ଗାଜା ଯୁଦ୍ଧ ପରେ ସେ ପାଲେଷ୍ଟାଇନ୍‌ ସମର୍ଥକ ଆନ୍ଦୋଳନରେ ସକ୍ରିୟ ଥିଲେ ଏବଂ ନିଜକୁ ବିଭିନ୍ନ ସମୟରେ ପାଲେଷ୍ଟାଇନୀ, ଟ୍ୟୁନିସିଆନ୍‌ ଓ ବ୍ଲାକ୍‌ ପରିଚୟ ସହ ଯୋଡ଼ିଥିବା ଅଭିଯୋଗ ହୋଇଥିଲା। ପରେ ସାମାଜିକ କର୍ମୀମାନଙ୍କ ପ୍ରଶ୍ନର ସମ୍ମୁଖୀନ ହେବା ପରେ ଗାନ୍‌ ନିଜେ ନିଜ ପରିଚୟ ସମ୍ପର୍କରେ ମିଥ୍ୟା କହିଥିବା ସ୍ୱୀକାର କରିଛନ୍ତି। 

ଫିଲାଡେଲଫିଆର The Workshop Schoolରେ ଶିକ୍ଷୟିତ୍ରୀ ଭାବେ କାମ କରୁଥିବା ହାନା ଗାନ୍‌ ପାଲେଷ୍ଟାଇନ୍‌ ସମର୍ଥକ ଆନ୍ଦୋଳନରେ ଦୀର୍ଘ ସମୟ ଧରି ସକ୍ରିୟ ଥିଲେ। ୨୦୨୪ରେ ଗାଜାରେ ଶିକ୍ଷା ଭିତ୍ତିଭୂମିର ଧ୍ୱଂସକୁ ନେଇ ଆୟୋଜିତ ଏକ teach-in କାର୍ଯ୍ୟକ୍ରମରେ ମଧ୍ୟ ସେ ଅଂଶଗ୍ରହଣ କରିଥିଲେ। ସେହି ସମୟର କାର୍ଯ୍ୟକ୍ରମ ସାମଗ୍ରୀରେ ତାଙ୍କୁ Palestinian American ଭାବେ ପରିଚୟ କରାଯାଇଥିବା ରିପୋର୍ଟ ରହିଛି। 

ସମ୍ପ୍ରତି Philly Educators for Palestine ଓ Racial Justice Organizing Committeeର ସଦସ୍ୟମାନେ ତାଙ୍କ ପରିବାରିକ ପୃଷ୍ଠଭୂମି ନେଇ ପ୍ରଶ୍ନ କରିଥିଲେ। ସଂଗଠନଗୁଡ଼ିକର କହିବା ଅନୁସାରେ, ଆଲୋଚନା ପରେ ଗାନ୍‌ ନିଜ ପରିଚୟ ସମ୍ପର୍କରେ ମିଥ୍ୟା କହିଥିବା ସ୍ୱୀକାର କରିଥିଲେ। ସେ ନିଜକୁ “significant privilege and wealth” ଥିବା ଜଣେ ଧଳା ମହିଳା ବୋଲି କହିଛନ୍ତି ଏବଂ ନିଜର ପାଲେଷ୍ଟାଇନୀ କିମ୍ବା ଟ୍ୟୁନିସିଆନ୍‌ ବଂଶଧରା ନଥିବା ସ୍ୱୀକାର କରିଛନ୍ତି। 

ରିପୋର୍ଟ ଅନୁସାରେ, ଗାନ୍‌ଙ୍କୁ ବ୍ଲାକ୍‌ ଓ ପାଲେଷ୍ଟାଇନୀ ପରିଚୟ ଦାବି କରିଥିବା ନେଇ ମଧ୍ୟ ଅଭିଯୋଗ ହୋଇଛି। ତାଙ୍କ ସହ କାମ କରୁଥିବା ଦୁଇଟି ସଂଗଠନ ଘଟଣା ପରେ ତାଙ୍କଠାରୁ ଦୂରେଇ ଯାଇଥିବା ଜଣାପଡ଼ିଛି। ସେମାନଙ୍କ କହିବା ଅନୁସାରେ, ଏହି ଘଟଣା ପାଲେଷ୍ଟାଇନୀ, ବ୍ଲାକ୍‌ ସମୁଦାୟ ଓ ଯୁବପିଢ଼ି ସହିତ ଜଡ଼ିତ ଲୋକଙ୍କ ମଧ୍ୟରେ ବିଶ୍ୱାସକୁ ପ୍ରଭାବିତ କରିଛି। 

ଗାନ୍‌ ନିଜ ଭିଡିଓ ବାର୍ତ୍ତାରେ କହିଛନ୍ତି ଯେ ସେ ନିଜ ପରିବାରର ପୃଷ୍ଠଭୂମିକୁ ଲୁଚାଇଥିଲେ ଏବଂ ଅର୍ଦ୍ଧସତ୍ୟ ଧୀରେ ଧୀରେ ମିଥ୍ୟାରେ ପରିଣତ ହୋଇଥିଲା। ତେବେ ନିଜର ପରିଚୟ ସମ୍ପର୍କରେ ମିଥ୍ୟା କହିଥିବା ସତ୍ତ୍ୱେ ପାଲେଷ୍ଟାଇନ୍‌ ସମ୍ପର୍କରେ ତାଙ୍କ ଆନ୍ଦୋଳନ ଓ ସମର୍ଥନ ବାସ୍ତବ ଥିଲା ବୋଲି ସେ ଦାବି କରିଛନ୍ତି। 

ଏହି ଘଟଣାକୁ ନେଇ ଫିଲାଡେଲଫିଆ ସ୍କୁଲ ଡିଷ୍ଟ୍ରିକ୍ଟ କହିଛି ଯେ ସେମାନେ ସମ୍ପୃକ୍ତ କର୍ମଚାରୀଙ୍କ ସୋସିଆଲ୍‌ ମିଡିଆ ପୋଷ୍ଟ ବିଷୟରେ ଅବଗତ ଅଛନ୍ତି। ଛାତ୍ରଛାତ୍ରୀ ଓ କର୍ମଚାରୀଙ୍କ ଆବଶ୍ୟକତା ଅନୁସାରେ ସହାୟତା ଯୋଗାଇ ଦିଆଯାଉଥିବା ବେଳେ ବ୍ୟକ୍ତିଗତ କର୍ମଚାରୀ ସମ୍ପର୍କିତ ବିଷୟରେ ମତାମତ ଦେବାକୁ ଡିଷ୍ଟ୍ରିକ୍ଟ ମନା କରିଛି।