ଭୁବନେଶ୍ୱର, ଅଗଷ୍ଟ ୨୦:ରାଜ୍ୟରେ ପ୍ରଶାସନିକ ନିଷ୍ପତ୍ତି ନେବା ପ୍ରକ୍ରିୟାକୁ ଅଧିକ ସୁସଂଗଠିତ ଓ ତ୍ୱରାନ୍ୱିତ କରିବା ପାଇଁ ଓଡ଼ିଶା ସରକାର ଏଣିକି ପ୍ରତି ମାସରେ ଦୁଇଥର କ୍ୟାବିନେଟ୍ ବୈଠକ କରିବାକୁ ନିଷ୍ପତ୍ତି ନେଇଛନ୍ତି। ଏହା ଦ୍ୱାରା ଗୁରୁତ୍ୱପୂର୍ଣ୍ଣ ପ୍ରଶାସନିକ ପ୍ରସ୍ତାବ ଉପରେ ଶୀଘ୍ର ନିଷ୍ପତ୍ତି ନିଆଯିବା ସହ ଅନୁମୋଦିତ ନିଷ୍ପତ୍ତିଗୁଡ଼ିକର ଶୀଘ୍ର କାର୍ଯ୍ୟକାରିତା ହୋଇପାରିବ।
ସୂଚନା ଅନୁସାରେ, ସମସ୍ତ ପ୍ରଶାସନିକ ବିଭାଗକୁ କ୍ୟାବିନେଟ୍ରେ ଉପସ୍ଥାପନ କରାଯିବାକୁ ଥିବା ପ୍ରସ୍ତାବଗୁଡ଼ିକୁ ଆଗୁଆ ପ୍ରସ୍ତୁତ କରିବାକୁ କୁହାଯାଇଛି। ନିର୍ଦ୍ଧାରିତ ବୈଠକର ଯଥେଷ୍ଟ ସମୟ ପୂର୍ବରୁ ମୁଖ୍ୟ ସଚିବଙ୍କ ନିକଟରେ କ୍ୟାବିନେଟ୍ ନୋଟ୍ ଦାଖଲ କରିବାକୁ ମଧ୍ୟ ବିଭାଗଗୁଡ଼ିକୁ ନିର୍ଦ୍ଦେଶ ରହିଛି।
ଅଗଷ୍ଟ ୪ ତାରିଖରେ ଖାରବେଳ ଭବନରେ ମୁଖ୍ୟ ସଚିବ ଅନୁ ଗର୍ଗଙ୍କ ଅଧ୍ୟକ୍ଷତାରେ ହୋଇଥିବା ସଚିବସ୍ତରୀୟ ବୈଠକରେ କ୍ୟାବିନେଟ୍ ବୈଠକ ପ୍ରସ୍ତୁତି ଓ ନିଷ୍ପତ୍ତିର ଅନୁସରଣ ନେଇ ଏହି ନିର୍ଦ୍ଦେଶ ଦିଆଯାଇଥିଲା।
ସରକାରଙ୍କ ଧ୍ୟାନ କେବଳ କ୍ୟାବିନେଟ୍ ବୈଠକରେ ନିଷ୍ପତ୍ତି ନେବାରେ ସୀମିତ ରହିବ ନାହିଁ। କ୍ୟାବିନେଟ୍ରେ ଅନୁମୋଦିତ ନିଷ୍ପତ୍ତିଗୁଡ଼ିକର ଅଗ୍ରଗତିକୁ ବିଭାଗଗୁଡ଼ିକ ନିୟମିତ ଭାବେ ସମୀକ୍ଷା କରିବେ। ନିର୍ଦ୍ଧାରିତ ସମୟସୀମା ମଧ୍ୟରେ ନିଷ୍ପତ୍ତିଗୁଡ଼ିକ କାର୍ଯ୍ୟକାରୀ ହେଉଛି କି ନାହିଁ, ତାହା ମଧ୍ୟ ନଜରରେ ରଖାଯିବ।
କାର୍ଯ୍ୟକାରିତାରେ କୌଣସି ବାଧା କିମ୍ବା ବିଳମ୍ବ ଦେଖାଦେଲେ ତୁରନ୍ତ ସୁଧାରମୂଳକ ପଦକ୍ଷେପ ନେବାକୁ ବିଭାଗଗୁଡ଼ିକୁ କୁହାଯାଇଛି। ଏହା ଫଳରେ କ୍ୟାବିନେଟ୍ର ନିଷ୍ପତ୍ତି କେବଳ କାଗଜପତ୍ରରେ ସୀମିତ ନରହି ତାହାର ଶୀଘ୍ର ରୂପାୟଣ ଉପରେ ଗୁରୁତ୍ୱ ଦିଆଯିବ।
ସରକାରଙ୍କ ଏହି ନୂଆ ବ୍ୟବସ୍ଥା ଫଳରେ ବିଭିନ୍ନ ବିଭାଗ ମଧ୍ୟରେ ସମନ୍ୱୟ ବଢ଼ିବା ସହ ପ୍ରଶାସନିକ ନିଷ୍ପତ୍ତିର ଗତି ମଧ୍ୟ ବଢ଼ିବ ବୋଲି ଆଶା କରାଯାଉଛି।
ଉତ୍ତରପ୍ରଦେଶରେ ବନ୍ୟା ପରିସ୍ଥିତି ଯୋଗୁଁ ୧୩ଟି ଜିଲ୍ଲାର ୧...
ଇଣ୍ଡୋନେସିଆର ଫ୍ଲୋରେସ୍‌ ଦ୍ୱୀପରେ ଶନିବାର ସକାଳେ ଘଟ...
ଦିଲ୍ଲୀର ଇନ୍ଦିରା ଗାନ୍ଧୀ ଇଣ୍ଡୋର ଷ୍ଟାଡିୟମ୍ ଏବେ BWF ବି...
ବଡୋଦରାରେ ଅଘଟଣ: ବସ୍‌ର ହାଇଡ୍ରୋଲିକ୍‌ ଡୋରରେ...
ଭାରତୀୟ ମହିଳା ଡବଲ୍ସ ଯୋଡ଼ି ଗାୟତ୍ରୀ ଗୋପୀଚାନ୍ଦ ଓ ତ୍ରିସ...
ଗ୍ରେଟ୍ ନିକୋବରରେ ‘ଗ୍ରୀନ୍ AI’ ଡାଟା ସେଣ୍ଟ...
ଗ୍ରୀନଲ୍ୟାଣ୍ଡରେ ଜଳବାୟୁ ପରିବର୍ତ୍ତନର ଆଉ ଏକ ବଡ଼ ପ୍ରଭାବ...
