ନଭେମ୍ବର ୧ରୁ ଆରମ୍ଭ ହେଲା ପର୍ଯ୍ୟଟନ ଋତୁ

ମୟୂରଭଞ୍ଜ ଜିଲ୍ଲାରେ ଅବସ୍ଥିତ ଶିମିଳିପାଳ ଟାଇଗର ରିଜର୍ଭ ବର୍ଷା ଋତୁରେ ବନ୍ଦ ରହିବା ପରେ ନଭେମ୍ବର ୧ରୁ ପୁଣି ପର୍ଯ୍ୟଟକଙ୍କ ପାଇଁ ଖୋଲିଛି। ଏଠାକାର ଘନ ଜଙ୍ଗଲ, ଝରଣା, ବିଭିନ୍ନ ବନ୍ୟଜନ୍ତୁ ଓ ପ୍ରାକୃତିକ ପରିବେଶ ପର୍ଯ୍ୟଟକଙ୍କୁ ଆକର୍ଷିତ କରିଥାଏ।

ବର୍ଷା ଋତୁରେ କ୍ଷତିଗ୍ରସ୍ତ ହୋଇଥିବା ରାସ୍ତାର ମରାମତି ଓ ସୁରକ୍ଷା ଯାଞ୍ଚ ପରେ ଚଳିତ ପର୍ଯ୍ୟଟନ ଋତୁ ଆରମ୍ଭ କରାଯାଇଛି।

ଅନଲାଇନ୍ ଟିକେଟ୍ ବୁକିଂ ବାଧ୍ୟତାମୂଳକ

ଶିମିଳିପାଳ ଭ୍ରମଣ ପାଇଁ ପର୍ଯ୍ୟଟକମାନେ ଅଧିକୃତ ୱେବସାଇଟ୍www.similipal.orgମାଧ୍ୟମରେ ଆଗୁଆ ପ୍ରବେଶ ଅନୁମତି ବୁକ୍ କରିବାକୁ ପଡ଼ିବ। ଚଳିତ ଋତୁରେ ପ୍ରବେଶ ଦ୍ୱାରରେ ଅଫଲାଇନ୍ ପାସ୍ ମିଳିବ ନାହିଁ।

ରାତ୍ରି ରହଣି ଓ ଜଙ୍ଗଲ ସଫାରି ପାଇଁwww.ecotourodisha.comମାଧ୍ୟମରେ ଆଗୁଆ ବୁକିଂ କରିବା ଆବଶ୍ୟକ।

ପ୍ରବେଶ ସମୟ ଓ ନିୟମ ଜାଣନ୍ତୁ

ବନ ବିଭାଗର ନିର୍ଦ୍ଧାରିତ ନିୟମ ଅନୁଯାୟୀ, ଜଶିପୁରର କାଳିକାପ୍ରସାଦ ଗେଟ୍ ଦେଇ ସକାଳ ୫ଟାରୁ ୯ଟା ମଧ୍ୟରେ ପ୍ରବେଶ କରିହେବ। ପିଠାବଟା ଗେଟ୍ ଦେଇ ସକାଳ ୮ଟାରୁ ୯ଟା ମଧ୍ୟରେ ପ୍ରବେଶ ଅନୁମତି ରହିଛି।

ପର୍ଯ୍ୟଟକମାନଙ୍କୁ ସନ୍ଧ୍ୟା ୬ଟା ସୁଦ୍ଧା ଅଭୟାରଣ୍ୟରୁ ବାହାରିବାକୁ ପଡ଼ିବ। ଜୋରନ୍ଦା ଓ ବରେହିପାଣି ଜଳପ୍ରପାତ ଅଞ୍ଚଳରୁ ନିର୍ଦ୍ଧାରିତ ସମୟ ପୂର୍ବରୁ ବାହାରିବା ସହ ପ୍ରତ୍ୟେକ ପର୍ଯ୍ୟଟକ ଗାଡ଼ିରେ ଅନୁମୋଦିତ ଗାଇଡ୍ ରହିବା ଆବଶ୍ୟକ। ଗାଡ଼ିର ଗ୍ରାଉଣ୍ଡ କ୍ଲିୟରାନ୍ସ ଅତିକମରେ ୧୮୦ ମିଲିମିଟର ହେବା ଦରକାର।

ଜଙ୍ଗଲ ସଫାରି ଓ ଇକୋ-କଟେଜ୍ ସୁବିଧା

ପର୍ଯ୍ୟଟକମାନେ ନିର୍ଦ୍ଧାରିତ ସ୍ଥାନରୁ ଜଙ୍ଗଲ ସଫାରିର ସୁବିଧା ନେଇପାରିବେ। ଏହା ସହ କୁମାରୀ, ଗୁଡ଼ଗୁଡ଼ିଆ, ବରେହିପାଣି, ଜମୁଆଣି ଓ ତାଳବନ୍ଧ ଭଳି ସ୍ଥାନରେ ଇକୋ-କଟେଜ୍ରେ ରାତ୍ରି ରହଣିର ବ୍ୟବସ୍ଥା ରହିଛି। ଏଥିପାଇଁ ଆଗୁଆ ଅନଲାଇନ୍ ବୁକିଂ କରିବାକୁ ପଡ଼ିବ।

ପର୍ଯ୍ୟଟକଙ୍କୁ ନିୟମ ମାନିବାକୁ ପରାମର୍ଶ

ଶିମିଳିପାଳର ପ୍ରାକୃତିକ ପରିବେଶ ଓ ବନ୍ୟଜନ୍ତୁଙ୍କ ସୁରକ୍ଷା ପାଇଁ ପର୍ଯ୍ୟଟକମାନେ ବନ ବିଭାଗର ସମସ୍ତ ନିୟମ ମାନିବା ଆବଶ୍ୟକ। ଯାତ୍ରା ଯୋଜନା କରିବା ପୂର୍ବରୁ ଅଧିକୃତ ୱେବସାଇଟ୍ରେ ଟିକେଟ୍ ଉପଲବ୍ଧତା, ପ୍ରବେଶ ନିୟମ ଓ ସଫାରି ସମ୍ପର୍କିତ ନୂଆ ସୂଚନା ଯାଞ୍ଚ କରନ୍ତୁ।