ଓଡ଼ିଶାର ବିଭିନ୍ନ ଜିଲ୍ଲାରେ ସାମାଜିକ ସୁରକ୍ଷା ଭତ୍ତା ବଣ୍ଟନରେ ବିଳମ୍ବ ହେବାକୁ ନେଇ ହିତାଧିକାରୀମାନଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି। ବୃଦ୍ଧ, ବିଧବା ଓ ଦିବ୍ୟାଙ୍ଗ ବ୍ୟକ୍ତିମାନେ ଅଭିଯୋଗ କରିଛନ୍ତି ଯେ, ଗତ କିଛି ମାସ ଧରି ସେମାନେ ନିୟମିତ ଭତ୍ତା ପାଉନାହାନ୍ତି, ଯାହା ଫଳରେ ସେମାନଙ୍କ ଦୈନନ୍ଦିନ ଜୀବନ ଗୁରୁତର ଭାବେ ପ୍ରଭାବିତ ହେଉଛି।
ବୌଦ୍ଧ ଜିଲ୍ଲାର ଅନେକ ହିତାଧିକାରୀ ଦାବି କରିଛନ୍ତି ଯେ, ଗତ ତିନି ମାସ ଧରି ସେମାନଙ୍କ ଭତ୍ତା ଟଙ୍କା ଜମା ହୋଇନାହିଁ। ବାରମ୍ବାର ସ୍ଥାନୀୟ ପ୍ରଶାସନ, ପଞ୍ଚାୟତ ଓ ବ୍ଲକ୍ କାର୍ଯ୍ୟାଳୟର ଦ୍ୱାରସ୍ଥ ହେବା ସତ୍ତ୍ୱେ ସମସ୍ୟାର ସମାଧାନ ହୋଇନଥିବା ଅଭିଯୋଗ ହୋଇଛି।
ସୋନପୁର ଜିଲ୍ଲାର ବାବୁପାଲି ପଞ୍ଚାୟତ ଅନ୍ତର୍ଗତ ଆଇନଲମୁଣ୍ଡା ଗ୍ରାମରୁ ମଧ୍ୟ ସମାନ ଅଭିଯୋଗ ସାମ୍ନାକୁ ଆସିଛି। ସେଠାରେ ବୃଦ୍ଧାଭତ୍ତା ପାଉଥିବା ବ୍ୟକ୍ତିମାନେ କହିଛନ୍ତି ଯେ, ଦୁଇ ମାସ ଧରି ସେମାନଙ୍କ ଭତ୍ତା ବନ୍ଦ ରହିଛି। ସମସ୍ୟାର ସମାଧାନ ପାଇଁ ସେମାନେ ପଞ୍ଚାୟତ କାର୍ଯ୍ୟାଳୟ, ବ୍ଲକ୍ କାର୍ଯ୍ୟାଳୟ ଓ ବ୍ୟାଙ୍କକୁ ବାରମ୍ବାର ଯାଇଥିଲେ ମଧ୍ୟ କୌଣସି ଫଳ ମିଳିନାହିଁ।
ଜଣେ ହିତାଧିକାରୀ କହିଛନ୍ତି, “ଗତ କିଛି ମାସ ହେଲା ଭତ୍ତା ମିଳୁନାହିଁ। ଘର ଚଳାଇବା ଏବେ ବହୁତ କଷ୍ଟକର ହୋଇପଡ଼ିଛି।” ଅନ୍ୟ ଜଣେ କହିଛନ୍ତି ଯେ, “ଜିଲ୍ଲାପାଳଙ୍କୁ ମଧ୍ୟ ଜଣାଇଥିଲି, ତଥାପି ତିନି ମାସ ହେଲା ଭତ୍ତା ପାଇନାହିଁ।”
ବିନିକା ଓ ଡୁଙ୍ଗୁରିପାଲି ବ୍ଲକ୍ରୁ ମଧ୍ୟ ସମାନ ଅଭିଯୋଗ ଆସିଛି। ଏହାକୁ ନେଇ ହିତାଧିକାରୀମାନଙ୍କ ମଧ୍ୟରେ ଅସନ୍ତୋଷ ବଢ଼ିବାରେ ଲାଗିଛି।
ଏହି ପ୍ରସଙ୍ଗରେ ସାମାଜିକ ସୁରକ୍ଷା ଓ ଦିବ୍ୟାଙ୍ଗ ସଶକ୍ତିକରଣ ମନ୍ତ୍ରୀ ନିତ୍ୟାନନ୍ଦ ଗଣ୍ଡ ସମସ୍ୟାକୁ ସ୍ୱୀକାର କରିଛନ୍ତି। ସେ କହିଛନ୍ତି ଯେ, ଅଧିକାଂଶ କ୍ଷେତ୍ରରେ ହିତାଧିକାରୀମାନଙ୍କ ବ୍ୟାଙ୍କ ଖାତାର ସୂଚନା ପରିବର୍ତ୍ତନ ହେବାରୁ ଟଙ୍କା ସ୍ଥାନାନ୍ତର ପ୍ରକ୍ରିୟାରେ ପ୍ରଯୁକ୍ତିଗତ ସମସ୍ୟା ସୃଷ୍ଟି ହୋଇଛି।
ମନ୍ତ୍ରୀ ଆହୁରି କହିଛନ୍ତି ଯେ, ସରକାର ଏହି ସମସ୍ୟାର ସମାଧାନ ପାଇଁ ସକ୍ରିୟ ଭାବେ କାମ କରୁଛନ୍ତି ଏବଂ ଖୁବ୍ ଶୀଘ୍ର ହିତାଧିକାରୀମାନେ ସେମାନଙ୍କ ବକେୟା ଭତ୍ତା ପାଇପାରିବେ।
ସାମାଜିକ ସୁରକ୍ଷା ଯୋଜନା ଉପରେ ନିର୍ଭର କରୁଥିବା ହଜାର ହଜାର ଲୋକଙ୍କ ପାଇଁ ଏହି ବିଳମ୍ବ ବଡ଼ ସମସ୍ୟା ସୃଷ୍ଟି କରିଥିବା ବେଳେ, ସରକାରଙ୍କ ଆଶ୍ୱାସନ କେବେ ବାସ୍ତବ ରୂପ ନେବ ସେଥିପ୍ରତି ସମସ୍ତଙ୍କ ନଜର ରହିଛି।
ସମ୍ପ୍ରତି ଘୋଷିତ ଡିଏ (Dearness Allowance) ବୃଦ୍ଧି ପରେ...
ଦେଶରେ ପୁନର୍ବାର ପେଟ୍ରୋଲ ଓ ଡିଜେଲ ଦର ବୃଦ୍ଧି ପାଇଛି। ପେ...
ଡିଜିଟାଲ୍ ପେମେଣ୍ଟ୍ କମ୍ପାନୀ ପେଟିଏମ୍ର ଶେୟର ଦର ଆଜି ଶେୟ...
ଆପଣ ଯଦି ୧୦ ଲକ୍ଷ ଟଙ୍କାରୁ ଅଧିକ ଦାମର କାର କିଣିଛନ୍ତି, ତ...
