ଶ୍ରୀକ୍ଷେତ୍ର ପୁରୀରେ ବିଶ୍ୱପ୍ରସିଦ୍ଧ ଘୋଷଯାତ୍ରା ପାଇଁ ତିନି ରଥ ନିର୍ମାଣ କାମ ଏବେ ଜୋରଦାର ଭାବେ ଆଗକୁ ବଢ଼ୁଛି। ରଥଖଳାରେ ମହାରଣା ଓ ରୂପକାର ସେବକମାନେ ଦିନରାତି ପରିଶ୍ରମ କରି ନିର୍ଦ୍ଧାରିତ ସମୟ ମଧ୍ୟରେ ରଥ ନିର୍ମାଣ ସମ୍ପୂର୍ଣ୍ଣ କରିବାକୁ ଲାଗିପଡ଼ିଛନ୍ତି।
ଚଳିତ ବର୍ଷର ରଥଯାତ୍ରା ପାଇଁ ତିନି ରଥରେ ଲାଗିବାକୁ ଥିବା ସମସ୍ତ ୪୨ଟି ଚକର ନିର୍ମାଣ କାମ ସଫଳତାର ସହ ସମ୍ପୂର୍ଣ୍ଣ ହୋଇଛି। ଏହା ପରେ ବର୍ତ୍ତମାନ ରଥର ଅଖ ନିର୍ମାଣ କାମ ଆରମ୍ଭ ହୋଇଛି। ମୋଟ ୨୧ଟି ଅଖ ତିଆରି କରାଯିବାକୁ ଥିବା ବେଳେ ଚକଡେରା ନୀତି ପାଇଁ ଆବଶ୍ୟକ ୩ଟି ଅଖ ପୂର୍ବରୁ ପ୍ରସ୍ତୁତ ହୋଇସାରିଛି। ବର୍ତ୍ତମାନ ବାକି ୧୮ଟି ଅଖ ତିଆରି କାମ ଜାରି ରହିଛି।
ମହାରଣା ସେବକମାନଙ୍କ କହିବା ଅନୁଯାୟୀ, ବର୍ଷା ଯୋଗୁଁ କାମରେ ସାମାନ୍ୟ ବିଳମ୍ବ ହୋଇପାରେ, କିନ୍ତୁ ନିର୍ଦ୍ଧାରିତ ସମୟ ମଧ୍ୟରେ ସମସ୍ତ କାମ ସମ୍ପୂର୍ଣ୍ଣ କରାଯିବ।
ଗୁରୁବାର ରଥର ଭୂଇଁ ଚଉତା ବନ୍ଧନ ପାଇଁ ଅନୁକୂଳ ପୂଜା ଅନୁଷ୍ଠିତ ହୋଇଥିଲା। ତିନି ରଥ ପାଇଁ ୧୨ଟି ଲେଖାଏଁ ଚଉପଟା ଭୂଇଁ ଚଉତା ବନ୍ଧନର ଅନୁକୂଳ ପୂଜା ମୁଖ୍ୟ ମହାରଣା ସେବକଙ୍କ ଦ୍ୱାରା ସମ୍ପନ୍ନ କରାଯାଇଥିଲା।
ପୂଜା ପରେ ମହାରଣା ସେବକ ଓ ତାଙ୍କ ସହଯୋଗୀମାନେ ଭୂଇଁ ଚଉତାରେ ପଖୁଡ଼ା ବନ୍ଧନ ଓ ଖମ୍ବି ବନ୍ଧନ କାମ ଆରମ୍ଭ କରିଥିଲେ। ଏହା ତିନି ରଥର ମୂଳ କାଠାମୋ ନିର୍ମାଣର ଏକ ଗୁରୁତ୍ୱପୂର୍ଣ୍ଣ ପର୍ଯ୍ୟାୟ ବୋଲି ମନାଯାଉଛି।
ଏହା ସହ ରଥର ବିଭିନ୍ନ ଅଂଶରେ ଖୋଦେଇ ଓ ଅଳଙ୍କାର କାମ ମଧ୍ୟ ସମାନ ଭାବେ ଚାଲିଛି। ରୂପକାର ସେବକମାନେ ସାଲଗୁଜ ଓ ତିଖଗୁଜ ଭଳି ଅଂଶରେ ସିଂହବିରାଳ ମୂର୍ତ୍ତି ଖୋଦେଇ କରୁଛନ୍ତି। ଖୋଦେଇ ସରିଥିବା ଅଂଶଗୁଡ଼ିକରେ ପଲିସ କାମ ଓ ଅଳଙ୍କାର ଲଗାଇବା କାମ ମଧ୍ୟ ଜାରି ରହିଛି।
କୋଣଗୁଜ ଅଂଶରେ ମଧ୍ୟ ସିଂହବିରାଳ ଖୋଦେଇ କରାଯାଉଥିବା ବେଳେ ଏହା ରଥର ସୌନ୍ଦର୍ଯ୍ୟକୁ ଆହୁରି ଆକର୍ଷଣୀୟ କରିବ।
ରଥଖଳାରେ ଏବେ ଏକପଟେ କାଠାମୋ ନିର୍ମାଣ ଓ ଅନ୍ୟପଟେ ଖୋଦେଇ କାମ ଚାଲିଥିବା ବେଳେ ଆସନ୍ତା ରଥଯାତ୍ରା ପାଇଁ ପ୍ରସ୍ତୁତି ଚୂଡ଼ାନ୍ତ ପର୍ଯ୍ୟାୟକୁ ପହଞ୍ଚିଛି।
ମଇ 3ରେ ଆୟୋଜିତ NEET UG 2026 ପରୀକ୍ଷାକୁ ଦେଶର ଶିକ୍ଷା ବ...
ଇବୋଲା ଭାଇରସ୍‌ ସଂକ୍ରମଣ ନେଇ ବଢ଼ୁଥିବା ଚିନ୍ତା ମଧ୍...
ନିଟ୍-ୟୁଜି ୨୦୨୬ ପରୀକ୍ଷାରେ ପେପର ଲିକ୍ ଅଭିଯୋଗକୁ କେନ୍ଦ୍...
କେନ୍ଦ୍ରୀୟ ମାଧ୍ୟମିକ ଶିକ୍ଷା ପରିଷଦ (CBSE) ନିଜର ମଲ୍ଟିଲ...
ମେଘାଳୟର ଉମରୋଇରେ ମେ ୨୦ରୁ ଆରମ୍ଭ ହୋଇଥିବା ବହୁରାଷ୍ଟ୍ରୀୟ...
ଇଞ୍ଜିନିୟରିଂ କ୍ଷେତ୍ରରେ IITରେ ଭର୍ତ୍ତି ହେବାକୁ ଇଚ୍ଛୁକ...
ସାଧାରଣ ଭାବରେ ଚାଲିବାବେଳେ କୌଣସି ଅସୁବିଧା ନଥିଲେ ମଧ୍ୟ,...
ଭାରତରେ ଶିଶୁମାନଙ୍କ ମଧ୍ୟରେ ବଢ଼ୁଥିବା ଡାଇବେଟିସ୍‌...
