ଏସ୍‌ଏସ୍‌ ରାଜାମୌଳୀଙ୍କ ବହୁ ପ୍ରତୀକ୍ଷିତ ପ୍ୟାନ୍‌-ଇଣ୍ଡିଆ ପ୍ରକଳ୍ପ ‘ବାରାଣସୀ’ ମୁକ୍ତି ପୂର୍ବରୁ ଏକ ବଡ଼ ସଫଳତା ହାସଲ କରିଛି। ମହେଶ ବାବୁ ଓ ପ୍ରିୟଙ୍କା ଚୋପ୍ରାଙ୍କୁ ନେଇ ନିର୍ମାଣ ହେଉଥିବା ଏହି ଭବ୍ୟ ଟାଇମ୍-ଟ୍ରାଭେଲ୍ ଆକ୍ସନ୍ ଥ୍ରିଲର୍‌ର ଟାଇଟଲ୍‌କୁ ନେଇ ଦୀର୍ଘଦିନ ଧରି ବିବାଦ ଲାଗି ରହିଥିଲା।

ପ୍ରକାଶ ଥାଉକି, ‘ବାରାଣସୀ’ ନାମକ ଟାଇଟଲ୍‌ଟି ପୂର୍ବରୁ ନିର୍ଦ୍ଦେଶକ ସୁବ୍ବା ରେଡ୍ଡୀ ୨୦୨୩ ମସିହାରେ ତେଲୁଗୁ ଫିଲ୍ମ ଚେମ୍ବର ଅଫ୍ କମର୍ସରେ ପଞ୍ଜିକୃତ କରିଥିଲେ। ସେ ଏହି ନାମକୁ ନେଇ ନିଜର ଏକ କାହାଣୀ ମଧ୍ୟ ବିକଶିତ କରୁଥିଲେ।

ତେବେ ରାଜାମୌଳୀଙ୍କ ଭଳି ଏକ ଐତିହାସିକ ପ୍ରକଳ୍ପ ପାଇଁ ଏହି ଟାଇଟଲ୍ ଆବଶ୍ୟକ ଥିବା ଜାଣିବା ପରେ ସୁବ୍ବା ରେଡ୍ଡୀ କୌଣସି ପାରିଶ୍ରମିକ ନ ନେଇ ଏହାର ଅଧିକାର ପ୍ରଯୋଜକ କେ.ଏଲ୍‌. ନାରାୟଣଙ୍କୁ ହସ୍ତାନ୍ତର କରିଛନ୍ତି।

ସୁବ୍ବା ରେଡ୍ଡୀ କହିଛନ୍ତି, “ମହେଶ ବାବୁ, ଏସ୍‌ଏସ୍‌ ରାଜାମୌଳୀ ଓ କେ.ଏଲ୍‌. ନାରାୟଣଙ୍କ ଭଳି ଏକ ବଡ଼ ପ୍ରକଳ୍ପରେ ଛୋଟ ଅବଦାନ ରଖିବା ମୋ ପାଇଁ ଗର୍ବର ବିଷୟ। ଟାଇଟଲ୍ ମୋ ପାଇଁ ଏକ ଭାବନା, ଏହାକୁ ବିକ୍ରି କରାଯାଇପାରେ ନାହିଁ।”

ପୂର୍ବତନ ଡାଇରେକ୍ଟର୍ସ ଆସୋସିଏସନ୍ ଅଧ୍ୟକ୍ଷ ବୀର ଶଙ୍କର କହିଛନ୍ତି ଯେ, ପ୍ରଥମେ ନିର୍ମାତାମାନେ ସୁବ୍ବା ରେଡ୍ଡୀଙ୍କ ଭାବନାକୁ ସମ୍ମାନ ଜଣାଇ ତାଙ୍କୁ ସମ୍ପର୍କ କରିନଥିଲେ। ପରେ ପ୍ରକଳ୍ପର ଗୁରୁତ୍ୱ ବୁଝାଇବା ପରେ ସେ ତୁରନ୍ତ ରାଜି ହୋଇଯାଇଥିଲେ।

ଏହି ଚଳଚ୍ଚିତ୍ରରେ ମହେଶ ବାବୁ ‘ରୁଦ୍ର’ ନାମକ ଚରିତ୍ରରେ ନଜର ଆସିବେ। ସେ ପୃଥ୍ୱୀରାଜ ସୁକୁମାରନଙ୍କ ଅଭିନୀତ ଖଲନାୟକ ‘କୁମ୍ଭ’ଙ୍କ ସହ ମୁକାବିଲା କରିବେ। ଅନ୍ୟପଟେ, ପ୍ରିୟଙ୍କା ଚୋପ୍ରା ‘ମନ୍ଦାକିନୀ’ ଭୂମିକାରେ ଭାରତୀୟ ସିନେମାକୁ ପୁଣିଥରେ ଫେରୁଛନ୍ତି।

ଟାଇଟଲ୍ ବିବାଦର ସମାଧାନ ପରେ ଏବେ ଫିଲ୍ମର ନିର୍ମାଣକାର୍ଯ୍ୟ କୌଣସି ଆଇନଗତ ବାଧା ବିନା ଆଗକୁ ବଢ଼ିବ। ‘ବାରାଣସୀ’ ୭ ଅଗଷ୍ଟ ୨୦୨୭ରେ ସିନେମା ହଲ୍‌ରେ ମୁକ୍ତିଲାଭ କରିବ।