ଆସାମର ନାଗରିକତା ବିବାଦକୁ ନେଇ ସୁପ୍ରିମକୋର୍ଟ ଏକ ଗୁରୁତ୍ୱପୂର୍ଣ୍ଣ ରାୟ ଦେଇଛନ୍ତି। ଗୌହାଟୀ ହାଇକୋର୍ଟ ଦ୍ୱାରା ୨୭ ଜଣଙ୍କୁ ବିଦେଶୀ ଘୋଷଣା କରାଯାଇଥିବା ରାୟକୁ ସର୍ବୋଚ୍ଚ ଅଦାଲତ ଖାରଜ କରି ମାମଲାର ପୂର୍ଣ୍ଣ ବିଚାର ଫରେନର୍ସ ଟ୍ରିବ୍ୟୁନାଲରେ କରିବାକୁ ନିର୍ଦ୍ଦେଶ ଦେଇଛନ୍ତି।

ବିଚାରପତି ବିକ୍ରମ ନାଥ ଏବଂ ବିଚାରପତି ସନ୍ଦୀପ ମେହଟ୍ଟାଙ୍କୁ ନେଇ ଗଠିତ ଖଣ୍ଡପୀଠ କହିଛନ୍ତି ଯେ, ନାଗରିକତା ଭଳି ସମ୍ବେଦନଶୀଳ ପ୍ରସଙ୍ଗରେ ନିରପେକ୍ଷ, ଆଇନସମ୍ମତ ଓ ଯୁକ୍ତିସଙ୍ଗତ ପ୍ରକ୍ରିୟାରେ ବିଚାର ହେବା ଅତ୍ୟନ୍ତ ଆବଶ୍ୟକ।

ଆବେଦନକାରୀମାନଙ୍କ ପକ୍ଷରୁ ଯୁକ୍ତି ଦିଆଯାଇଥିଲା ଯେ, ପୁରୁଣା ଭୋଟର ତାଲିକାରେ ନାମର ବନାନରେ ସାମାନ୍ୟ ପାର୍ଥକ୍ୟ ଭଳି ଛୋଟ ବୈଷୟିକ ତ୍ରୁଟିକୁ ଆଧାର କରି ସେମାନଙ୍କୁ ବିଦେଶୀ ଘୋଷଣା କରାଯାଇଥିଲା। ଏହି କାରଣରୁ ସେମାନେ ଗୌହାଟୀ ହାଇକୋର୍ଟରେ ଆବେଦନ କରିଥିଲେ, କିନ୍ତୁ ହାଇକୋର୍ଟ ସେହି ଆବେଦନକୁ ଖାରଜ କରିଥିଲେ।

ପରେ ମାମଲା ସୁପ୍ରିମକୋର୍ଟରେ ପହଞ୍ଚିଥିଲା। ସର୍ବୋଚ୍ଚ ଅଦାଲତ ସ୍ପଷ୍ଟ କରିଛନ୍ତି ଯେ, ନାଗରିକତା ପ୍ରମାଣ କରିବା ଏକ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବିଷୟ ଏବଂ ଏହାର ସଠିକ୍ ବିଚାର ଆବଶ୍ୟକ।

ତେବେ ସୁପ୍ରିମକୋର୍ଟ ଆବେଦନକାରୀଙ୍କ ଦ୍ୱାରା ଦାଖଲ ହୋଇଥିବା ଦସ୍ତାବେଜର ବୈଧତା କିମ୍ବା ପ୍ରାମାଣିକତା ଉପରେ କୌଣସି ମତ ପ୍ରକାଶ କରିନାହାନ୍ତି। ବରଂ ମାମଲାର ସମସ୍ତ ତଥ୍ୟ ଓ ପ୍ରମାଣର ବିଚାର ଫରେନର୍ସ ଟ୍ରିବ୍ୟୁନାଲରେ ହେବ ବୋଲି ରାୟରେ କହିଛନ୍ତି।