିସିଏସ୍ ସଂପୃକ୍ତ ଏକ ବିପିଓ କାର୍ଯ୍ୟାଳୟର ଅନେକ ମହିଳା କର୍ମଚାରୀ ସହକର୍ମୀ ଓ ଉର୍ଦ୍ଧ୍ୱତନ ଅଧିକାରୀଙ୍କ ବିରୋଧରେ ଯୌନ ଉତ୍ପୀଡ଼ନ, ମାନସିକ ନିର୍ଯାତନା, ଧମକ ଓ ଧର୍ମାନ୍ତରଣ ପାଇଁ ଚାପ ପକାଇବା ଭଳି ଗୁରୁତର ଅଭିଯୋଗ ଆଣିଥିଲେ।

ଅଭିଯୋଗ ଅନୁଯାୟୀ, କେତେକ ମହିଳା କର୍ମଚାରୀଙ୍କୁ ହିଜାବ ଓ ବୁର୍ଖା ପିନ୍ଧିବା, ନମାଜ ପଢ଼ିବା ଏବଂ ହିନ୍ଦୁ ପରମ୍ପରାରୁ ଦୂରେଇ ରହିବାକୁ ଚାପ ପକାଯାଉଥିଲା। କେତେକ ଅଭିଯୁକ୍ତ ହିନ୍ଦୁ ଦେବଦେବୀଙ୍କ ବିରୋଧରେ ଅପମାନଜନକ ମତାମତ ଦେଇଥିବା ଓ ବିବାହର ପ୍ରତିଶ୍ରୁତି ଦେଇ ମହିଳାଙ୍କୁ ପ୍ରଭାବିତ କରିବାକୁ ଚେଷ୍ଟା କରିଥିବା ମଧ୍ୟ FIRରେ ଉଲ୍ଲେଖ ରହିଛି।

ତଦନ୍ତକାରୀମାନଙ୍କ ଅନୁସାରେ, ନିଦା ଖାନ ଅଭିଯୋଗକାରୀମାନଙ୍କୁ ପୁଲିସ ନିକଟକୁ ଯିବାରୁ ରୋକିବା ସହ ଧର୍ମୀୟ ପ୍ରଥା ଅନୁସରଣ ପାଇଁ ପ୍ରଭାବିତ କରୁଥିଲେ। ସହ-ଅଭିଯୁକ୍ତ ଡାନିଶ୍ ଶେଖଙ୍କ ବିବାହିତ ସ୍ଥିତି ଲୁଚାଇ ଜଣେ ମହିଳା ସହ ସମ୍ପର୍କ ଗଢ଼ିବାରେ ସହଯୋଗ କରିଥିବା ଅଭିଯୋଗ ମଧ୍ୟ ତାଙ୍କ ବିରୋଧରେ ରହିଛି।

ଗିରଫ ପୂର୍ବରୁ ନିଦା ଖାନ ନିଜର ଦୁଇ ମାସର ଗର୍ଭାବସ୍ଥା ଦେଖାଇ ଅଗ୍ରିମ ଜାମିନ ପାଇଁ କୋର୍ଟର ଦ୍ୱାରସ୍ଥ ହୋଇଥିଲେ। କିନ୍ତୁ ଅଭିଯୋଗର ଗୁରୁତ୍ୱ ଓ ତଦନ୍ତ ପାଇଁ କଷ୍ଟଡି ଆବଶ୍ୟକ ଥିବା ଦର୍ଶାଇ ପ୍ରୋସିକ୍ୟୁସନ୍ ଏହାକୁ ବିରୋଧ କରିଥିଲା। ପରେ କୋର୍ଟ ତାଙ୍କ ଜାମିନ ଆବେଦନ ଖାରଜ କରିଥିଲେ।