ବୃଦ୍ଧାବସ୍ଥାରେ ଅପମାନ, ଅବହେଳା କିମ୍ବା ଅସୁରକ୍ଷା ସହି ରହିବାକୁ କୌଣସି ବୃଦ୍ଧ ବାପା-ମା’ଙ୍କୁ ବାଧ୍ୟ କରାଯାଇପାରିବ ନାହିଁ। ସୁରକ୍ଷା, ସମ୍ମାନ ଓ ମର୍ଯ୍ୟାଦା ପାଇଁ ଆବଶ୍ୟକ ହେଲେ ବୃଦ୍ଧ ବାପା-ମା’ଙ୍କ ଘରୁ ପୁଅ କିମ୍ବା ଅନ୍ୟ ସମ୍ପର୍କୀୟଙ୍କୁ ଖାଲି କରିବାକୁ ମେଣ୍ଟେନାନ୍ସ ଟ୍ରିବ୍ୟୁନାଲ ଆଦେଶ ଦେଇପାରିବ। ଗୁରୁବାର ସୁପ୍ରିମକୋର୍ଟ ଏହି ଗୁରୁତ୍ୱପୂର୍ଣ୍ଣ ରାୟ ଦେଇଛନ୍ତି।

ଜଷ୍ଟିସ ପିଏସ୍ ନରସିଂହା ଓ ଜଷ୍ଟିସ ଆଲୋକ ଆରାଧେଙ୍କ ଖଣ୍ଡପୀଠ ଆଲାହାବାଦ ହାଇକୋର୍ଟଙ୍କ ୨୦୨୩ର ରାୟକୁ ଖାରଜ କରିଛନ୍ତି। କୋର୍ଟ ସ୍ପଷ୍ଟ କରିଛନ୍ତି ଯେ Maintenance and Welfare of Parents and Senior Citizens Act, 2007 ଅନୁସାରେ ଗଠିତ ମେଣ୍ଟେନାନ୍ସ ଟ୍ରିବ୍ୟୁନାଲ ବୃଦ୍ଧଙ୍କ ସୁରକ୍ଷା ଓ କଲ୍ୟାଣ ପାଇଁ ପୁଅ କିମ୍ବା ଅନ୍ୟ ସମ୍ପର୍କୀୟଙ୍କୁ ସମ୍ପତ୍ତି ଛାଡ଼ିବାକୁ ନିର୍ଦ୍ଦେଶ ଦେଇପାରିବ।

ଏହି ମାମଲା ଲକ୍ଷ୍ନୌର ବାସିନ୍ଦା ରବିକାନ୍ତ ଗୁପ୍ତାଙ୍କ ସହ ଜଡ଼ିତ। ଗୁପ୍ତା ତାଙ୍କ ପୁଅ ଓ ବୋହୂଙ୍କୁ ନିଜ ଘର ଖାଲି କରାଇବା ପାଇଁ ପ୍ରଶାସନର ଦ୍ୱାରସ୍ଥ ହୋଇଥିଲେ। ୨୦୨୨ ନଭେମ୍ବର ୧୫ରେ ସବ୍-ଡିଭିଜନାଲ ମାଜିଷ୍ଟ୍ରେଟ୍ ଏହି ସମ୍ପତ୍ତି ଗୁପ୍ତାଙ୍କ ନିଜସ୍ୱ ଅର୍ଜିତ ସମ୍ପତ୍ତି ବୋଲି ମାନି ତାଙ୍କ ପୁଅଙ୍କୁ ଘର ଖାଲି କରିବାକୁ ଆଦେଶ ଦେଇଥିଲେ।

ପରେ ଜିଲ୍ଲା ମାଜିଷ୍ଟ୍ରେଟ୍ ମଧ୍ୟ ଏହି ଆଦେଶକୁ ବଜାୟ ରଖିଥିଲେ। କିନ୍ତୁ ପୁଅ ଓ ବୋହୂ ଆଲାହାବାଦ ହାଇକୋର୍ଟରେ ଏହାକୁ ଚ୍ୟାଲେଞ୍ଜ କରିଥିଲେ। ହାଇକୋର୍ଟ ଟ୍ରିବ୍ୟୁନାଲର ଏପରି ଇଭିକ୍ସନ୍ ଆଦେଶ ଦେବାର କ୍ଷମତା ନାହିଁ ବୋଲି ମତ ଦେଇଥିଲେ। ଏହାପରେ ଗୁପ୍ତା ସୁପ୍ରିମକୋର୍ଟରେ ଆବେଦନ କରିଥିଲେ।

ସୁପ୍ରିମକୋର୍ଟ ହାଇକୋର୍ଟର ଏହି ବ୍ୟାଖ୍ୟାକୁ ଭୁଲ୍ ବୋଲି କହି ଟ୍ରିବ୍ୟୁନାଲର କ୍ଷମତାକୁ ପୁନଃସ୍ଥାପିତ କରିଛନ୍ତି। କୋର୍ଟ କହିଛନ୍ତି, ବୟସ ବଢ଼ିବାର ଅର୍ଥ ଅପମାନ, ଅବହେଳା କିମ୍ବା ଅସୁରକ୍ଷା ସହି ଜୀବନ ବିତାଇବା ନୁହେଁ।

ରାୟରେ ସୁପ୍ରିମକୋର୍ଟ ସମ୍ବିଧାନର ଅନୁଚ୍ଛେଦ ୨୧ ଅନୁସାରେ ମର୍ଯ୍ୟାଦାପୂର୍ଣ୍ଣ ଜୀବନର ଅଧିକାର ଏବଂ ଅନୁଚ୍ଛେଦ ୪୧ ଅନୁସାରେ ବୃଦ୍ଧ ନାଗରିକଙ୍କ ପ୍ରତି ରାଜ୍ୟର ଦାୟିତ୍ୱକୁ ମଧ୍ୟ ଉଲ୍ଲେଖ କରିଛନ୍ତି।

ଏହି ରାୟ ବୃଦ୍ଧ ବାପା-ମା’ଙ୍କୁ ନିଜ ଘରେ ଅବହେଳା କିମ୍ବା ଅସୁରକ୍ଷାର ସମ୍ମୁଖୀନ ହେଲେ ଆଇନଗତ ସୁରକ୍ଷା ଦେବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଭାବେ ଦେଖାଯାଉଛି।