ପୁରୀ: ପୁରୀ ଜିଲ୍ଲା ଚନ୍ଦନପୁର ଥାନା ଅଧୀନ ଉତ୍ତରଣ ମଠ ସାହିରେ ମଙ୍ଗଳବାର ଦୁଇ ଗୋଷ୍ଠୀ ମଧ୍ୟରେ ଭୟଙ୍କର ସଂଘର୍ଷ ଘଟିଛି। ଏହି ଘଟଣାରେ ଅତି କମ୍‌ରେ ୪ ଜଣ ଆହତ ହୋଇଥିବା ବେଳେ ଏକ ଚାଳ ଘରକୁ ନିଆଁ ଲଗାଇ ଦିଆଯାଇଛି। ଘଟଣା ପରେ ଅଞ୍ଚଳରେ ଉତ୍ତେଜନା ଓ ଭୟର ବାତାବରଣ ସୃଷ୍ଟି ହୋଇଥିଲା।

ସୂଚନା ଅନୁସାରେ, କୌଣସି ଏକ ବିବାଦକୁ ନେଇ ଦୁଇ ବିରୋଧୀ ଗୋଷ୍ଠୀ ମଧ୍ୟରେ ପ୍ରଥମେ ଯୁକ୍ତିତର୍କ ହୋଇଥିଲା। ପରେ ଏହା ଧୀରେ ଧୀରେ ଉଗ୍ର ରୂପ ନେଇଥିଲା। ଉଭୟ ପକ୍ଷର ଲୋକେ ପରସ୍ପରକୁ ଢେଲା ପଥର ମାଡ଼ କରିଥିବା ଅଭିଯୋଗ ହୋଇଛି।

ସଂଘର୍ଷ ମଧ୍ୟରେ କିଛି ଲୋକେ ଏକ ଚାଳ ଘରକୁ ନିଆଁ ଲଗାଇ ଦେଇଥିବା ଜଣାପଡ଼ିଛି। ଫଳରେ ଘଟଣାସ୍ଥଳରେ ଆତଙ୍କ ଖେଳିଯାଇଥିଲା। ଏହି ସଂଘର୍ଷରେ ୪ ଜଣ ଆହତ ହୋଇଥିବା ସୂଚନା ମିଳିଛି।

ଘଟଣାସ୍ଥଳରେ ପହଞ୍ଚିଲା ପୁଲିସ

ଖବର ପାଇ ଚନ୍ଦନପୁର ଥାନା ଆଇଆଇସି ଓ ଏସ୍‌ଡିପିଓଙ୍କ ସମେତ ବରିଷ୍ଠ ପୁଲିସ ଅଧିକାରୀମାନେ ଘଟଣାସ୍ଥଳରେ ପହଞ୍ଚିଥିଲେ। ପୁଲିସ ହସ୍ତକ୍ଷେପ କରି ଉଭୟ ଗୋଷ୍ଠୀକୁ ଶାନ୍ତ କରିବା ସହ ଅଞ୍ଚଳରେ ସ୍ଥିତି ସ୍ୱାଭାବିକ କରିଥିଲା।

ପୁଣିଥରେ ହିଂସାକାଣ୍ଡ ଘଟିବା ଆଶଙ୍କାରେ ଗାଁରେ ଭାରୀ ପୁଲିସ ଫୋର୍ସ ମୁତୟନ କରାଯାଇଛି। ବର୍ତ୍ତମାନ ସ୍ଥିତି ନିୟନ୍ତ୍ରଣରେ ଥିବା ପୁଲିସ ପକ୍ଷରୁ କୁହାଯାଇଛି।

ଆରମ୍ଭ ହେଲା ତଦନ୍ତ

ପଥରମାଡ଼ ଓ ନିଆଁ ଲଗାଇବା ଘଟଣାରେ କେଉଁମାନେ ସମ୍ପୃକ୍ତ ଥିଲେ, ତାହା ଚିହ୍ନଟ କରିବାକୁ ପୁଲିସ ତଦନ୍ତ ଆରମ୍ଭ କରିଛି। ଏହାସହ ଦୁଇ ଗୋଷ୍ଠୀ ମଧ୍ୟରେ ବିବାଦର ପ୍ରକୃତ କାରଣ କ'ଣ ଥିଲା, ସେନେଇ ମଧ୍ୟ ତଦନ୍ତ ଚାଲିଛି।

ପୁରୀ ଏସ୍‌ପି ପ୍ରତୀକ ସିଂହ ହିଂସାକାଣ୍ଡରେ ସମ୍ପୃକ୍ତ ଥିବା ସମସ୍ତଙ୍କ ବିରୋଧରେ କଠୋର ଆଇନଗତ କାର୍ଯ୍ୟାନୁଷ୍ଠାନ ନିଆଯିବ ବୋଲି ଆଶ୍ୱାସନ ଦେଇଛନ୍ତି।