ମୁମ୍ବାଇ: ଦୀପାବଳି ଅବସରରେ ଆୟୋଜିତ ସ୍ୱତନ୍ତ୍ର ମୁହୂର୍ତ୍ତ ଟ୍ରେଡିଂ ସେସନରେ ନିବେଶକଙ୍କୁ ନିରାଶ କରିଛି ଭାରତୀୟ ଷ୍ଟକ୍ ମାର୍କେଟ୍। ୨୦୧୭ ପରେ ପ୍ରଥମ ଥର ପାଇଁ ସେନସେକ୍ସ ଓ ନିଫ୍ଟି ଉଭୟ ହ୍ରାସ ସହ ବନ୍ଦ ହୋଇଛନ୍ତି। ଏହି କାରବାର ସହିତ ହିନ୍ଦୁ କ୍ୟାଲେଣ୍ଡରର ନୂଆ ସମ୍ବତ୍ ୨୦୮୩ ଆରମ୍ଭ ହୋଇଛି ।

ରବିବାର ଅନୁଷ୍ଠିତ ଏହି ଏକ ଘଣ୍ଟିଆ ସ୍ୱତନ୍ତ୍ର କାରବାରରେ ସେନସେକ୍ସ ୮୧,୨୯୯ ପଏଣ୍ଟରେ ଉଚ୍ଚ ସ୍ତରରେ ଖୋଲିଥିଲା। ଦିନରେ ଏହା ୮୧,୪୪୨ ପଏଣ୍ଟର ଉଚ୍ଚତମ ସ୍ତର ଛୁଇଁଥିଲା। କିନ୍ତୁ ଉଚ୍ଚ ସ୍ତରରେ ନିବେଶକମାନେ ଲାଭ ଉଠାଇବା ପାଇଁ ସେୟାର ବିକ୍ରି କରିବାରୁ ସୂଚକାଙ୍କ ତଳକୁ ଖସିଥିଲା। ଶେଷରେ ସେନସେକ୍ସ ୨୯ ପଏଣ୍ଟ ହ୍ରାସ ପାଇ ୮୦,୯୯୯ ପଏଣ୍ଟରେ ବନ୍ଦ ହୋଇଥିଲା।

ସେହିପରି ନ୍ୟାସନାଲ୍ ଷ୍ଟକ୍ ଏକ୍ସଚେଞ୍ଜର ନିଫ୍ଟି ମଧ୍ୟ ୪୪ ପଏଣ୍ଟ ହ୍ରାସ ପାଇ ୨୪,୯୮୬ ପଏଣ୍ଟରେ କାରବାର ଶେଷ କରିଥିଲା। ଉଭୟ ସୂଚକାଙ୍କ ପାଇଁ ୨୦୧୭ ପରେ ଏହା ପ୍ରଥମ ନକାରାତ୍ମକ ମୁହୂର୍ତ୍ତ ଟ୍ରେଡିଂ ସେସନ୍ ।

ପାରମ୍ପରିକ ଭାବେ ଦୀପାବଳି ମୁହୂର୍ତ୍ତ ଟ୍ରେଡିଂ ସମୟରେ ନିବେଶକମାନେ ଶୁଭ ମନେ କରି ସେୟାର କିଣିଥାନ୍ତି। ଏହି ସମୟରେ ବିକ୍ରି ନକରିବାର ଏକ ପୁରୁଣା ପରମ୍ପରା ରହିଛି। ତେଣୁ ସାଧାରଣତଃ ଏହି ସେସନରେ ବଜାର ସବୁଜ ସଙ୍କେତରେ ବନ୍ଦ ହୋଇଥାଏ। କିନ୍ତୁ ଚଳିତ ବର୍ଷ ଏହି ପରମ୍ପରାରେ ବ୍ୟତିକ୍ରମ ଦେଖାଦେଇଛି ।

ଗତ ସାତଟି କାରବାର ଦିନରେ ଲଗାତାର ବୃଦ୍ଧି ପାଇ ଉଭୟ ସୂଚକାଙ୍କ ୧୦ ପ୍ରତିଶତରୁ ଅଧିକ ଉପରକୁ ଉଠିଥିଲେ। ଏହା ପରେ ନିବେଶକମାନେ ଲାଭ ଉଠାଇବା ପାଇଁ ସେୟାର ବିକ୍ରି କରିବାରୁ ବଜାରରେ ସାମାନ୍ୟ ସୁଧାର ବା ପ୍ରଫିଟ୍ ବୁକିଂ ଦେଖାଦେଇଥିଲା। ଏହାକୁ ଏକ ସ୍ୱାଭାବିକ ବଜାର ସ୍ଥିରୀକରଣ ବୋଲି ଏନ୍‌ରିଚ୍ ମନିର ସିଇଓ ପୋନମୁଡି ଆର୍. ମତ ଦେଇଛନ୍ତି ।

ତେବେ ବଡ଼ କମ୍ପାନୀଗୁଡ଼ିକର କିଛି ସେୟାରରେ ବିକ୍ରି ଚାପ ଯୋଗୁଁ ସେନସେକ୍ସ ଓ ନିଫ୍ଟି ତଳକୁ ଖସିଥିବା ବେଳେ ମିଡ୍‌କ୍ୟାପ୍ ଓ ସ୍ମଲ୍‌କ୍ୟାପ୍ ସେୟାରରେ ଭଲ କିଣାବିକା ହୋଇଥିଲା। ବିଏସ୍‌ଇ ମିଡ୍‌କ୍ୟାପ୍ ସୂଚକାଙ୍କ ୦.୫ ପ୍ରତିଶତ ଏବଂ ସ୍ମଲ୍‌କ୍ୟାପ୍ ସୂଚକାଙ୍କ ୧.୫ ପ୍ରତିଶତ ବୃଦ୍ଧି ସହ ବନ୍ଦ ହୋଇଥିଲା।

ଏହାର ପ୍ରଭାବରେ ବିଏସ୍‌ଇରେ ତାଲିକାଭୁକ୍ତ ସମସ୍ତ କମ୍ପାନୀର ମୋଟ ବଜାର ପୁଞ୍ଜିକରଣ ପ୍ରାୟ ୨.୬ ଲକ୍ଷ କୋଟି ଟଙ୍କା ବୃଦ୍ଧି ପାଇଥିଲା। ଫଳରେ ମୋଟ ବଜାର ପୁଞ୍ଜିକରଣ ୫୦୬ ଲକ୍ଷ କୋଟି ଟଙ୍କାର ସର୍ବକାଳୀନ ସର୍ବୋଚ୍ଚ ସ୍ତରରେ ପହଞ୍ଚିଥିଲା।

ଅନ୍ୟପଟେ ଦୀର୍ଘ ବର୍ଷର ପରମ୍ପରା ଅନୁଯାୟୀ, ଦୀପାବଳିରେ ଦଲାଲ୍ ଷ୍ଟ୍ରିଟ୍‌ରେ ଉତ୍ସବର ମାହୋଲ ଦେଖିବାକୁ ମିଳିଥିଲା। ବ୍ରୋକର, ଟ୍ରେଡର ଓ ଅନ୍ୟ ବଜାର ସହ ଜଡ଼ିତ ବ୍ୟକ୍ତିମାନେ ନିଜ ପରିବାର ସହ ଷ୍ଟକ୍ ଏକ୍ସଚେଞ୍ଜରେ ପହଞ୍ଚି ଲକ୍ଷ୍ମୀ ପୂଜାରେ ସାମିଲ ହୋଇଥିଲେ । କିଛି ନିବେଶକ ଶୁଭ ଆରମ୍ଭ ପାଇଁ ପ୍ରତୀକାତ୍ମକ ଭାବେ ସେୟାର କିଣିଥିଲେ ।