ଓଡ଼ିଶାର ୭ ଲକ୍ଷ ପରିବାରଙ୍କ ପାଇଁ ଆସିଛି ବଡ଼ ଖୁସି ଖବର। ଦୀର୍ଘଦିନ ଧରି ପକ୍କା ଘର ଅପେକ୍ଷାରେ ଥିବା ହିତାଧିକାରୀଙ୍କ ଅପେକ୍ଷାର ଅନ୍ତ ହେବାକୁ ଯାଉଛି। ଆଜି ୭ ଲକ୍ଷ ପରିବାରଙ୍କୁ ଆବାସ ଯୋଜନାରେ ଘର ମିଳିବ। ଏଥିମଧ୍ୟରୁ ୩ ଲକ୍ଷ ପରିବାର ଅନ୍ତ୍ୟୋଦୟ ଗୃହ ଯୋଜନାରେ ଏବଂ ୪ ଲକ୍ଷ ପରିବାର ପ୍ରଧାନମନ୍ତ୍ରୀ ଆବାସ ଯୋଜନା-ଗ୍ରାମୀଣ (PMAY-G)ରେ ଉପକୃତ ହେବେ ।

ଏହି ଅବସରରେ ବଲାଙ୍ଗୀରର ପଥରଚେପା ପଡ଼ିଆରେ ଏକ ବଡ଼ କାର୍ଯ୍ୟକ୍ରମ ଆୟୋଜନ କରାଯାଇଛି। ଏଥିରେ କେନ୍ଦ୍ର କୃଷି ମନ୍ତ୍ରୀ ଶିବରାଜ ସିଂ ଚୌହାନ ଏବଂ ଓଡ଼ିଶାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଯୋଗଦେବେ ।

୭ ଲକ୍ଷ ପରିବାରଙ୍କୁ ମିଳିବ ଆବାସ

ସରକାରଙ୍କ ଯୋଜନା ଅନୁସାରେ, ୩ ଲକ୍ଷ ପରିବାରଙ୍କୁ ଅନ୍ତ୍ୟୋଦୟ ଗୃହ ଯୋଜନାରେ ଘର ଯୋଗାଇ ଦିଆଯିବ। ସେହିପରି ୪ ଲକ୍ଷ ପରିବାର ପ୍ରଧାନମନ୍ତ୍ରୀ ଆବାସ ଯୋଜନା-ଗ୍ରାମୀଣରେ ଘର ପାଇବେ। ଏହାଦ୍ୱାରା ରାଜ୍ୟର ମୋଟ ୭ ଲକ୍ଷ ପରିବାର ଉପକୃତ ହେବେ ।

ବଲାଙ୍ଗୀରରେ ଶିବରାଜ ସିଂ ଚୌହାନଙ୍କ କାର୍ଯ୍ୟକ୍ରମ

କାର୍ଯ୍ୟସୂଚୀ ଅନୁଯାୟୀ, କେନ୍ଦ୍ରମନ୍ତ୍ରୀ ଶିବରାଜ ସିଂ ଚୌହାନ ସକାଳ ୯ଟା ୪୫ ମିନିଟରେ ହେଲିକପ୍ଟର ଯୋଗେ ବଲାଙ୍ଗୀର ଅଭିମୁଖେ ଯାତ୍ରା କରିବେ। ସକାଳ ୧୦ଟା ୫୦ ମିନିଟରେ ବଲାଙ୍ଗୀର ହେଲିପ୍ୟାଡ୍‌ରେ ପହଞ୍ଚିବେ ।

ସକାଳ ୧୧ଟାରୁ ଅପରାହ୍ନ ୧ଟା ପର୍ଯ୍ୟନ୍ତ ପଥରଚେପା ପଡ଼ିଆରେ ଆୟୋଜିତ ପ୍ରଧାନମନ୍ତ୍ରୀ ଆବାସ ଯୋଜନା-ଗ୍ରାମୀଣ କାର୍ଯ୍ୟକ୍ରମରେ ସେ ଯୋଗଦେବେ ।

ଚଉଷଠି ଯୋଗିନୀ ମନ୍ଦିରରେ ମଧ୍ୟ କାର୍ଯ୍ୟକ୍ରମ

ବଲାଙ୍ଗୀର କାର୍ଯ୍ୟକ୍ରମ ଶେଷ କରି ଅପରାହ୍ନ ୧ଟା ୩୫ ମିନିଟରେ ମୁଖ୍ୟମନ୍ତ୍ରୀଙ୍କ ସହ ହେଲିକପ୍ଟର ଯୋଗେ ଭୁବନେଶ୍ୱର ଫେରିବେ ଶିବରାଜ ସିଂ ଚୌହାନ। ଅପରାହ୍ନ ୨ଟା ୪୦ ମିନିଟରେ ଭୁବନେଶ୍ୱର ବିମାନବନ୍ଦରରେ ପହଞ୍ଚିବେ ।

ଏହାପରେ ଅପରାହ୍ନ ୩ଟା ୨୦ ମିନିଟରେ ହୀରାପୁରସ୍ଥିତ ପ୍ରସିଦ୍ଧ ଚଉଷଠି ଯୋଗିନୀ ମନ୍ଦିରରେ ପହଞ୍ଚିବେ। ସେଠାରେ ଆୟୋଜିତ 'କ୍ଷେତ ବଞ୍ଚାଓ ଅଭିଯାନ' ଓ ବୃକ୍ଷରୋପଣ କାର୍ଯ୍ୟକ୍ରମରେ ଅପରାହ୍ନ ୩ଟା ୨୦ରୁ ୪ଟା ୨୦ ପର୍ଯ୍ୟନ୍ତ ସାମିଲ ହେବେ ।

କାର୍ଯ୍ୟକ୍ରମ ଶେଷ କରି ଅପରାହ୍ନ ୪ଟା ୨୦ରେ ହୀରାପୁରରୁ ବାହାରି ୪ଟା ୫୦ରେ ଭୁବନେଶ୍ୱର ବିମାନବନ୍ଦରରେ ପହଞ୍ଚିବେ। ସନ୍ଧ୍ୟା ୫ଟାରେ ସ୍ୱତନ୍ତ୍ର ବିମାନ ଯୋଗେ ଭୋପାଳ ଅଭିମୁଖେ ଯାତ୍ରା କରିବେ ।

ସରକାରଙ୍କ ଏହି ପଦକ୍ଷେପ ଦ୍ୱାରା ରାଜ୍ୟର ଲକ୍ଷ ଲକ୍ଷ ଗରିବ ଓ ଆବାସ ଅପେକ୍ଷାରେ ଥିବା ପରିବାରଙ୍କୁ ପକ୍କା ଘର ପାଇବାର ସୁଯୋଗ ମିଳିବ ।