ପୁରୀ: ପୁରୀ ଜିଲ୍ଲା ମୁଖ୍ୟ ଚିକିତ୍ସାଳୟରେ ରକ୍ତ ଦେବାକୁ ନେଇ ଉଠିଛି ଗୁରୁତର ଅଭିଯୋଗ। ଲ୍ୟୁକେମିଆରେ ପୀଡ଼ିତ ଜଣେ A-ପଜିଟିଭ୍ ରୋଗୀଙ୍କୁ B-ପଜିଟିଭ୍ ରକ୍ତ ଦିଆଯାଇଥିବା ପରିବାର ପକ୍ଷରୁ ଅଭିଯୋଗ ହୋଇଛି। ଭୁଲ୍ ରକ୍ତ ଦିଆଯିବା ପରେ ରୋଗୀଙ୍କ ଅବସ୍ଥା ଗୁରୁତର ହୋଇଥିବା ମଧ୍ୟ ପରିବାର ଅଭିଯୋଗ କରିଛି।

ସୂଚନା ଅନୁସାରେ, ପ୍ରଦର୍ଶିନୀ ପ୍ରଧାନ ନାମକ ଜଣେ ଲ୍ୟୁକେମିଆ ରୋଗୀଙ୍କ ରକ୍ତ ଗ୍ରୁପ୍ A-ପଜିଟିଭ୍। ରକ୍ତ ପରିମାଣ ଓ ହିମୋଗ୍ଲୋବିନ୍ କମିଯିବାରୁ ପରିବାର ତାଙ୍କୁ ପୁରୀ ଜିଲ୍ଲା ମୁଖ୍ୟ ଚିକିତ୍ସାଳୟକୁ ରକ୍ତ ଦେବା ପାଇଁ ଆଣିଥିଲେ।

ପରିବାରର କହିବା ଅନୁସାରେ, ସେପ୍ଟେମ୍ବର ୭ ତାରିଖରେ ତାଙ୍କୁ ଏକ ୟୁନିଟ୍ ରକ୍ତ ଦିଆଯାଇଥିଲା। ପରେ ସେପ୍ଟେମ୍ବର ୮ ଓ ୯ ତାରିଖରେ ମଧ୍ୟ ରକ୍ତ ଦିଆଯାଇଥିଲା। ଗୁରୁବାର ପୁଣି ରକ୍ତ ଦିଆଯାଉଥିବା ସମୟରେ ପରିବାର ଏହି ରକ୍ତ ଗ୍ରୁପ୍‌କୁ ନେଇ ଆପତ୍ତି ଉଠାଇଥିବା ଜଣାପଡ଼ିଛି।

A+ ବଦଳରେ B+ ରକ୍ତ ଦିଆଯାଇଥିବା ଅଭିଯୋଗ

ରୋଗୀଙ୍କ ପୁଅ ମାନସ ପ୍ରଧାନଙ୍କ ଅଭିଯୋଗ ଅନୁସାରେ, ତାଙ୍କ ମା’ଙ୍କ ରକ୍ତ ଗ୍ରୁପ୍ A-ପଜିଟିଭ୍ ହୋଇଥିବା ବେଳେ ବ୍ଲଡ୍ ବ୍ୟାଙ୍କ ପକ୍ଷରୁ B-ପଜିଟିଭ୍ ରକ୍ତ ଦିଆଯାଇଥିଲା।

ପରିବାରର ଦାବି ଅନୁସାରେ, ରକ୍ତ ଦିଆଯିବା ପରେ ପ୍ରଦର୍ଶିନୀଙ୍କ ଅବସ୍ଥା ଗୁରୁତର ହୋଇଥିଲା ଏବଂ ସେ ରକ୍ତ ବାନ୍ତି କରିଥିଲେ। ଏହାପରେ ତାଙ୍କୁ ଅଧିକ ଚିକିତ୍ସା ପାଇଁ ଭୁବନେଶ୍ୱରର ଏକ ଘରୋଇ ହସ୍ପିଟାଲକୁ ସ୍ଥାନାନ୍ତର କରାଯାଇଛି।

ଏହି ଘଟଣା ପରେ ବ୍ଲଡ୍ ବ୍ୟାଙ୍କରୁ ଭୁଲ୍ ରକ୍ତ ଗ୍ରୁପ୍ କିପରି ଜାରି ହେଲା ଏବଂ ରକ୍ତ ଦେବା ପୂର୍ବରୁ ରୋଗୀଙ୍କ ରକ୍ତ ଗ୍ରୁପ୍ ଠିକ୍ ଭାବେ ଯାଞ୍ଚ କରାଯାଇଥିଲା କି ନାହିଁ, ସେନେଇ ପ୍ରଶ୍ନ ଉଠିଛି।

CDMOଙ୍କ ତଦନ୍ତ ଆଶ୍ୱାସନ

ଘଟଣା ସମ୍ପର୍କରେ ପରିବାର ପକ୍ଷରୁ ଅଭିଯୋଗ ପରେ ଜିଲ୍ଲା ମୁଖ୍ୟ ଚିକିତ୍ସାଧିକାରୀ (CDMO) ଘଟଣାର ତଦନ୍ତ କରାଯାଇ ଆବଶ୍ୟକ ପଦକ୍ଷେପ ନିଆଯିବ ବୋଲି କହିଥିବା ସୂଚନା ମିଳିଛି।

ତେବେ ପ୍ରକୃତରେ ଭୁଲ୍ ରକ୍ତ ଦିଆଯାଇଥିଲା କି ନାହିଁ, ଏହା ପଛରେ ବ୍ଲଡ୍ ବ୍ୟାଙ୍କର ତ୍ରୁଟି ଥିଲା କି ରକ୍ତ ଦେବା ପ୍ରକ୍ରିୟାରେ ଅନ୍ୟ କୌଣସି ଅବହେଳା ହୋଇଥିଲା, ତାହା ତଦନ୍ତ ପରେ ସ୍ପଷ୍ଟ ହେବ।