ମହାରାଷ୍ଟ୍ରର ମରୁଡ଼ି ପ୍ରଭାବିତ ଅଞ୍ଚଳର ଛାତ୍ରଛାତ୍ରୀଙ୍କୁ ଆର୍ଥିକ ଆଶ୍ୱସ୍ତି ଦେବା ପାଇଁ Swami Ramanand Teerth Marathwada University (SRTMU) ପକ୍ଷରୁ Winter-2026 ପରୀକ୍ଷା ଫି’ ଛାଡ଼ ଘୋଷଣା କରାଯାଇଛି। ନଭେମ୍ବର ଓ ଡିସେମ୍ବରରେ ହେବାକୁ ଥିବା ଏହି ପରୀକ୍ଷାରେ ଯୋଗ୍ୟ ଛାତ୍ରଛାତ୍ରୀ ଏହି ସୁବିଧା ପାଇପାରିବେ। 

ଏହି ସୁବିଧା SRTMU ଅଧୀନରେ ଥିବା କଲେଜ, ବିଶ୍ୱବିଦ୍ୟାଳୟର କ୍ୟାମ୍ପସ ଓ ସବ୍-ସେଣ୍ଟରରେ ପଢ଼ୁଥିବା ସ୍ନାତକ, ଡିପ୍ଲୋମା, ସ୍ନାତକୋତ୍ତର, ପ୍ରଫେସନାଲ ଓ ନନ୍-ପ୍ରଫେସନାଲ କୋର୍ସର ନିୟମିତ ଛାତ୍ରଛାତ୍ରୀଙ୍କ ପାଇଁ ଲାଗୁ ହେବ। 

ତେବେ ଫି’ ଛାଡ଼ ପାଇଁ କିଛି ନିର୍ଦ୍ଧାରିତ ଯୋଗ୍ୟତା ପୂରଣ କରିବାକୁ ପଡ଼ିବ। ଛାତ୍ରଛାତ୍ରୀଙ୍କୁ ସେମାନେ ମରୁଡ଼ି ପ୍ରଭାବିତ ତାଲୁକାର ବାସିନ୍ଦା ବୋଲି ପ୍ରମାଣ ଦେବା ସହିତ ପରିବାରର ବାର୍ଷିକ ଆୟ ୮ ଲକ୍ଷ ଟଙ୍କାରୁ ଅଧିକ ନୁହେଁ ବୋଲି ପ୍ରମାଣପତ୍ର ଦାଖଲ କରିବାକୁ ପଡ଼ିବ। ଏହା ସହିତ ଅନ୍ୟ କୌଣସି ସରକାରୀ ଶିକ୍ଷା ସୁବିଧା ଅଧୀନରେ ପରୀକ୍ଷା ଫି’ର ରିଇମ୍ବର୍ସମେଣ୍ଟ ନେଇନଥିବାର ନିଶ୍ଚିତତା ଦେବାକୁ ପଡ଼ିବ। 

ବିଶ୍ୱବିଦ୍ୟାଳୟ ପକ୍ଷରୁ କୁହାଯାଇଛି ଯେ ମହାରାଷ୍ଟ୍ରର ୩୫୮ଟି ତାଲୁକା ମଧ୍ୟରୁ ୨୬୫ଟିକୁ ମରୁଡ଼ି ପ୍ରଭାବିତ ଘୋଷଣା କରାଯାଇଛି। ଅକ୍ଟୋବର ୧ରେ ରାଜ୍ୟର ଉଚ୍ଚ ଓ ବୈଷୟିକ ଶିକ୍ଷାମନ୍ତ୍ରୀଙ୍କ ଅଧ୍ୟକ୍ଷତାରେ ହୋଇଥିବା ଅନଲାଇନ୍ ବୈଠକରେ ମରୁଡ଼ି ପ୍ରଭାବିତ ଅଞ୍ଚଳର ଯୋଗ୍ୟ ଛାତ୍ରଛାତ୍ରୀଙ୍କ ପରୀକ୍ଷା ଫି’ ଛାଡ଼ କରିବାକୁ ନିର୍ଦ୍ଦେଶ ଦିଆଯାଇଥିଲା। 

ଛାତ୍ରଛାତ୍ରୀଙ୍କ ଦ୍ୱାରା ଦାଖଲ ହେଉଥିବା ଦଲିଲଗୁଡ଼ିକୁ କଲେଜ ସ୍ତରରେ ଯାଞ୍ଚ କରାଯିବ। ଯୋଗ୍ୟ ଛାତ୍ରଛାତ୍ରୀଙ୍କୁ ମାତ୍ର ଏହି ଫି’ ଛାଡ଼ ସୁବିଧା ମିଳିବ। ଯୋଗ୍ୟ ଛାତ୍ରଛାତ୍ରୀ ଆବଶ୍ୟକ ଦଲିଲ ସହ ନିଜ ନିଜ କଲେଜ ସହ ଯୋଗାଯୋଗ କରିବାକୁ SRTMUର Board of Examinations and Evaluation ପକ୍ଷରୁ କୁହାଯାଇଛି। 
​​​​​​​