ତିନି ଦେଶ ଗସ୍ତର ଅଂଶ ଭାବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଅଷ୍ଟ୍ରେଲିଆର ମେଲବୋର୍ଣ୍ଣରେ ପହଞ୍ଚି ସିଇଓ ଫୋରମକୁ ସମ୍ବୋଧିତ କରିଛନ୍ତି। ଏହି ଅବସରରେ ସେ ଭାରତକୁ ବିଶ୍ୱର ସବୁଜ ଶକ୍ତି (Green Energy) କେନ୍ଦ୍ରରେ ପରିଣତ କରିବା ଦିଗରେ ସରକାରଙ୍କ ଦୃଢ଼ ସଂକଳ୍ପ ବିଷୟରେ ଉଲ୍ଲେଖ କରିଛନ୍ତି।

ପ୍ରଧାନମନ୍ତ୍ରୀ କହିଛନ୍ତି ଯେ ଭାରତ ଜଳବିଦ୍ୟୁତ, ସବୁଜ ହାଇଡ୍ରୋଜେନ, ସୌର ମଡ୍ୟୁଲ ଓ ପବନ ଟର୍ବାଇନ ଉତ୍ପାଦନ ପାଇଁ ଏକ ମଜବୁତ ଉତ୍ପାଦନ ଇକୋସିଷ୍ଟମ ଗଢ଼ି ତୋଳୁଛି। ସେ କହିଛନ୍ତି ଯେ ୨୦୩୦ ସୁଦ୍ଧା ୫୦୦ ଗିଗାୱାଟ ନବୀକରଣଯୋଗ୍ୟ ଶକ୍ତି କ୍ଷମତା ହାସଲ କରିବା ସହ ୨୦୭୦ ସୁଦ୍ଧା ନେଟ୍-ଜିରୋ ନିର୍ଗମନ ଲକ୍ଷ୍ୟ ପୂରଣ କରିବା ପାଇଁ ଭାରତ କାର୍ଯ୍ୟ କରୁଛି।

ସେ ଆହୁରି କହିଛନ୍ତି ଯେ ୨୦୪୭ ସୁଦ୍ଧା ୧୦୦ ଗିଗାୱାଟ ପରମାଣୁ ଶକ୍ତି କ୍ଷମତା ହାସଲ କରିବା ଭାରତର ଦୀର୍ଘମିଆଦି ଲକ୍ଷ୍ୟ। ଏଥିରେ ଅଷ୍ଟ୍ରେଲିଆର ୟୁରାନିୟମ ଭଣ୍ଡାର ଓ ପ୍ରଯୁକ୍ତିଗତ ଦକ୍ଷତା ଭାରତ ପାଇଁ ସହାୟକ ହୋଇପାରିବ ବୋଲି ସେ କହିଛନ୍ତି।

ପ୍ରଧାନମନ୍ତ୍ରୀ ମୋଦୀ ଅଷ୍ଟ୍ରେଲିଆର ନିବେଶକମାନଙ୍କୁ ଭାରତର ବନ୍ଦର, ବିମାନବନ୍ଦର, ରାସ୍ତା, ରେଳ, ସହରାଞ୍ଚଳ ଭିତ୍ତିଭୂମି, ସ୍ୱଚ୍ଛ ଶକ୍ତି, ଲଜିଷ୍ଟିକ୍ସ, କୃତ୍ରିମ ବୁଦ୍ଧିମତ୍ତା (AI), ଫିନଟେକ୍, ଖାଦ୍ୟ ପ୍ରକ୍ରିୟାକରଣ ଓ ଡିଜିଟାଲ୍ ଅର୍ଥନୀତି କ୍ଷେତ୍ରରେ ଦୀର୍ଘମିଆଦି ନିବେଶ ପାଇଁ ଆମନ୍ତ୍ରଣ କରିଛନ୍ତି।

ସେ କହିଛନ୍ତି ଯେ ଭାରତ ଓ ଅଷ୍ଟ୍ରେଲିଆର ଅର୍ଥନୀତି ପରସ୍ପରର ପରିପୂରକ। ଭାରତର ବିଶାଳ ବଜାର ଓ ଅଷ୍ଟ୍ରେଲିଆର ପ୍ରଯୁକ୍ତିଗତ ଦକ୍ଷତା ମିଳି ଉଭୟ ଦେଶ ପାଇଁ ଲାଭଦାୟକ ସହଭାଗିତା ସୃଷ୍ଟି କରିପାରିବ।

ପ୍ରାୟ ୨୦୦ରୁ ଅଧିକ ଅଷ୍ଟ୍ରେଲିଆନ୍ ବ୍ୟବସାୟ ନେତାଙ୍କୁ ସମ୍ବୋଧିତ କରି ପ୍ରଧାନମନ୍ତ୍ରୀ ଭାରତ-ଅଷ୍ଟ୍ରେଲିଆ ବାଣିଜ୍ୟ ସମ୍ପର୍କକୁ ଆହୁରି ସୁଦୃଢ଼ କରିବା ପାଇଁ ବ୍ୟାପକ ଆର୍ଥିକ ସହଯୋଗ ଚୁକ୍ତି (CECA) ଶୀଘ୍ର ସମ୍ପନ୍ନ କରିବା ଉପରେ ଜୋର ଦେଇଥିଲେ। ସେ ରେୟାର ଆର୍ଥ, ଲିଥିୟମ, ବ୍ୟାଟେରୀ, ବୈଦ୍ୟୁତିକ ଯାନ, AI ଓ ପ୍ରତିରକ୍ଷା କ୍ଷେତ୍ରରେ ମିଳିତ ନିବେଶ ପାଇଁ ଆହ୍ୱାନ କରିଥିଲେ।

ଏହି ଅବସରରେ ଅଷ୍ଟ୍ରେଲିଆର ସର୍ବବୃହତ ପେନସନ୍ ଫଣ୍ଡ AustralianSuper ଭାରତରେ ୫୦୦ ମିଲିୟନ୍ ଡଲାର ନିବେଶ କରିବାକୁ ଘୋଷଣା କରିଛି। ପ୍ରଧାନମନ୍ତ୍ରୀ ମୋଦୀ ଏହି ନିବେଶକୁ ସ୍ୱାଗତ କରି କହିଛନ୍ତି ଯେ ଏହା ଭାରତର ଅର୍ଥନୀତି ଉପରେ ବିଶ୍ୱ ନିବେଶକଙ୍କ ବିଶ୍ୱାସର ଆଉ ଏକ ପ୍ରମାଣ।