ଅନୁସୂଚିତ ଜାତି (SC) ଛାତ୍ରଛାତ୍ରୀଙ୍କ ପାଇଁ ମାଟ୍ରିକ୍ ପରବର୍ତ୍ତୀ ଛାତ୍ରବୃତ୍ତି (Post-Matric Scholarship) ଯୋଜନାର ଯୋଗ୍ୟତା ନିୟମରେ ପରିବର୍ତ୍ତନ ଆସିପାରେ। ବର୍ତ୍ତମାନ ପରିବାରର ବାର୍ଷିକ ଆୟ ସୀମା ୨.୫ ଲକ୍ଷ ଟଙ୍କା ଥିବାବେଳେ ଏହାକୁ ୪.୫ ଲକ୍ଷ ଟଙ୍କାକୁ ବୃଦ୍ଧି କରିବା ପାଇଁ କେନ୍ଦ୍ର ସରକାର ପ୍ରସ୍ତାବ ରଖିଛନ୍ତି। ସଂସଦୀୟ କମିଟିକୁ ମଧ୍ୟ ସରକାର ଏହି ପରିବର୍ତ୍ତନ ନେଇ ସୂଚନା ଦେଇଥିବା ରିପୋର୍ଟ ଆସିଛି। 

୨.୫ ଲକ୍ଷରୁ ୪.୫ ଲକ୍ଷ ହୋଇପାରେ ଆୟ ସୀମା

କେନ୍ଦ୍ର ସରକାରଙ୍କ ଅଧିକାରିକ ତଥ୍ୟ ଅନୁସାରେ, SC ଛାତ୍ରଛାତ୍ରୀଙ୍କ Post-Matric Scholarship ପାଇଁ ବର୍ତ୍ତମାନ ପରିବାରର ବାର୍ଷିକ ଆୟ ସୀମା ୨.୫ ଲକ୍ଷ ଟଙ୍କା। ଏହି ସୀମା ଦୀର୍ଘ ସମୟ ଧରି ଅପରିବର୍ତ୍ତିତ ରହିଛି। 

ନୂଆ ପ୍ରସ୍ତାବ ଅନୁଯାୟୀ, ଆୟ ସୀମା ୪.୫ ଲକ୍ଷ ଟଙ୍କାକୁ ବଢ଼ିପାରେ। ଏହା ଲାଗୁ ହେଲେ ବର୍ତ୍ତମାନର ଆୟ ସୀମା ତୁଳନାରେ ଅଧିକ ପରିବାରର ଛାତ୍ରଛାତ୍ରୀ ସ୍କଲାରସିପ୍ ପାଇଁ ଯୋଗ୍ୟ ହୋଇପାରିବେ। 

EWS ସହ ଆୟ ସୀମାକୁ ନେଇ ତୁଳନା

ଏହି ଆୟ ସୀମାକୁ ନେଇ ବିଭିନ୍ନ ସଂଗଠନ ପ୍ରଶ୍ନ ଉଠାଇଛନ୍ତି। ରିପୋର୍ଟ ଅନୁସାରେ, EWS ଶ୍ରେଣୀ ପାଇଁ ଅନ୍ୟ କ୍ଷେତ୍ରରେ ୮ ଲକ୍ଷ ଟଙ୍କାର ଆୟ ସୀମା ରହିଥିବାବେଳେ SC ଛାତ୍ରଛାତ୍ରୀଙ୍କ Post-Matric Scholarship ପାଇଁ ୨.୫ ଲକ୍ଷ ଟଙ୍କାର ସୀମା ରହିଛି। ଏହାକୁ ନେଇ ଆୟ ସୀମା ପୁନଃବିଚାର କରିବାକୁ ଦାବି ହୋଇଛି। 

୨୦୨୬-୨୭ରୁ ଲାଗୁ ହୋଇପାରେ

ସରକାରଙ୍କ ପ୍ରସ୍ତାବିତ ସଂଶୋଧନକୁ ୨୦୨୬-୨୭ ଶିକ୍ଷାବର୍ଷରୁ ଲାଗୁ କରିବା ନେଇ ଯୋଜନା ଥିବା ରିପୋର୍ଟରେ କୁହାଯାଇଛି। ତେବେ ଏହି ପରିବର୍ତ୍ତନ ଲାଗୁ ହେବା ପୂର୍ବରୁ ଆବଶ୍ୟକ ଅନୁମୋଦନ ମିଳିବା ବାକି ରହିଛି। 

ସ୍କଲାରସିପ୍ ଯୋଜନାରେ ଆୟ ସୀମା ବୃଦ୍ଧି ସହିତ ଟ୍ୟୁସନ୍ ଓ କୋର୍ସ ଫି’ରେ ସୀମା ନିର୍ଦ୍ଧାରଣ, ଦିବ୍ୟାଙ୍ଗ ଭତ୍ତାରେ ପରିବର୍ତ୍ତନ ଏବଂ ଯୋଜନା ସମ୍ପର୍କରେ ସଚେତନତା ପାଇଁ ଅର୍ଥ ବ୍ୟବସ୍ଥା ଭଳି ଅନ୍ୟ ପରିବର୍ତ୍ତନ ମଧ୍ୟ ପ୍ରସ୍ତାବରେ ରହିଛି। 