ଦକ୍ଷିଣ ଆଫ୍ରିକାରେ ପୁଣି ଗୁଳିକାଣ୍ଡ ଘଟଣା ଚିନ୍ତା ବଢ଼ାଇଛି। କିଛି ଘଣ୍ଟା ମଧ୍ୟରେ ଦୁଇଟି ପୃଥକ ଘଟଣାରେ ଅତି କମରେ ୨୭ ଜଣଙ୍କ ମୃତ୍ୟୁ ହୋଇଥିବା ପୁଲିସ୍ କହିଛି।

ପ୍ରଥମ ଘଟଣା ଶନିବାର ରାତିରେ Johannesburgର ଦକ୍ଷିଣ-ପଶ୍ଚିମରେ ଥିବା Wedela townshipରେ ଘଟିଥିଲା। ପୁଲିସ୍ ଅନୁସାରେ, ଏକ ଟାଭର୍ନରେ ଗୁଳିଚାଳନା ହେବାରୁ ୧୭ ଜଣଙ୍କ ମୃତ୍ୟୁ ହୋଇଥିଲା ଏବଂ ଆଉ ୧୫ ଜଣ ଆହତ ହୋଇଥିଲେ। ଘଟଣାରେ ଅଭିଯୁକ୍ତମାନେ AK-47 ରାଇଫଲ୍ ଓ ପିସ୍ତଲ୍‌ରେ ସଜ୍ଜିତ ଥିବା ପୁଲିସ୍ କହିଛି।

ପୁଲିସ୍‌ର ପ୍ରାଥମିକ ସୂଚନା ଅନୁସାରେ, ଆକ୍ରମଣକାରୀମାନେ ପ୍ରଥମେ ଟାଭର୍ନ ବାହାରେ ଥିବା ଲୋକଙ୍କ ଉପରେ ଗୁଳି ଚଳାଇଥିଲେ। ପରେ ସେମାନେ ଭିତରକୁ ପ୍ରବେଶ କରି ଗୁଳିଚାଳନା କରିଥିଲେ। ଆକ୍ରମଣ ପରେ ଅଭିଯୁକ୍ତମାନେ ଦୁଇଟି ଗାଡ଼ିରେ ଫେରାର ହୋଇଥିବା ଏବଂ ଆଉ ଦୁଇଟି ଗାଡ଼ି ପୋଡ଼ି ଦିଆଯାଇଥିବା ପୁଲିସ୍ କହିଛି। ଏହି ଘଟଣାର ଉଦ୍ଦେଶ୍ୟ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ।

ଦ୍ୱିତୀୟ ଘଟଣା ରବିବାର ଭୋରରେ Cape Town ନିକଟ Lwandle townshipରେ ଘଟିଥିଲା। ଏକ ମନୋରଞ୍ଜନ ସ୍ଥଳରେ ଗୁଳିଚାଳନାରେ ୧୦ ଜଣଙ୍କ ମୃତ୍ୟୁ ହୋଇଥିବାବେଳେ ଆଉ ୧୧ ଜଣ ଆହତ ହୋଇଛନ୍ତି। ପାଞ୍ଚ ଜଣ ଘଟଣାସ୍ଥଳରେ ପ୍ରାଣ ହରାଇଥିଲେ ଏବଂ ଅନ୍ୟ ପାଞ୍ଚ ଜଣ ଚିକିତ୍ସା ପାଇଁ ନେବା ସମୟରେ କିମ୍ବା ହସ୍ପିଟାଲରେ ମୃତ୍ୟୁବରଣ କରିଥିଲେ।

ଉଭୟ ଘଟଣାରେ ଏପର୍ଯ୍ୟନ୍ତ କୌଣସି ଗିରଫଦାରୀ ହୋଇନାହିଁ। ଅଭିଯୁକ୍ତଙ୍କୁ ଚିହ୍ନଟ ଓ ଗିରଫ କରିବା ପାଇଁ ଦକ୍ଷିଣ ଆଫ୍ରିକା ପୁଲିସ୍‌ର ତଦନ୍ତ ଓ ମାନହଣ୍ଟ ଜାରି ରହିଛି।

ଏହି ଦୁଇ ଘଟଣାର କିଛି ଦିନ ପୂର୍ବରୁ Durban ନିକଟରେ ଏକ ଘରୋଇ ପାର୍ଟିରେ ମଧ୍ୟ ଗୁଳିକାଣ୍ଡ ହୋଇଥିଲା। ସେଠାରେ ୧୧ ଜଣଙ୍କ ମୃତ୍ୟୁ ହୋଇଥିଲା। ଏହି ଘଟଣାଗୁଡ଼ିକ ପରେ ଦକ୍ଷିଣ ଆଫ୍ରିକାରେ ଗୁଳିଜନିତ ହିଂସାକୁ ନେଇ ପୁଣି ଚିନ୍ତା ବଢ଼ିଛି।