ଓଡ଼ିଶାରେ ତମାଖୁ ଓ ନିକୋଟିନ୍‌ ଯୁକ୍ତ ଖାଦ୍ୟ ଉତ୍ପାଦ ଉପରେ ଲାଗିଥିବା ନିଷେଧକୁ ନେଇ ମାମଲା ଏବେ ହାଇକୋର୍ଟରେ ପହଞ୍ଚିଛି। ଏହି ନିଷେଧକୁ ଚ୍ୟାଲେଞ୍ଜ କରି ଦାଏର ହୋଇଥିବା ରିଟ୍‌ ଅପିଲ୍‌ ଉପରେ ଶୁଣାଣି କରି ଓଡ଼ିଶା ସରକାରଙ୍କୁ ଜବାବ ଦେବାକୁ ନୋଟିସ୍‌ ଜାରି କରିଛନ୍ତି ଓଡ଼ିଶା ହାଇକୋର୍ଟ।

ମୁଖ୍ୟ ବିଚାରପତି ହରିଶ ଟଣ୍ଡନ ଏବଂ ବିଚାରପତି ଚିତ୍ତରଞ୍ଜନ ଦାଶଙ୍କୁ ନେଇ ଗଠିତ ଖଣ୍ଡପୀଠ ଏହି ନୋଟିସ୍‌ ଜାରି କରିଛନ୍ତି। ଅକ୍ଟୋବର ୧୨ରେ ମାମଲାର ପରବର୍ତ୍ତୀ ଶୁଣାଣି ହେବ।

ଏହି ରିଟ୍‌ ଅପିଲ୍‌ କଟକର ଜଣେ ତମାଖୁ ଉତ୍ପାଦ ନିର୍ମାତା କମ୍ପାନୀ ପକ୍ଷରୁ ଦାଏର କରାଯାଇଛି। କମ୍ପାନୀ ପକ୍ଷରୁ ଅଗଷ୍ଟ ୨୧ରେ ହାଇକୋର୍ଟଙ୍କ ଏକକ ଖଣ୍ଡପୀଠ ଦେଇଥିବା ରାୟକୁ ଚ୍ୟାଲେଞ୍ଜ କରାଯାଇଛି। ସେହି ରାୟରେ ରାଜ୍ୟ ସରକାରଙ୍କ ତମାଖୁ ଓ ନିକୋଟିନ୍‌ ଯୁକ୍ତ ଖାଦ୍ୟ ଉତ୍ପାଦ ନିଷେଧ ସମ୍ପର୍କିତ ନୋଟିଫିକେସନ୍‌କୁ ବଜାୟ ରଖାଯାଇଥିଲା।

୨୦୨୬ ଜାନୁଆରୀ ୨୧ରେ ଓଡ଼ିଶା ସରକାରଙ୍କ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ଜାରି ନୋଟିଫିକେସନ୍‌ରେ ତମାଖୁ କିମ୍ବା ନିକୋଟିନ୍‌କୁ ଉପାଦାନ ଭାବେ ଧାରଣ କରୁଥିବା ଖାଦ୍ୟ ଉତ୍ପାଦର ଉତ୍ପାଦନ, ପ୍ରକ୍ରିୟାକରଣ, ପ୍ୟାକେଜିଂ, ମହଜୁଦ, ପରିବହନ, ବଣ୍ଟନ ଓ ବିକ୍ରି ଉପରେ ନିଷେଧ ଲଗାଯାଇଥିଲା। ଏଥିରେ ଗୁଟ୍‌ଖା, ପାନ୍‌ ମସଲା ଏବଂ ଫ୍ଲେଭର୍‌ଡ୍‌, ସୁଗନ୍ଧିତ କିମ୍ବା ଅନ୍ୟ ଆଡିଟିଭ୍‌ ମିଶ୍ରିତ ଚୋବାଇବା ଯୋଗ୍ୟ ଉତ୍ପାଦ ମଧ୍ୟ ଅନ୍ତର୍ଭୁକ୍ତ।

ଅପିଲ୍‌କାରୀଙ୍କ ମୁଖ୍ୟ ଯୁକ୍ତି ହେଉଛି, Food Safety and Standards Act (FSSA), 2006 ଅନୁଯାୟୀ ଚୋବାଇବା ତମାଖୁକୁ ‘ଖାଦ୍ୟ’ ଭାବେ ବର୍ଗୀକରଣ କରାଯାଇପାରିବ ନାହିଁ। ଆବେଦନକାରୀ ପକ୍ଷ ଦାବି କରିଛନ୍ତି ଯେ ଆଇନରେ ଥିବା ‘food’ର ପରିଭାଷାକୁ ପ୍ରଶାସନିକ ବ୍ୟାଖ୍ୟା ମାଧ୍ୟମରେ ବଢ଼ାଯାଇପାରିବ ନାହିଁ।

ଅନ୍ୟପକ୍ଷରେ, ପୂର୍ବ ରାୟରେ ହାଇକୋର୍ଟ ତମାଖୁ ଓ ନିକୋଟିନ୍‌ ଯୁକ୍ତ ଉତ୍ପାଦ ଉପରେ ନିଷେଧର ସାର୍ବଜନୀନ ସ୍ୱାସ୍ଥ୍ୟ ସହିତ ସମ୍ପର୍କ ଥିବା ଦର୍ଶାଇଥିଲେ। ତେବେ ନିଷେଧକୁ ସମସ୍ତ ପ୍ରକାର ତମାଖୁ ଉତ୍ପାଦ ଉପରେ ଏକ ‘blanket ban’ ଭାବେ ବୁଝାଯିବ ନାହିଁ ବୋଲି ରାୟରେ ସ୍ପଷ୍ଟ କରାଯାଇଥିଲା।

ଏବେ ରାଜ୍ୟ ସରକାରଙ୍କ ଜବାବ ପରେ ମାମଲାର ପରବର୍ତ୍ତୀ ଆଇନଗତ ସ୍ଥିତି ସ୍ପଷ୍ଟ ହେବ। ଅକ୍ଟୋବର ୧୨ର ଶୁଣାଣି ଉପରେ ଏହି ମାମଲାର ପରବର୍ତ୍ତୀ ଗତିପଥ ନିର୍ଭର କରିବ।