ସ୍ୱିଜରଲ୍ୟାଣ୍ଡରେ ଏକ ଡଚ୍‌ ଟୁରିଷ୍ଟ ବସ୍‌ ଓଲଟି ପଡ଼ିବାରୁ ଅନେକ ଲୋକ ମୃତାହତ ହୋଇଛନ୍ତି। ଗୁରୁବାର ଅପରାହ୍ଣରେ ଗ୍ରାଉବୁଏଣ୍ଡେନ୍‌ର ଆଲପାଇନ୍‌ କ୍ୟାଣ୍ଟନ୍‌ରେ ଏହି ଦୁର୍ଘଟଣା ଘଟିଛି।

ସୂଚନା ଅନୁଯାୟୀ, ସୁସ୍ଚ ଓ ଜେର୍ନେଜ୍‌ ଗ୍ରାମ ମଧ୍ୟରେ ବସ୍‌ଟି ଯାଉଥିବା ବେଳେ ପ୍ରଥମେ ଏକ କ୍ରାସ୍‌ ବାରିୟରରେ ଧକ୍କା ହୋଇଥିଲା। ଏହାପରେ ବସ୍‌ଟି ରାସ୍ତାରେ ଓଲଟି ପଡ଼ିଥିବା ଜଣେ ପୁଲିସ ମୁଖପାତ୍ର କହିଛନ୍ତି।

ବସ୍‌ରେ ଥିଲେ ୪୮ ଜଣ ଯାତ୍ରୀ

ସ୍ୱିସ୍‌ ଗଣମାଧ୍ୟମର ରିପୋର୍ଟ ଅନୁସାରେ, ବସ୍‌ରେ ମୋଟ ୪୮ ଜଣ ଲୋକ ଥିଲେ। ସେମାନେ ସମସ୍ତେ ଡଚ୍‌ ନାଗରିକ ବୋଲି ଜଣାପଡ଼ିଛି।

ତେବେ ଦୁର୍ଘଟଣାରେ ପ୍ରକୃତରେ କେତେ ଜଣଙ୍କ ମୃତ୍ୟୁ ହୋଇଛି କିମ୍ବା କେତେ ଜଣ ଆହତ ହୋଇଛନ୍ତି, ସେନେଇ ସ୍ୱିସ୍‌ ପୁଲିସ ଏପର୍ଯ୍ୟନ୍ତ କୌଣସି ସ୍ପଷ୍ଟ ସଂଖ୍ୟା ଜାରି କରିନାହିଁ। ଡଚ୍‌ ବୈଦେଶିକ ମନ୍ତ୍ରଣାଳୟ ମଧ୍ୟ ମୃତାହତଙ୍କ ସଂଖ୍ୟା ସ୍ପଷ୍ଟ ହୋଇନଥିବା କହିଛି।

ଉଦ୍ଧାର କାର୍ଯ୍ୟରେ ୫ ହେଲିକପ୍ଟର

ଦୁର୍ଘଟଣାର ଖବର ପାଇବା ପରେ ଉଦ୍ଧାରକାରୀ ଦଳ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲେ। ଉଦ୍ଧାର ଓ ଚିକିତ୍ସା କାର୍ଯ୍ୟ ପାଇଁ ଏକାଧିକ ଆମ୍ବୁଲାନ୍ସ ଓ ୫ଟି ହେଲିକପ୍ଟର ନିୟୋଜିତ କରାଯାଇଥିବା ଅଧିକାରୀମାନେ କହିଛନ୍ତି।

ପ୍ରାଥମିକ ସୂଚନା ଅନୁଯାୟୀ, ଦୁର୍ଘଟଣାରେ ଅନ୍ୟ କୌଣସି ଯାନ ସାମିଲ ଥିବା ଜଣାପଡ଼ିନାହିଁ। ବସ୍‌ଟି ନିଜେ ନିୟନ୍ତ୍ରଣ ହରାଇ କ୍ରାସ୍‌ ବାରିୟରରେ ଧକ୍କା ହୋଇଥିବା ବିଶ୍ୱାସ କରାଯାଉଛି।

ତଦନ୍ତ କରିବେ ସ୍ୱିସ୍‌ କର୍ତ୍ତୃପକ୍ଷ

ଘଟଣାର ପ୍ରକୃତ କାରଣ ଓ ଦୁର୍ଘଟଣାର ପରିସ୍ଥିତି ଜାଣିବା ପାଇଁ ତଦନ୍ତ ଆରମ୍ଭ ହୋଇଛି। ସ୍ୱିଜରଲ୍ୟାଣ୍ଡର ରାଷ୍ଟ୍ରପତି ଗାଏ ପାର୍ମେଲିନ୍‌ ‘ଏକ୍ସ’ରେ ପୋଷ୍ଟ କରି ଏହି ଘଟଣା ଉପରେ ଦୁଃଖ ପ୍ରକାଶ କରିବା ସହ ମାମଲାର ବ୍ୟାପକ ଓ ପୁଙ୍ଖାନୁପୁଙ୍ଖ ତଦନ୍ତ ହେବ ବୋଲି କହିଛନ୍ତି।

ବର୍ତ୍ତମାନ ଉଦ୍ଧାର ଓ ଚିକିତ୍ସା କାର୍ଯ୍ୟ ଜାରି ରହିଥିବା ବେଳେ ମୃତାହତଙ୍କ ଅଧିକୃତ ସଂଖ୍ୟା ପାଇଁ କର୍ତ୍ତୃପକ୍ଷଙ୍କ ପରବର୍ତ୍ତୀ ସୂଚନାକୁ ଅପେକ୍ଷା କରାଯାଉଛି।