ଜଗତସିଂହପୁର ଜିଲ୍ଲାର ପାରାଦୀପ ସହରରେ ପୌରସଂସ୍ଥା ଅଧ୍ୟକ୍ଷ ବସନ୍ତ ବିଶ୍ୱାଳଙ୍କ ବାସଭବନ ଉପରେ କଥିତ ବୋମାମାଡ଼ ଘଟଣାକୁ ନେଇ ରାଜନୈତିକ ବିବାଦ ତୀବ୍ର ହୋଇଛି। ଏହି ଘଟଣା ପରେ ବିଭିନ୍ନ ରାଜନୈତିକ ଦଳ ପକ୍ଷରୁ ଅଭିଯୋଗ ଓ ପ୍ରତ୍ୟାରୋପର ପର୍ବ ଆରମ୍ଭ ହୋଇଛି।
ପାରାଦୀପ ବିଜୁ ଜନତା ଦଳ (ବିଜେଡି)ର ସ୍ଥାନୀୟ ନେତାମାନେ ଏହି ଘଟଣାରେ ଜଗତସିଂହପୁର ଜିଲ୍ଲା ବିଜେଡି ଉପସଭାପତି ବାପୁ ପରିଡ଼ା ଓ ବିଜେଡି ନେତା ବାପି ସରଖେଲଙ୍କ ସମ୍ପୃକ୍ତି ଥିବା ଅଭିଯୋଗ କରିଛନ୍ତି।
ଏହି ଦୁଇ ନେତାଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଦାବି କରି ବିଜେଡି, ବିଜେପି, କଂଗ୍ରେସ, ଭାରତୀୟ କମ୍ୟୁନିଷ୍ଟ ପାର୍ଟି (ସିପିଆଇ) ଓ ପାରାଦୀପ ସିଟିଜେନ୍ସ ଫୋରମ୍ର ପ୍ରତିନିଧିମାନେ ମିଳିତ ଭାବେ ଅତିରିକ୍ତ ଏସ୍ପିଙ୍କୁ ଏକ ସ୍ମାରକପତ୍ର ପ୍ରଦାନ କରିଛନ୍ତି।
ଏହି ଘଟଣାର ବିଶେଷତ୍ୱ ହେଉଛି, ସାଧାରଣତଃ ପରସ୍ପର ବିରୋଧୀ ରାଜନୈତିକ ଦଳମାନେ ଏକାଠି ହୋଇ ତଦନ୍ତ ଦାବି କରିବା, ଯାହା ସମଗ୍ର ଘଟଣାକୁ ଅଧିକ ଚର୍ଚ୍ଚିତ କରିଛି।
ସ୍ଥାନୀୟ ବିଜେପି ନେତା ସୁବ୍ରତ ପ୍ରଧାନ ଅଭିଯୋଗ କରିଛନ୍ତି ଯେ ବାପି ସରଖେଲ ଏହି ବୋମାମାଡ଼ ଘଟଣାର ମୁଖ୍ୟ ଷଡ଼ଯନ୍ତ୍ରକାରୀ। ତାଙ୍କ କହିବା ଅନୁସାରେ, ମୁଖ୍ୟ ଅଭିଯୁକ୍ତ ବାପୁ ପରିଡ଼ା, ବାପି ସରଖେଲ ଏବଂ ଅନ୍ୟ କିଛି ବ୍ୟକ୍ତି ନୂଆ ବଜାରସ୍ଥିତ ଏକ କାର୍ଯ୍ୟାଳୟରେ ବସି ଘଟଣାର ଯୋଜନା ପ୍ରସ୍ତୁତ କରିଥିଲେ। ସେ ସିସିଟିଭି ଫୁଟେଜକୁ ତଦନ୍ତ ପରିସରକୁ ଆଣିବା ଓ ବାପି ସରଖେଲଙ୍କୁ ଗିରଫ କରିବାକୁ ଦାବି କରିଛନ୍ତି।
ଏପଟେ ପୋଲିସ ଘଟଣାର ତଦନ୍ତକୁ ତ୍ୱରାନ୍ୱିତ କରିଛି। ପାରାଦୀପ ଅତିରିକ୍ତ ଏସ୍ପି ଅଜିଙ୍କ୍ୟ ମାନେ କହିଛନ୍ତି ଯେ ତଦନ୍ତ ପାଇଁ ଏକାଧିକ ଟିମ୍ ଗଠନ କରାଯାଇଛି। ତଦନ୍ତରେ ଯାହାଙ୍କ ସମ୍ପୃକ୍ତି ପ୍ରମାଣିତ ହେବ, ସେମାନଙ୍କ ବିରୋଧରେ ଆଇନଗତ ପଦକ୍ଷେପ ନିଆଯିବ।
ଅନ୍ୟପକ୍ଷରେ ବିଜେଡି ନେତା ବାପି ସରଖେଲ ସମସ୍ତ ଅଭିଯୋଗକୁ ଖଣ୍ଡନ କରିଛନ୍ତି। ଏକ ସାମ୍ବାଦିକ ସମ୍ମିଳନୀରେ ସେ କହିଛନ୍ତି ଯେ ପାରାଦୀପରେ ଦୁର୍ନୀତି ଉଜାଗର କରିବାରୁ ତାଙ୍କୁ ଫସାଇବା ପାଇଁ ଏହା ଏକ ଷଡ଼ଯନ୍ତ୍ର।
ସେ ଶିଳ୍ପମନ୍ତ୍ରୀ ତଥା ପାରାଦୀପ ବିଧାୟକ ସମ୍ପଦ ଚନ୍ଦ୍ର ସ୍ୱାଇଁଙ୍କ ଉପରେ ମଧ୍ୟ ପରୋକ୍ଷ ଭାବେ ଅଭିଯୋଗ ଆଣି ରାଜନୈତିକ ଉଦ୍ଦେଶ୍ୟରେ ତାଙ୍କୁ ଟାର୍ଗେଟ୍ କରାଯାଉଥିବା କହିଛନ୍ତି।
ବାପି ସରଖେଲ ଆହୁରି କହିଛନ୍ତି ଯେ ସେ ମାଟି ଚୋରି, ବାଲି ଚୋରି, ତେଲ ଚୋରି ଓ ଚାକିରି ନାଁରେ ଟଙ୍କା ଆଦାୟ ଭଳି କାର୍ଯ୍ୟର ବିରୋଧ କରି ଆସୁଛନ୍ତି। ସେହି କାରଣରୁ ତାଙ୍କୁ ବଦନାମ କରିବା ପାଇଁ ଏହି ଷଡ଼ଯନ୍ତ୍ର କରାଯାଇଥିବା ଦାବି କରିଛନ୍ତି।
ଘଟଣାକୁ ନେଇ ପାରାଦୀପରେ ରାଜନୈତିକ ଉଷ୍ମତା ବଢ଼ିଥିବା ବେଳେ ପୋଲିସ ତଦନ୍ତର ଫଳାଫଳକୁ ନେଇ ସମସ୍ତଙ୍କ ନଜର ରହିଛି।
ପିତାମାତାଙ୍କ ସମ୍ପତ୍ତିକୁ ନେଇ ଚାଲିଥିବା ଏକ ବିବାଦରେ ସୁପ...
ପ୍ରାୟ ୫ ବର୍ଷ ଧରି ଚାଲିଥିବା IDBI ବ୍ୟାଙ୍କର ଘରୋଇକରଣ ପ୍...
ସୁନ୍ଦରଗଡ଼ ଜିଲ୍ଲା ବଣାଇରେ ଶନିବାର ସକାଳେ ପାଣିପାଗର ଏକ ଅ...
ଉତ୍ତରପ୍ରଦେଶରେ ଶ୍ରମିକ ଓ ଅନ୍ୟାନ୍ୟ ଦୁର୍ବଳ ପରିବାରର ପିଲ...
ଓଡ଼ିଶା ସମେତ ୫ଟି ରାଜ୍ୟର ରେଳ ଯୋଗାଯୋଗକୁ ଆହୁରି ମଜବୁତ କ...
ଲଗାଣ ବର୍ଷା ପରେ ବିହାରରେ ବନ୍ୟା ପରିସ୍ଥିତି ଆହୁରି ଗମ୍ଭୀ...
