ଓଡ଼ିଶାରେ ପ୍ରି-ମନସୁନ୍‌ ପାଣିପାଗ ଗତିବିଧି ଆଗାମୀ ୫ ଦିନ ଧରି ଜୋରଦାର ରହିବାକୁ ଯାଉଛି। ଭାରତୀୟ ପାଣିପାଗ ବିଭାଗ (IMD) ପକ୍ଷରୁ ରାଜ୍ୟର ଅନେକ ଜିଲ୍ଲା ପାଇଁ ବଜ୍ରପାତ, ଘୂର୍ଣ୍ଣିପବନ ଓ ବର୍ଷା ସମ୍ଭାବନା ନେଇ ୟେଲୋ ୱାର୍ଣ୍ଣିଂ ଜାରି କରାଯାଇଛି।

ଶନିବାରରୁ ଆରମ୍ଭ କରି ରାଜ୍ୟର ପ୍ରାୟ ସମସ୍ତ ଅଞ୍ଚଳରେ ହାଲୁକାରୁ ମଧ୍ୟମ ଧରଣର ବର୍ଷା ସହ ବଜ୍ରପାତ ଦେଖିବାକୁ ମିଳିପାରେ। ବିଶେଷକରି ବାଲେଶ୍ୱର, ଭଦ୍ରକ, କଟକ, ସମ୍ବଲପୁର, ଅନୁଗୋଳ, କେନ୍ଦୁଝର, ମୟୂରଭଞ୍ଜ, କଳାହାଣ୍ଡି, କନ୍ଧମାଳ ଓ ସୁନ୍ଦରଗଡ଼ ଭଳି ଜିଲ୍ଲାରେ ୪୦ରୁ ୫୦ କିମି ବେଗର ପବନ ସହ ବଜ୍ରପାତର ଝୁଁକି ଅଧିକ ରହିଛି।

ପୁରୀ, ଖୋର୍ଦ୍ଧା, ଗଞ୍ଜାମ, କୋରାପୁଟ ଓ ମାଲକାନଗିରି ଭଳି ଉପକୂଳ ଓ ଦକ୍ଷିଣ ଜିଲ୍ଲାରେ ମଧ୍ୟ ବର୍ଷା ସହ ୩୦ରୁ ୪୦ କିମି ବେଗର ପବନ ବହିପାରେ। ମଇ ୧୦ରୁ ୧୩ ମଧ୍ୟରେ ବଜ୍ରପାତର ପ୍ରଭାବ ଉତ୍ତର, ଉପକୂଳ ଓ ଦକ୍ଷିଣ ଓଡ଼ିଶାରେ ଅଧିକ ସଂକେନ୍ଦ୍ରିତ ହେବା ସମ୍ଭାବନା ରହିଛି।

ପାଣିପାଗ ବିଶେଷଜ୍ଞମାନଙ୍କ ମତାନୁସାରେ, ବଙ୍ଗୋପସାଗରରୁ ଆସୁଥିବା ଆର୍ଦ୍ରତା ଓ ବଢ଼ୁଥିବା ତାପମାତ୍ରାର ପ୍ରଭାବରେ କାଳବୈଶାଖୀ ସଦୃଶ ପରିସ୍ଥିତି ସୃଷ୍ଟି ହେଉଛି। ଏହି ପ୍ରକାରର ଝଡ଼ ଅଳ୍ପ ସମୟ ପାଇଁ ହେଲେ ମଧ୍ୟ ବଜ୍ରପାତ ଓ ଜୋର ପବନ ଯୋଗୁଁ ଜୀବନ ଓ ସମ୍ପତ୍ତି ପାଇଁ ବିପଦଜନକ ହୋଇପାରେ।

ଲୋକମାନଙ୍କୁ ବଜ୍ରପାତ ସମୟରେ ଘରେ ରହିବା, ଗଛତଳେ ନଠିଆ ହେବା ଓ ଆବଶ୍ୟକ ନହେଲେ ବାହାରକୁ ନଯିବାକୁ ପରାମର୍ଶ ଦିଆଯାଇଛି।