ସଂସଦର ମୌସୁମୀ ଅଧିବେଶନର ତୃତୀୟ ଦିନ ବୁଧବାର ବିରୋଧୀ ସାଂସଦମାନେ କଳା ପୋଷାକ ପିନ୍ଧି ସଂସଦ ପରିସରରେ ପ୍ରତିବାଦ କରିଛନ୍ତି। ଛାତ୍ରମାନଙ୍କ ପ୍ରତି ହୋଇଥିବା ବ୍ୟବହାର, ପ୍ରଶ୍ନପତ୍ର ଲିକ୍ ଘଟଣା ଏବଂ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବିକୁ ନେଇ ବିରୋଧୀ ଦଳ ଏହି ପ୍ରତିବାଦ କରିଥିଲେ।

କଂଗ୍ରେସ ସାଂସଦ ପବନ ଖେରା କହିଛନ୍ତି ଯେ, ଛାତ୍ରମାନଙ୍କ ପ୍ରତି ହୋଇଥିବା ବ୍ୟବହାର ଏବଂ ସରକାରଙ୍କ ମନୋଭାବ ବିରୋଧରେ ସମସ୍ତ ବିରୋଧୀ ସାଂସଦ କଳା ପୋଷାକ ପିନ୍ଧି ପ୍ରତିବାଦ କରୁଛନ୍ତି। କଂଗ୍ରେସ ସହ ବିଭିନ୍ନ ବିରୋଧୀ ଦଳ କେନ୍ଦ୍ର ଶିକ୍ଷାମନ୍ତ୍ରୀଙ୍କ ଇସ୍ତଫା ଦାବିରେ ଅଡ଼ି ରହିଥିଲେ।

ସଂସଦରେ ହଟ୍ଟଗୋଳ ବଢ଼ିବା ପରେ ଲୋକସଭା ବାଚସ୍ପତି ଓମ୍ ବିର୍ଲା ଲୋକସଭାର କାର୍ଯ୍ୟକୁ ମଧ୍ୟାହ୍ନ ୧୨ଟା ପର୍ଯ୍ୟନ୍ତ ମୁଲତବୀ କରିଥିଲେ। ପରେ ରାଜ୍ୟସଭାର କାର୍ଯ୍ୟ ମଧ୍ୟ ସେହି ସମୟ ପର୍ଯ୍ୟନ୍ତ ସ୍ଥଗିତ ରଖାଯାଇଥିଲା।

କଂଗ୍ରେସ ସାଂସଦ ପ୍ରିୟଙ୍କା ଗାନ୍ଧୀ ଭଦ୍ରା କହିଥିଲେ ଯେ, ଛାତ୍ରମାନଙ୍କ ଦାବି ଯଥାର୍ଥ ଏବଂ ସେମାନେ ନିଜ ଅଧିକାର ପାଇଁ ସଂଘର୍ଷ କରୁଛନ୍ତି। ବାରମ୍ବାର ପ୍ରଶ୍ନପତ୍ର ଲିକ୍ ହେବା ଚିନ୍ତାଜନକ ବୋଲି ସେ ମତ ପ୍ରକାଶ କରିଥିଲେ। ଶାନ୍ତିପୂର୍ଣ୍ଣ ପ୍ରତିବାଦ ଗଣତାନ୍ତ୍ରିକ ଅଧିକାର ବୋଲି ସେ କହିଥିଲେ।

କଂଗ୍ରେସ ସାଂସଦ କେ.ସି. ଭେନୁଗୋପାଳ କହିଥିଲେ ଯେ, ଶିକ୍ଷାମନ୍ତ୍ରୀଙ୍କ ନୈତିକ ଦାୟିତ୍ୱ ରହିଛି ଏବଂ ଛାତ୍ରମାନଙ୍କ ସ୍ୱାର୍ଥରେ ସେ ପଦତ୍ୟାଗ କରିବା ଉଚିତ। ଅନ୍ୟପଟେ କେ. ସୁରେଶ ଓ ପ୍ରମୋଦ ତିୱାରୀ ମଧ୍ୟ ପୁଲିସ କାର୍ଯ୍ୟାନୁଷ୍ଠାନ ଓ ବିରୋଧୀ ନେତାଙ୍କ ପ୍ରତି ବ୍ୟବହାରକୁ ନେଇ ସରକାରଙ୍କୁ କଡ଼ା ସମାଲୋଚନା କରିଥିଲେ।

ସଂସଦରେ ଜାରି ରାଜନୈତିକ ଅଚଳାବସ୍ଥା ମଧ୍ୟରେ ବିରୋଧୀ ଦଳ ସରକାରଙ୍କୁ ବିଭିନ୍ନ ପ୍ରସଙ୍ଗରେ ଘେରିବା ଜାରି ରଖିଥିବା ବେଳେ, ଆଗାମୀ ଦିନରେ ମଧ୍ୟ ଏହି ପ୍ରସଙ୍ଗକୁ ନେଇ ସଂସଦରେ ତୀବ୍ର ଚର୍ଚ୍ଚା ହେବାର ସମ୍ଭାବନା ରହିଛି।