ରକ୍ଷାବନ୍ଧନର ଖୁସି ମୁହୂର୍ତ୍ତ ଉତ୍ତରପ୍ରଦେଶର ଝାନ୍ସୀରେ ଶୋକରେ ପରିଣତ ହୋଇଛି। ଏକ ଦ୍ରୁତଗତି କାର୍ ରାସ୍ତାକଡ଼ରେ ଠିଆ ହୋଇଥିବା ଲୋକଙ୍କ ଭିଡ଼ ଉପରେ ମାଡ଼ିଯିବାରୁ ୨୪ ବର୍ଷୀୟା ପାଲକଙ୍କ ମୃତ୍ୟୁ ହୋଇଛି। ସେ ଦୁର୍ଘଟଣା ସମୟରେ ତିନି ମାସର ଗର୍ଭବତୀ ଥିଲେ।

ପାଲକ ଲଳିତପୁରର ବାସିନ୍ଦା ଥିବାବେଳେ ରକ୍ଷାବନ୍ଧନ ପାଳନ ପାଇଁ ଝାନ୍ସୀର ଖୁସିପୁରାସ୍ଥିତ ମାମୁଘରକୁ ଆସିଥିଲେ। ସୋମବାର ସେ ପରିବାର ସହ ମାମୁଘରେ ପହଞ୍ଚିଥିଲେ। ପରେ ପ୍ରାୟ ୧୦-୧୧ ଜଣ ପରିବାର ସଦସ୍ୟଙ୍କ ସହ ରାତିରେ ଏକ ରେଷ୍ଟୁରାଣ୍ଟକୁ ଖାଇବାକୁ ଯାଇଥିଲେ।

ଖାଇବା ପରେ ସମସ୍ତେ ରାସ୍ତାକଡ଼ରେ ଥିବା ଏକ ଆଇସକ୍ରିମ୍ ଗାଡ଼ି ନିକଟରେ ଠିଆ ହୋଇଥିଲେ। ଏହି ସମୟରେ ଏକ ଦ୍ରୁତଗତି କାର୍ ହଠାତ୍ ଆସି ଆଇସକ୍ରିମ୍ ଗାଡ଼ି ସମେତ ସେଠାରେ ଥିବା ଲୋକଙ୍କୁ ଧକ୍କା ଦେଇଥିଲା। ଦୁର୍ଘଟଣାରେ ପ୍ରାୟ ୧୧ ଜଣ ଆହତ ହୋଇଥିଲେ।

ପାଲକ ଗୁରୁତର ଆହତ ହେବା ପରେ ତାଙ୍କୁ ହସ୍ପିଟାଲ ନିଆଯାଇଥିଲା। ତେବେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିଲା। ପାଲକଙ୍କ ବିବାହ ୨୦୨୫ ଏପ୍ରିଲ ୩୦ରେ ବିକ୍ରାନ୍ତ ସିଂହ ବାଘେଲଙ୍କ ସହ ହୋଇଥିଲା।

ପରିବାରର ଅଭିଯୋଗ ଅନୁସାରେ, କାର୍‌ରେ ୪ରୁ ୫ ଜଣ ଥିଲେ ଏବଂ ଗାଡ଼ିଟି ଅତ୍ୟଧିକ ବେଗରେ ଆସୁଥିଲା। ଧକ୍କା ପରେ କାର୍‌ଟି ଓଲଟି ପଡ଼ିଥିଲା ଏବଂ ଏଥିରେ ଥିବା କିଛି ଲୋକ ଘଟଣାସ୍ଥଳରୁ ଖସିଯିବାକୁ ଚେଷ୍ଟା କରିଥିବା ପରିବାର ପକ୍ଷରୁ କୁହାଯାଇଛି।

କାର୍‌ଟି ପର୍ଶୁରାମ ଚୌକ ନିକଟରେ ଏକ ଇ-ରିକ୍ସା, କାର୍ ଓ କିଛି ମୋଟରସାଇକେଲକୁ ମଧ୍ୟ ଧକ୍କା ଦେଇଥିଲା। ଆଇସକ୍ରିମ୍ ବିକ୍ରେତା ମଧ୍ୟ ଗୁରୁତର ଆହତ ହୋଇଥିଲେ।

ସୂଚନା ପାଇ ପୁଲିସ ଘଟଣାସ୍ଥଳରେ ପହଞ୍ଚି ସ୍ଥାନୀୟ ଲୋକଙ୍କ ସହାୟତାରେ ଆହତମାନଙ୍କୁ ହସ୍ପିଟାଲ ପଠାଇଥିଲା। ପୁଲିସ ଅଧିକାରୀ ରବି ଶ୍ରୀବାସ୍ତବଙ୍କ ଅନୁସାରେ, ଅଭିଯୁକ୍ତ କାର୍ ଚାଳକ ଶିବାନଙ୍କୁ ମ୍ୟୁନିସିପାଲ କର୍ପୋରେସନ୍ ଗେଟ୍ ନିକଟରୁ ଗିରଫ କରାଯାଇଛି। ପାଲକଙ୍କ ମୃତଦେହର ପଞ୍ଚନାମା ପରେ ପୋଷ୍ଟମର୍ଟମ୍ ପାଇଁ ପଠାଯାଇଛି। ଘଟଣାର ଅଧିକ ତଦନ୍ତ ଜାରି ରହିଛି।