ପୁରୀ:ସାପ ଧରିବାରେ ଥିଲେ ମାହିର। ବିଷାକ୍ତ ସାପକୁ ସହଜରେ କାବୁ କରି ଲୋକଙ୍କୁ ସହାୟତା କରୁଥିଲେ। କିନ୍ତୁ ନାଗ ସାପ ସହ ରିଲ୍ସ କରିବା ତାଙ୍କ ପାଇଁ ଶେଷରେ ମହଙ୍ଗା ପଡ଼ିଛି। ସାପ କାମୁଡ଼ାରେ ଚାଲିଯାଇଛି ତାଙ୍କ ଜୀବନ। ମୃତ ଯୁବକ ହେଉଛନ୍ତି ପୁରୀ ସଦର ଥାନା ଅନ୍ତର୍ଗତ କଣ୍ଠପୁର ଗ୍ରାମର ତପନ କୁମାର ପ୍ରଧାନ।

ଘର ବାରଣ୍ଡାରେ ନାଗ ସାପ ସହ କରୁଥିଲେ ରିଲ୍ସ

ଉପଲବ୍ଧ ସୂଚନା ଅନୁଯାୟୀ, ଶୁକ୍ରବାର ଅପରାହ୍ନରେ ତପନ ନିଜ ଘର ବାରଣ୍ଡାରେ ଏକ ନାଗ ସାପକୁ ଧରି ରିଲ୍ସ କରୁଥିଲେ। ଏହି ସମୟରେ ସାପଟି ତାଙ୍କ ହାତର ଆଙ୍ଗୁଠି, କହୁଣୀ ଓ ବାହୁରେ କାମୁଡ଼ିଥିଲା। ଏହାପରେ ତାଙ୍କ ସ୍ୱାସ୍ଥ୍ୟାବସ୍ଥା ଗୁରୁତର ହୋଇପଡ଼ିଥିଲା।

ହସ୍ପିଟାଲରେ ମୃତ ଘୋଷଣା

ପରିବାର ଲୋକେ ତପନଙ୍କୁ ପ୍ରଥମେ ଏକ ଘରୋଇ ହସ୍ପିଟାଲକୁ ନେଇଥିଲେ। ପରେ ତାଙ୍କୁ ପୁରୀ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନିଆଯାଇଥିଲା। ତେବେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।

ସାପ ଧରିବାରେ ଥିଲେ ଅଭିଜ୍ଞ

ପରିବାର ଲୋକଙ୍କ କହିବା ଅନୁଯାୟୀ, ତପନ ଜୀବନରେ ଅନେକ ସାପ ଧରିଥିଲେ। ଯେଉଁ ଘରେ ସାପ ପଶୁଥିଲା, ସେଠାରେ ପହଞ୍ଚି ସେ ସାପ ଧରିବାରେ ସହାୟତା କରୁଥିଲେ। ତାଙ୍କ ଇନଷ୍ଟାଗ୍ରାମ ଆଇଡିରେ ମଧ୍ୟ ସାପ ସହିତ ଅନେକ ରିଲ୍ସ ଓ ଭିଡିଓ ଅପଲୋଡ୍ ହୋଇଥିବା ଦେଖିବାକୁ ମିଳିଛି।

ଏହି ଘଟଣାକୁ ନେଇ ପୁରୀ ସଦର ଥାନା ପୁଲିସ ତଦନ୍ତ ଜାରି ରଖିଛି।

ସତର୍କତା:ନାଗ ସାପ ସମେତ ବିଷାକ୍ତ ସାପ ସହ ନିଜେ ଖେଳିବା, ଧରିବା କିମ୍ବା ଭିଡିଓ ଓ ରିଲ୍ସ ତିଆରି କରିବା ଜୀବନ ପ୍ରତି ଗୁରୁତର ବିପଦ ସୃଷ୍ଟି କରିପାରେ। ସାପ ଦେଖିଲେ ନିଜେ ଧରିବାକୁ ଚେଷ୍ଟା ନକରି ପ୍ରଶିକ୍ଷିତ ସାପ ଉଦ୍ଧାରକାରୀଙ୍କ ସହାୟତା ନିଅନ୍ତୁ।