ଦେଶର ସର୍ବୋଚ୍ଚ ନ୍ୟାୟାଳୟ ସୁପ୍ରିମକୋର୍ଟରେ ଶୁକ୍ରବାର ଶୁଣାଣି ସମୟରେ ଏକ ଅସାଧାରଣ ଘଟଣା ଘଟିଛି। କୋର୍ଟରେ ଉପସ୍ଥିତ ଜଣେ ଆବେଦନକାରୀ ନ୍ୟାୟାଳୟର ମର୍ଯ୍ୟାଦା ଉଲ୍ଲଂଘନ କରିବା ସହ ଶୁଣାଣିରେ ବାଧା ସୃଷ୍ଟି କରିଥିଲେ।

ସୂଚନା ଅନୁଯାୟୀ, ଶୁକ୍ରବାର ସକାଳ ପ୍ରାୟ ୧୧ଟାରେ ଜଷ୍ଟିସ୍ କେ.ଭି. ବିଶ୍ୱନାଥନ ଓ ଜଷ୍ଟିସ୍ ଆଲୋକ ଆରାଧେଙ୍କ ଖଣ୍ଡପୀଠ ସମ୍ମୁଖରେ ମାମଲାର ଶୁଣାଣି ଚାଲିଥିବା ବେଳେ ଏହି ଘଟଣା ଘଟିଥିଲା।

ଆବେଦନକାରୀ ପ୍ରବଳ ପ୍ରତାପ ନିଜକୁ "ସାର୍ବଭୌମ" ବୋଲି ପରିଚୟ ଦେଇ ବିଚାରପତିମାନଙ୍କୁ "ନ୍ୟାୟିକ ସେବକ" ବୋଲି ସମ୍ବୋଧନ କରିଥିଲେ। ସେ ଲକ୍ଷ୍ନୌର ଜଣେ ଏସିପିଙ୍କ ବିରୋଧରେ ଏଫ୍‌ଆଇଆର୍ ପଞ୍ଜିକରଣ କରିବାକୁ କୋର୍ଟକୁ ନିର୍ଦ୍ଦେଶ ଦେବା ଭଳି କଥା କହିଥିଲେ।

ଏହାର ଜବାବରେ ଜଷ୍ଟିସ୍ କେ.ଭି. ବିଶ୍ୱନାଥନ ପଚାରିଥିଲେ, "ଆପଣ ଆମକୁ ଆଦେଶ ଦେଉଛନ୍ତି କି?"

ଏହା ପରେ ଆବେଦନକାରୀଙ୍କ ବ୍ୟବହାର ଆହୁରି ଉତ୍ତେଜନାପୂର୍ଣ୍ଣ ହୋଇଯାଇଥିଲା। ସେ କୋର୍ଟରେ କାଗଜପତ୍ର ଫିଙ୍ଗିଥିଲେ ଏବଂ ଅନୁଚିତ ଭାଷା ବ୍ୟବହାର କରିଥିବା ଅଭିଯୋଗ ରହିଛି। ଏହା ଫଳରେ କିଛି ସମୟ ପାଇଁ ଶୁଣାଣି ବାଧାପ୍ରାପ୍ତ ହୋଇଥିଲା।

ପରିସ୍ଥିତି ନିୟନ୍ତ୍ରଣ ବାହାରକୁ ଯିବା ପୂର୍ବରୁ କୋର୍ଟର ସୁରକ୍ଷାକର୍ମୀମାନେ ତୁରନ୍ତ ହସ୍ତକ୍ଷେପ କରି ଆବେଦନକାରୀଙ୍କୁ କୋର୍ଟରୁମରୁ ବାହାରକୁ ନେଇଯାଇଥିଲେ। ଏହା ପରେ ପୁଣି ଶୁଣାଣି ସ୍ୱାଭାବିକ ଭାବେ ଆରମ୍ଭ ହୋଇଥିଲା।

ଏହି ଘଟଣାକୁ ନେଇ ଆଇନ ମହଲରେ ଚର୍ଚ୍ଚା ଜୋର ଧରିଛି। ନ୍ୟାୟାଳୟର ମର୍ଯ୍ୟାଦା ଓ ଶୃଙ୍ଖଳା ରକ୍ଷାର ଆବଶ୍ୟକତା ଉପରେ ମଧ୍ୟ ପୁଣିଥରେ ପ୍ରଶ୍ନ ଉଠିଛି।