ମାର୍ଚ୍ଚ ମାସ ଶେଷ ହେବାକୁ ଯାଉଥିବା ସତ୍ତ୍ୱେ କେନ୍ଦ୍ରାପଡା ଜିଲ୍ଲାର ରାଜନଗର ବ୍ଲକ୍ ଅଧୀନ ଗହୀରମଥା ସମୁଦ୍ରତଟରେ ଏପର୍ଯ୍ୟନ୍ତ ଅଲିଭ୍ ରିଡ୍ଲେ କଇଁଛଙ୍କ ଗଣଅଣ୍ଡାଦାନ (Arribada) ଆରମ୍ଭ ହୋଇନାହିଁ। ସାଧାରଣତଃ ଫେବ୍ରୁଆରିରୁ ମାର୍ଚ୍ଚ ଦ୍ୱିତୀୟ ସପ୍ତାହ ମଧ୍ୟରେ ଏହି ବିରଳ ପ୍ରାକୃତିକ ଘଟଣା ଦେଖିବାକୁ ମିଳେ, କିନ୍ତୁ ଚଳିତ ବର୍ଷ ଏହାର ବିଳମ୍ବ ପରିବେଶବିତ୍ମାନଙ୍କ ମଧ୍ୟରେ ଚିନ୍ତା ବଢ଼ାଇଛି।
ସୂଚନା ଅନୁସାରେ, କୂଳରୁ ପ୍ରାୟ ୫୦୦ ମିଟର ମଧ୍ୟରେ ଲକ୍ଷାଧିକ କଇଁଛ ଏକ ମାସ ଧରି ରହିଥିଲେ ମଧ୍ୟ ସେମାନେ ବାଲୁକାଶଯ୍ୟାକୁ ଆସି ଅଣ୍ଡା ଦେଉନାହାନ୍ତି। ଏପଟେ ଋଷିକୁଲ୍ୟାରେ ଗଣଅଣ୍ଡାଦାନ ସମାପ୍ତ ହୋଇଥିବା ବେଳେ ଗହୀରମଥାରେ ଏହା ନ ହେବା ଏକ ଅସାମାନ୍ୟ ପରିସ୍ଥିତି ବୋଲି କୁହାଯାଉଛି।
ବିଶେଷଜ୍ଞମାନଙ୍କ ମତାନୁସାରେ, ଜଳବାୟୁ ପରିବର୍ତ୍ତନ ଏହାର ପ୍ରମୁଖ କାରଣ ହୋଇପାରେ। ଚଳିତ ବର୍ଷ ଅସ୍ୱାଭାବିକ ପାଣିପାଗ, ମେଘୁଆ ଆବହାଓା ଓ ବର୍ଷାପାଗ ଯୋଗୁଁ ବାଲିର ତାପମାତ୍ରା ଆବଶ୍ୟକ ସ୍ତରକୁ ପହଞ୍ଚି ପାରୁନାହିଁ, ଯାହା ଗଣଅଣ୍ଡାଦାନ ପ୍ରକ୍ରିୟାକୁ ବାଧା ପହଞ୍ଚାଉଛି।
ଏହା ସତ୍ତ୍ୱେ, ଚଳିତ ବର୍ଷ ବିକ୍ଷିପ୍ତ ଭାବେ କଇଁଛମାନେ ବିଭିନ୍ନ ସ୍ଥାନରେ ଅଣ୍ଡାଦାନ କରିଛନ୍ତି। ନାସୀ-୧, ନାସୀ-୨, ମାଦଳୀ, ସାତଭାୟା, ହବାଳିଖଟି, ଚିଞ୍ଚିରି ଓ ଦୋବନ୍ଧି ଅଞ୍ଚଳରେ ୩୫୦ରୁ ଅଧିକ କଇଁଛ ବିକ୍ଷିପ୍ତ ଭାବେ ଅଣ୍ଡା ଦେଇଥିବା ରେକର୍ଡ ହୋଇଛି। ସେହି ଅଣ୍ଡାଗୁଡ଼ିକୁ ସଂଗ୍ରହ କରି ହାଚେରିରେ ସୁରକ୍ଷିତ ରଖାଯାଇଥିଲା।
ଗତ ୨୩ ତାରିଖରୁ ଏହି ଅଣ୍ଡାରୁ ଶାବକ ବାହାରିବା ଆରମ୍ଭ ହୋଇଛି। ବିଭିନ୍ନ ବସାରୁ ଶତାଧିକ କଇଁଛ ଶାବକ ବାହାରି ସୁରକ୍ଷିତ ଭାବେ ସମୁଦ୍ରକୁ ଛାଡ଼ାଯାଇଛି।
ପୂର୍ବବର୍ଷଗୁଡ଼ିକରେ ମଧ୍ୟ କେତେକ ସମୟରେ ଗଣଅଣ୍ଡାଦାନ ବିଳମ୍ବ ହୋଇଥିଲା କିମ୍ବା ହୋଇପାରି ନଥିଲା। ୨୦୦୮ ଓ ୨୦୧୪ରେ ଏହି ପ୍ରକ୍ରିୟା ନ ଘଟିଥିବା ଦେଖିବାକୁ ମିଳିଥିଲା।
ବର୍ତ୍ତମାନ ପରିସ୍ଥିତି ଦେଖି ପରିବେଶବିତ୍ମାନେ ଜଳବାୟୁ ପରିବର୍ତ୍ତନର ଗଭୀର ପ୍ରଭାବ ଉପରେ ଚିନ୍ତା ବ୍ୟକ୍ତ କରୁଛନ୍ତି ଏବଂ ଏହା ପ୍ରାକୃତିକ ସମତୋଳନ ପାଇଁ ଆଗାମୀଦିନରେ ଚ୍ୟାଲେଞ୍ଜ ସୃଷ୍ଟି କରିପାରେ ବୋଲି ସତର୍କ କରିଛନ୍ତି।
ମାଞ୍ଚେଷ୍ଟରର ଐତିହାସିକ ଓଲ୍ଡ ଟ୍ରାଫୋର୍ଡ ଷ୍ଟାଡିୟମରେ ଭାର...
ସରକାରୀ କିମ୍ବା ବେସରକାରୀ ସ୍କୁଲରେ ଶିକ୍ଷକ ହେବାକୁ ଚାହୁଁ...
ଗଞ୍ଜାମ ଜିଲ୍ଲା ଖଲ୍ଲିକୋଟ ବ୍ଲକର ପଣ୍ଡିତଗାଁ ସରକାରୀ ଉଚ୍ଚ...
ପଶ୍ଚିମବଙ୍ଗ ରାଜନୀତିରେ ତୃଣମୂଳ କଂଗ୍ରେସ ପାଇଁ ଆଉ ଏକ ବଡ଼...
ଅଯୋଧ୍ୟା ରାମମନ୍ଦିର ଦାନପାଣ୍ଠି ଅର୍ଥ ହେରଫେର ଅଭିଯୋଗକୁ ନ...
ଫିଫା ବିଶ୍ୱକପ୍ ୨୦୨୬ର ପ୍ରଥମ ପ୍ରି-କ୍ୱାର୍ଟରଫାଇନାଲ୍ରେ ଉ...
NEET ଓ JEE ପ୍ରବେଶିକା ପରୀକ୍ଷାରେ ଛାତ୍ରଛାତ୍ରୀଙ୍କ ଉପରେ...
ଭାରତୀୟ ମହିଳା କ୍ରିକେଟ ଦଳ ଆଇସିସି ମହିଳା ଟି-୨୦ ବିଶ୍ୱକପ...
ଫିଫା ବିଶ୍ୱକପ୍ ୨୦୨୬ରେ ପ୍ରଥମଥର ପାଇଁ ଅଂଶଗ୍ରହଣ କରିଥିବା...
ରାଜ୍ୟର ସ୍କୁଲ ପାଠ୍ୟପୁସ୍ତକରେ ହୋଇଥିବା ତ୍ରୁଟିକୁ ନେଇ ଓଡ...
ଇରାନର ସର୍ବୋଚ୍ଚ ନେତା ଅଲି ଖେମିନିଙ୍କ ମୃତ୍ୟୁ ପରେ ରବିବା...
ମହାରାଷ୍ଟ୍ର ରାଜନୀତିରେ ପୁଣି ଥରେ ଦଳବଦଳ ପ୍ରସଙ୍ଗ ଚର୍ଚ୍ଚ...
