ନ୍ୟୁୟର୍କ: ଜାତିସଂଘ ସୁରକ୍ଷା ପରିଷଦରେ ସଂସ୍କାର ନେଇ ଚର୍ଚ୍ଚା ମଧ୍ୟରେ ଭାରତ ପାଇଁ ରୁଷର ସମର୍ଥନ ସାମ୍ନାକୁ ଆସିଛି। ୮୧ତମ UN General Assemblyରେ ରୁଷ ବୈଦେଶିକ ମନ୍ତ୍ରୀ ସେର୍ଗେଇ ଲାଭ୍ରୋଭ୍ କହିଛନ୍ତି ଯେ ରୁଷ ଭାରତ ଓ ବ୍ରାଜିଲର ସ୍ଥାୟୀ ସଦସ୍ୟତା ପ୍ରାର୍ଥିତ୍ୱକୁ ସମର୍ଥନ କରୁଛି।

ଲାଭ୍ରୋଭ୍‌ଙ୍କ ଅନୁସାରେ, ସୁରକ୍ଷା ପରିଷଦରେ ଏସିଆ, ଆଫ୍ରିକା ଓ ଲାଟିନ୍ ଆମେରିକାର ପ୍ରତିନିଧିତ୍ୱ ବଢ଼ିବା ଦରକାର। ବିଶେଷକରି Global South ଦେଶଗୁଡ଼ିକୁ ଅଧିକ ପ୍ରତିନିଧିତ୍ୱ ଦେବା ପକ୍ଷରେ ମସ୍କୋ ରହିଛି।

ତେବେ ସୁରକ୍ଷା ପରିଷଦରେ ଅତିରିକ୍ତ ସ୍ଥାୟୀ ଆସନ ପଶ୍ଚିମୀ ଦେଶଗୁଡ଼ିକୁ ଦେବା ପ୍ରସ୍ତାବ ଉପରେ ରୁଷ ଆପତ୍ତି ଜଣାଇଛି। ଲାଭ୍ରୋଭ୍ ବିଶେଷ ଭାବେ ଜର୍ମାନୀ ଓ ଜାପାନର ଅତିରିକ୍ତ ସ୍ଥାୟୀ ଆସନ ଦାବିକୁ ବିରୋଧ କରିଛନ୍ତି।

ବର୍ତ୍ତମାନ ଜାତିସଂଘ ସୁରକ୍ଷା ପରିଷଦରେ ୧୫ଟି ଆସନ ରହିଛି। ଏଥିରୁ ଚୀନ୍, ଫ୍ରାନ୍ସ, ରୁଷ, ବ୍ରିଟେନ୍ ଓ ଆମେରିକା—ଏହି ୫ ଦେଶ ସ୍ଥାୟୀ ସଦସ୍ୟ ଏବଂ ସେମାନଙ୍କ ପାଖରେ ଭେଟୋ ଅଧିକାର ରହିଛି। ଅନ୍ୟ ୧୦ଟି ଆସନ ଅସ୍ଥାୟୀ ସଦସ୍ୟଙ୍କ ପାଇଁ ରହିଛି।

ସୁରକ୍ଷା ପରିଷଦର ଗଠନରେ ପରିବର୍ତ୍ତନ କରିବା ପାଇଁ ଜାତିସଂଘ ଚାର୍ଟରରେ ସଂଶୋଧନ ଆବଶ୍ୟକ। ଏଥିପାଇଁ ସାଧାରଣ ସଭାରେ ଦୁଇ-ତୃତୀୟାଂଶ ସମର୍ଥନ ସହ ସଦସ୍ୟ ଦେଶଗୁଡ଼ିକର ଅନୁମୋଦନ ଆବଶ୍ୟକ ଏବଂ ପାଞ୍ଚ ସ୍ଥାୟୀ ସଦସ୍ୟଙ୍କ ଅନୁମୋଦନ ମଧ୍ୟ ଜରୁରୀ।

ଭାରତର ସ୍ଥାୟୀ ସଦସ୍ୟତା ଦାବିକୁ ଅନ୍ୟ କିଛି ଦେଶ ମଧ୍ୟ ସମର୍ଥନ କରିଛନ୍ତି। ଚଳିତ UNGA ଅଧିବେଶନରେ ମରିସସ୍ ଓ ପର୍ତ୍ତୁଗାଲ୍ ମଧ୍ୟ ସୁରକ୍ଷା ପରିଷଦରେ ଅଧିକ ପ୍ରତିନିଧିତ୍ୱ ଏବଂ ଭାରତର ସ୍ଥାୟୀ ଆସନ ଦାବିକୁ ସମର୍ଥନ କରିଛନ୍ତି।