ଭୋଟର ତାଲିକାର Special Intensive Revision ବା SIR ପ୍ରକ୍ରିୟା ଏବେ ବି ଜାରି ରହିଛି। ଏହାରି ମଧ୍ୟରେ ତୃତୀୟ ପର୍ଯ୍ୟାୟର ଡ୍ରାଫ୍ଟ ଭୋଟର ତାଲିକାରୁ ୬ କୋଟି ୧୫ ଲକ୍ଷରୁ ଅଧିକ ଭୋଟରଙ୍କ ନାଁ ବାଦ ପଡ଼ିଥିବା ତଥ୍ୟ ସାମ୍ନାକୁ ଆସିଛି। SIR ଚାଲିଥିବା ୧୭ଟି ରାଜ୍ୟ ଓ ୩ଟି କେନ୍ଦ୍ରଶାସିତ ଅଞ୍ଚଳକୁ ନେଇ ପ୍ରକାଶିତ ତୃତୀୟ ପର୍ଯ୍ୟାୟର ଡ୍ରାଫ୍ଟ ତାଲିକାରୁ ଏହି ତଥ୍ୟ ମିଳିଛି।

SIR ପୂର୍ବରୁ ଏହି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡ଼ିକରେ ମୋଟ ୩୫ କୋଟି ୫୦ ଲକ୍ଷ ୫୦ ହଜାର ୮ ଜଣ ଭୋଟର ଥିଲେ। ତୃତୀୟ ପର୍ଯ୍ୟାୟର ଡ୍ରାଫ୍ଟ ରୋଲ ପ୍ରକାଶ ପରେ ଏହି ସଂଖ୍ୟା ୨୯ କୋଟି ୯୩ ଲକ୍ଷ ୧୧୫କୁ ଖସିଛି। ଅର୍ଥାତ୍ ପ୍ରାୟ ୧୫.୭% ଭୋଟରଙ୍କ ନାଁ ତାଲିକାରୁ ବାଦ ପଡ଼ିଛି।

ବାଦ ପଡ଼ିଥିବା ୬.୧୫ କୋଟି ଭୋଟରଙ୍କ ମଧ୍ୟରୁ ପ୍ରାୟ ୧.୧୧ କୋଟିଙ୍କୁ ମୃତ ଭୋଟର ଭାବେ ଚିହ୍ନଟ କରାଯାଇଛି। ଆଉ ପ୍ରାୟ ୪.୫୨ କୋଟି ଭୋଟରଙ୍କୁ ‘ଅନୁପସ୍ଥିତ’ କିମ୍ବା ‘ଏକାଧିକ ପଞ୍ଜୀକରଣ’ ବର୍ଗରେ ରଖାଯାଇଛି। ପ୍ରାୟ ୩ ଲକ୍ଷ ଭୋଟରଙ୍କୁ ‘ଅନ୍ୟ’ ବର୍ଗରେ ରଖାଯାଇଛି।

ମହାରାଷ୍ଟ୍ରରେ ସର୍ବାଧିକ ହ୍ରାସ

ସଂଖ୍ୟା ଦୃଷ୍ଟିରୁ ମହାରାଷ୍ଟ୍ରରେ ସର୍ବାଧିକ ଭୋଟରଙ୍କ ନାଁ ବାଦ ପଡ଼ିଛି। ଏଠାରେ ୧ କୋଟି ୫୮ ଲକ୍ଷରୁ ଅଧିକ ଭୋଟରଙ୍କ ନାଁ ତାଲିକାରୁ କଟିଛି, ଯାହା ମୋଟ ଭୋଟରଙ୍କ ପ୍ରାୟ ୧୭.୦୮%।

ଅନ୍ୟପକ୍ଷରେ ପ୍ରତିଶତ ହିସାବରେ ଦିଲ୍ଲୀ ଓ ଚଣ୍ଡୀଗଡ଼ରେ ସର୍ବାଧିକ ହ୍ରାସ ରେକର୍ଡ ହୋଇଛି। ଦିଲ୍ଲୀରେ ଭୋଟର ତାଲିକା ୩୫.୮୯% ଏବଂ ଚଣ୍ଡୀଗଡ଼ରେ ୩୧.୮୪% କମିଛି।

ଓଡ଼ିଶା ସମେତ କିଛି ରାଜ୍ୟରେ ବି କମିଛି ଭୋଟର

SIR ପ୍ରକ୍ରିୟା ମଧ୍ୟରେ ୧୭ଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ପ୍ରାୟ ୫୭.୭୫ ଲକ୍ଷ ନୂଆ ଭୋଟର ଯୋଡ଼ାଯାଇଥିଲେ। ଏହା ପରେ ମୋଟ ଭୋଟର ସଂଖ୍ୟା ୩୬ କୋଟି ୮ ଲକ୍ଷ ୭ ହଜାର ୩୯୪ରେ ପହଞ୍ଚିଥିଲା।

ମହାରାଷ୍ଟ୍ରରେ ସର୍ବାଧିକ ୪୭.୯୨ ଲକ୍ଷ ନୂଆ ଭୋଟର ଯୋଡ଼ାଯାଇଥିଲେ। ହରିୟାଣା ସମେତ ଅନ୍ୟ ୧୦ଟି ରାଜ୍ୟରେ ପ୍ରାୟ ୯.୮୩ ଲକ୍ଷ ନୂଆ ଭୋଟର ଯୋଡ଼ାଯାଇଥିଲେ।

ତେବେ ଦିଲ୍ଲୀ, ଓଡ଼ିଶା ସମେତ ଅନ୍ୟ କିଛି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ଭୋଟର ସଂଖ୍ୟା ହ୍ରାସ ପାଇଛି। ଦିଲ୍ଲୀରେ ଲୋକସଭା ନିର୍ବାଚନ ସମୟରେ ୧ କୋଟି ୫୨ ଲକ୍ଷ ୧୪ ହଜାର ୬୩୮ ଭୋଟର ଥିବା ବେଳେ SIR ସମୟରେ ଏହା ପ୍ରାୟ ୭ ଲକ୍ଷ କମି ୧ କୋଟି ୪୫ ଲକ୍ଷ ୧୦ ହଜାର ୨୯୯ରେ ପହଞ୍ଚିଛି।

ସେହିପରି ଉତ୍ତରାଖଣ୍ଡରେ ପ୍ରାୟ ୪.୭ ଲକ୍ଷ, ଓଡ଼ିଶାରେ ୩.୧୭ ଲକ୍ଷ, ଚଣ୍ଡୀଗଡ଼ରେ ୧.୪୪ ଲକ୍ଷ ଏବଂ ପଞ୍ଜାବରେ ପ୍ରାୟ ୧.୧ ଲକ୍ଷ ଭୋଟର କମିଥିବା ତଥ୍ୟ ଦିଆଯାଇଛି।

SIR ପ୍ରକ୍ରିୟା ଏପର୍ଯ୍ୟନ୍ତ ଶେଷ ହୋଇନଥିବାରୁ ଆଗାମୀ ପର୍ଯ୍ୟାୟରେ ଭୋଟର ତାଲିକାରେ ଆହୁରି ପରିବର୍ତ୍ତନ ହୋଇପାରେ।