ଟାଟା ଗ୍ରୁପ୍‌ର ହୋଲ୍ଡିଂ କମ୍ପାନୀ ଟାଟା ସନ୍ସକୁ ନେଇ ଏକ ବଡ଼ ନିଷ୍ପତ୍ତି ସାମ୍ନାକୁ ଆସିଛି। ଟାଟା ସନ୍ସ ବୋର୍ଡ ଏନ୍ ଚନ୍ଦ୍ରଶେଖରନଙ୍କୁ ଆଉ ଏକ ୫ ବର୍ଷର କାର୍ଯ୍ୟକାଳ ପାଇଁ ଏକ୍ଜିକ୍ୟୁଟିଭ୍ ଚେୟାରମ୍ୟାନ୍ ଭାବେ ପୁନଃନିଯୁକ୍ତି ଦେବାକୁ ଅନୁମୋଦନ କରିଛି। ଏହା ସହିତ ଟାଟା ସନ୍ସର ଲିଷ୍ଟିଂ ପ୍ରକ୍ରିୟା ଆଗକୁ ବଢ଼ାଇବାକୁ ମଧ୍ୟ ନିଷ୍ପତ୍ତି ହୋଇଛି।

ସେପ୍ଟେମ୍ବର ୧୭ରେ ମୁମ୍ବାଇରେ ପ୍ରାୟ ୩ ଘଣ୍ଟା ଧରି ଚାଲିଥିବା ବୋର୍ଡ ବୈଠକରେ ଏହି ନିଷ୍ପତ୍ତି ନିଆଯାଇଥିବା ରିପୋର୍ଟରେ ଉଲ୍ଲେଖ ରହିଛି।

ଚନ୍ଦ୍ରଶେଖରନଙ୍କ ପୁନଃନିଯୁକ୍ତି

୬୩ ବର୍ଷୀୟ ଏନ୍ ଚନ୍ଦ୍ରଶେଖରନ ଅଗଷ୍ଟରେ ତାଙ୍କ ବର୍ତ୍ତମାନର କାର୍ଯ୍ୟକାଳ ଶେଷ ହେବା ପରେ ପୁଣି ଦାୟିତ୍ୱ ନେବାକୁ ଇଚ୍ଛୁକ ନଥିବା ବୋର୍ଡକୁ ଜଣାଇଥିଲେ। ତାଙ୍କ ବର୍ତ୍ତମାନର କାର୍ଯ୍ୟକାଳ ୨୦ ଫେବ୍ରୁଆରୀ ୨୦୨୭ରେ ଶେଷ ହେବାକୁ ଥିଲା। କିନ୍ତୁ ବୋର୍ଡର ଅନୁରୋଧ ପରେ ସେ ନିଜ ନିଷ୍ପତ୍ତିର ପୁନର୍ବିଚାର କରିଛନ୍ତି।

ଟାଟା ସନ୍ସର Nomination & Remuneration Committee (NRC) ତାଙ୍କ ଅବଦାନ ଏବଂ ଟାଟା ଗ୍ରୁପ୍‌ର ବୃହତ୍ତର ସ୍ୱାର୍ଥକୁ ଦୃଷ୍ଟିରେ ରଖି ପୁନଃନିଯୁକ୍ତି ପାଇଁ ଅନୁରୋଧ କରିଥିଲା। ଏହାପରେ ବୋର୍ଡର ଅଧିକାଂଶ ଭୋଟରେ ଆଉ ୫ ବର୍ଷ ପାଇଁ ତାଙ୍କ ପୁନଃନିଯୁକ୍ତି ଅନୁମୋଦିତ ହୋଇଛି।

ତେବେ ଏହି ନିଯୁକ୍ତି ଚୂଡ଼ାନ୍ତ ହେବା ପାଇଁ କମ୍ପାନୀର ବାର୍ଷିକ ସାଧାରଣ ସଭା (AGM)ରେ ଅନୁମୋଦନ ଆବଶ୍ୟକ।

ଲିଷ୍ଟିଂ ଯୋଜନାକୁ ନେଇ ବିବାଦ

ଚନ୍ଦ୍ରଶେଖରନଙ୍କ ପୁନଃନିଯୁକ୍ତି ସହ ଟାଟା ସନ୍ସର ଲିଷ୍ଟିଂ ପ୍ରକ୍ରିୟା ଆରମ୍ଭ କରିବା ନିଷ୍ପତ୍ତି ମଧ୍ୟ ଚର୍ଚ୍ଚାରେ ରହିଛି। ରିପୋର୍ଟ ଅନୁସାରେ, ଟାଟା ଟ୍ରଷ୍ଟସ୍ ଏହି ନିଷ୍ପତ୍ତିଗୁଡ଼ିକୁ “illegal” ବୋଲି ଅଭିହିତ କରିଛି ଏବଂ ଏହାକୁ ଚ୍ୟାଲେଞ୍ଜ କରିବାର ସମ୍ଭାବନା ରହିଛି।