ଫ୍ରାନ୍ସର ଲୁର୍ଦ୍ଦରେ ପୋପ୍ ଲିଓ XIVଙ୍କ ଚାରିଦିନିଆ ଫ୍ରାନ୍ସ ଗସ୍ତର ଏକ ପ୍ରମୁଖ ଅଧ୍ୟାୟ ସାମ୍ନାକୁ ଆସିଛି। ଲୁର୍ଦ୍ଦରେ ମାସ୍ ସମୟରେ ପୋପ୍ ଲିଓ ଚିକିତ୍ସାଜନିତ ସହାୟତାରେ ମୃତ୍ୟୁକୁ ‘false compassion’ ବା ‘ମିଥ୍ୟା କରୁଣା’ ଭାବେ ସମାଲୋଚନା କରିଥିଲେ। ଏହା କ୍ୟାଥୋଲିକ୍ ଚର୍ଚ୍ଚର ଜୀବନର ସୁରକ୍ଷା ସମ୍ପର୍କିତ ଦୀର୍ଘଦିନର ମତକୁ ପୁଣିଥରେ ସ୍ପଷ୍ଟ କରିଛି। ଫ୍ରାନ୍ସରେ ଅସାଧ୍ୟ ରୋଗରେ ପୀଡ଼ିତ କିଛି ବୟସ୍କଙ୍କ ପାଇଁ ଲେଥାଲ୍ ମେଡିକେସନ୍ ସମ୍ପର୍କିତ ଆଇନ ନେଇ ଚର୍ଚ୍ଚା ମଧ୍ୟରେ ଏହି ବାର୍ତ୍ତା ଆସିଛି।

ଏହା ସହିତ ପୋପ୍ ଲିଓ XIV ଲୁର୍ଦ୍ଦରେ କ୍ୟାଥୋଲିକ୍ ପାଦ୍ରୀ ଓ ଚର୍ଚ୍ଚ ସଂସ୍ଥା ସହ ଜଡ଼ିତ ଯୌନ ନିର୍ଯାତନାର ସାତଜଣ ପୀଡ଼ିତଙ୍କୁ ଭେଟିଥିଲେ। ଭାଟିକାନ୍ ଅନୁସାରେ, ପ୍ରାୟ ଦୁଇ ଘଣ୍ଟା ଧରି ହୋଇଥିବା ଏହି ବୈଠକରେ ପୋପ୍ ପ୍ରତ୍ୟେକଙ୍କୁ ଅଲଗା ଭାବେ ଭେଟି ସେମାନଙ୍କ ଅନୁଭବ, ଯନ୍ତ୍ରଣା ଓ ଭବିଷ୍ୟତରେ ଏପରି ଘଟଣା ରୋକିବା ପାଇଁ ପ୍ରସ୍ତାବ ଶୁଣିଥିଲେ। ସେ ଏପରି ଘଟଣା ପୁଣି ନଘଟିବା ପାଇଁ ଚର୍ଚ୍ଚର ପ୍ରତିବଦ୍ଧତା ଦୋହରାଇଥିଲେ।

ଫ୍ରେଞ୍ଚ କ୍ୟାଥୋଲିକ୍ ଚର୍ଚ୍ଚରେ ଯୌନ ନିର୍ଯାତନା ମାମଲାକୁ ନେଇ ଦୀର୍ଘଦିନ ଧରି ତଦନ୍ତ, କ୍ଷତିପୂରଣ ଓ ସୁରକ୍ଷା ବ୍ୟବସ୍ଥାକୁ ନେଇ ଚର୍ଚ୍ଚା ଚାଲିଛି। ପୋପ୍ ଲିଓ ଫ୍ରେଞ୍ଚ ବିଶପମାନଙ୍କୁ ଏହି ମାମଲାରେ ସର୍ବାଧିକ ସତର୍କତା ଓ ପ୍ରତିରୋଧମୂଳକ ପଦକ୍ଷେପ ଜାରି ରଖିବାକୁ କହିଥିବା ଭାଟିକାନ୍ ଜଣାଇଛି।

ଲୁର୍ଦ୍ଦ ଗସ୍ତରେ ଜୀବନର ମର୍ଯ୍ୟାଦା, ଦୁର୍ବଳ ଓ ଅସୁସ୍ଥ ଲୋକଙ୍କ ସୁରକ୍ଷା ସହିତ ଚର୍ଚ୍ଚର ଅତୀତର ନିର୍ଯାତନା ଘଟଣାରୁ ଶିକ୍ଷା ନେବା ଭଳି ବିଷୟ ଉପରେ ପୋପ୍ଙ୍କ ମତ ସାମ୍ନାକୁ ଆସିଛି।