ଅଯୋଧ୍ୟା ସ୍ଥିତ ଭବ୍ୟ ରାମ ମନ୍ଦିରକୁ ଟାର୍ଗେଟ କରି ହେଉଥିବା ଏକ ବଡ଼ ଧରଣର ସନ୍ଦିଗ୍ଧ ଆତଙ୍କବାଦୀ ଷଡ଼ଯନ୍ତ୍ରର ପର୍ଦ୍ଦାଫାଶ ହୋଇଛି। ଘଟଣା ପରେ ସୁରକ୍ଷା ଏଜେନ୍ସିଗୁଡ଼ିକ ହାଇ-ଆଲର୍ଟରେ ରହିଥିବାବେଳେ ଏନଆଇଏ, ଉତ୍ତର ପ୍ରଦେଶ ଏଟିଏସ୍ ଓ କର୍ଣ୍ଣାଟକ ପୋଲିସର ମିଳିତ ଅପରେସନରେ କର୍ଣ୍ଣାଟକର ଦାବଣଗେରେ ଜିଲ୍ଲାରୁ ସାହାରନପୁରର ଜଣେ ଯୁବକଙ୍କୁ ଗିରଫ କରାଯାଇଛି।

ଗିରଫ ଯୁବକଙ୍କ ନାମ ସୁହେଲ୍ ବୋଲି ଜଣାପଡ଼ିଛି। ସେ ଉତ୍ତର ପ୍ରଦେଶର ସାହାରନପୁର ଜିଲ୍ଲାର ଗଙ୍ଗୋହ ଅଞ୍ଚଳର ବାସିନ୍ଦା। ତଦନ୍ତକାରୀ ସଂସ୍ଥାଙ୍କ ଅନୁସାରେ, ସୁହେଲ୍ କର୍ଣ୍ଣାଟକର ହରିହର ଶିଳ୍ପାଞ୍ଚଳରେ ଜଣେ ପେଣ୍ଟର ଭାବେ କାମ କରୁଥିଲେ ଏବଂ ସାଧାରଣ ଶ୍ରମିକ ଭାବେ ରହି ନିଜ କାର୍ଯ୍ୟକଳାପକୁ ଲୁଚାଇବାକୁ ଚେଷ୍ଟା କରୁଥିଲେ।

ତଦନ୍ତ ବେଳେ ସୁହେଲଙ୍କ ମୋବାଇଲ ଫୋନରୁ ଏକ ପାକିସ୍ତାନୀ ନମ୍ବର ସହ ଯୋଗାଯୋଗର ସୂଚନା ମିଳିଛି। ଉକ୍ତ ନମ୍ବରଟି ‘ରାଣା ବୟ’ ନାମରେ ସେଭ୍ ହୋଇଥିବା ବେଳେ ହ୍ୱାଟ୍ସଆପ୍ କଲ୍ ମାଧ୍ୟମରେ ନିୟମିତ ଯୋଗାଯୋଗ ହେଉଥିବାର ପ୍ରମାଣ ମିଳିଛି। ଏହା ସହ ତାଙ୍କ ମୋବାଇଲ ଗ୍ୟାଲେରୀରୁ ଅସ୍ତ୍ରଶସ୍ତ୍ର ଧରିଥିବା କିଛି ଫଟୋ ଓ ସନ୍ଦିଗ୍ଧ ସାମଗ୍ରୀ ଜବତ କରାଯାଇଛି।

ସୂତ୍ର ଅନୁଯାୟୀ, ପଚରାଉଚରା ବେଳେ ସୁହେଲ୍ ସ୍ୱୀକାର କରିଛନ୍ତି ଯେ ସେ ଏକା କାମ କରୁନଥିଲେ ଏବଂ ତାଙ୍କ ସହ ଆହୁରି କିଛି ଲୋକଙ୍କ ସମ୍ପର୍କ ରହିଥିଲା। ଏହି ଘଟଣାରେ କୌଣସି ସଂଗଠିତ ନେଟୱର୍କ କିମ୍ବା ସ୍ଲିପର ସେଲ୍ ସକ୍ରିୟ ଥିବା ନେଇ ତଦନ୍ତ ଜୋରଦାର କରାଯାଇଛି।

ସାହାରନପୁର ପୋଲିସକୁ ମଧ୍ୟ ଏହି ଗିରଫଦାରୀ ବିଷୟରେ ସୂଚିତ କରାଯାଇଛି। ସାହାରନପୁର ରେଞ୍ଜ୍ ଡିଆଇଜି ଅଭିଷେକ ସିଂହ କହିଛନ୍ତି ଯେ ସ୍ଥାନୀୟ ପୋଲିସ କେନ୍ଦ୍ରୀୟ ଏଜେନ୍ସିଗୁଡ଼ିକୁ ସମସ୍ତ ପ୍ରକାର ସହଯୋଗ କରୁଛି। ମେରଠ ଜୋନ୍ ଏଡିଜି ଭାନୁ ଭାସ୍କରଙ୍କ ଅନୁସାରେ, କର୍ଣ୍ଣାଟକ ପୋଲିସର ସୂଚନା ପରେ ୟୁପି ଏଟିଏସ୍ ଓ ଏସଟିଏଫ୍ ସ୍ଥାନୀୟ ସ୍ତରରେ ମଧ୍ୟ ତଦନ୍ତ ଆରମ୍ଭ କରିଛି।

ସୁହେଲଙ୍କ ଗାଁ, ତାଙ୍କ ପରିଚିତ ଓ ସମ୍ପର୍କୀୟମାନଙ୍କୁ ପଚରାଉଚରା କରାଯାଉଥିବା ବେଳେ ଏହି ମାମଲାର ଅଧିକ ତଥ୍ୟ ଖୋଜାଯାଉଛି। ସୁରକ୍ଷା ଏଜେନ୍ସିମାନେ ଘଟଣାକୁ ଗୁରୁତ୍ୱର ସହ ନେଇ ତଦନ୍ତ ଜାରି ରଖିଛନ୍ତି।