ଭୁବନେଶ୍ୱର: ଆଧୁନିକ ଯୁଗରେ କୃତ୍ରିମ ବୁଦ୍ଧିମତ୍ତା (Artificial Intelligence) ବା AI ସାରା ବିଶ୍ୱରେ ନୂଆ ନୂଆ ସମ୍ଭାବନା ସୃଷ୍ଟି କରୁଛି। ଏହି କ୍ଷେତ୍ରରେ ଏବେ ଓଡ଼ିଆ ଭାଷା ପାଇଁ ଏକ ବଡ଼ ପଦକ୍ଷେପ ନିଆଯାଇଛି। ଭୁବନେଶ୍ୱରର ଉଦ୍ୟୋଗୀ ତଥା AI ଗବେଷକ ଅରୁଣ ମିଶ୍ର ଓଡ଼ିଆ ଭାଷା ପାଇଁ ସ୍ୱତନ୍ତ୍ର ଭାବେ 'OdiaSLM' ନାମକ ଏକ AI ମଡେଲ୍ ପରିବାର ବିକଶିତ କରିଛନ୍ତି।
ଏହି ମଡେଲ୍ଗୁଡ଼ିକୁ ଓଡ଼ିଆ ଭାଷାର ଶବ୍ଦ, ବ୍ୟାକରଣ ଓ ଲିପିର ଗଠନକୁ ଆଧାର କରି ପ୍ରସ୍ତୁତ କରାଯାଇଛି। ୧୫୦ କୋଟିରୁ ଅଧିକ ଓଡ଼ିଆ ଶବ୍ଦ ବ୍ୟବହାର କରି ଏହାକୁ ପ୍ରଶିକ୍ଷଣ ଦିଆଯାଇଛି। ଏହି ଉଦ୍ଭାବନ ଓଡ଼ିଆ ଭାଷାରେ AI ପ୍ରଯୁକ୍ତିର ବ୍ୟବହାରକୁ ଆହୁରି ସହଜ କରିବାରେ ସହାୟକ ହୋଇପାରେ ।
ନୂଆ କରି ଉନ୍ମୋଚିତ ହୋଇଥିବା OdiaSLM ପରିବାରରେ ମୋଟ ୩ଟି ମଡେଲ୍ ରହିଛି। ସେଗୁଡ଼ିକ ହେଲା:
OdiaSLM-60M-Base: ଓଡ଼ିଆ ଭାଷା ପାଇଁ ଏକ ମୌଳିକ ଭାଷା ମଡେଲ୍।
OdiaSLM-100M-Base: ଓଡ଼ିଆ ଭାଷା ପ୍ରକ୍ରିୟାକରଣ ପାଇଁ ଦ୍ୱିତୀୟ ମୌଳିକ ମଡେଲ୍।
OdiaSLM-100M-Instruct: ଓଡ଼ିଆରେ କଥୋପକଥନ ଓ ବିଭିନ୍ନ ନିର୍ଦ୍ଦେଶ ଅନୁସାରେ କାମ କରିବା ପାଇଁ ଏକ AI ଆସିଷ୍ଟାଣ୍ଟ।
ବିଶେଷକରି OdiaSLM-100M-Instruct ମଡେଲ୍ ଜରିଆରେ ଓଡ଼ିଆରେ ପ୍ରଶ୍ନର ଉତ୍ତର ଦେବା, ଖବରର ସାରାଂଶ ପ୍ରସ୍ତୁତ କରିବା ଏବଂ ବିଭିନ୍ନ ବିଷୟରେ ଓଡ଼ିଆ କଣ୍ଟେଣ୍ଟ ତିଆରି କରିବା ଭଳି କାର୍ଯ୍ୟ କରାଯାଇପାରିବ ।
ସାଧାରଣତଃ ବିଶ୍ୱର ଅନେକ AI ପ୍ଲାଟଫର୍ମ ଇଂରାଜୀ ଭାଷାର ତଥ୍ୟକୁ ଆଧାର କରି ନିର୍ମାଣ ହୋଇଥାଏ। ପରେ ଅନ୍ୟ ଭାଷାଗୁଡ଼ିକୁ ଅନୁବାଦ କିମ୍ବା ବଡ଼ ବିଦେଶୀ ଭାଷା ମଡେଲ୍ର ସହାୟତାରେ ସେଥିରେ ଯୋଡ଼ାଯାଏ।
କିନ୍ତୁ ଅରୁଣ ମିଶ୍ରଙ୍କ ଦ୍ୱାରା ବିକଶିତ OdiaSLM ମଡେଲ୍ଗୁଡ଼ିକୁ ଆରମ୍ଭରୁ ଓଡ଼ିଆ ଭାଷା ପାଇଁ ପ୍ରସ୍ତୁତ କରାଯାଇଛି। ଏହାର ପ୍ରଶିକ୍ଷଣ ପାଇଁ ୧୫୦ କୋଟିରୁ ଅଧିକ ଶୁଦ୍ଧ ଓଡ଼ିଆ ଶବ୍ଦର ଏକ ବିଶାଳ ତଥ୍ୟଭଣ୍ଡାର ବ୍ୟବହାର କରାଯାଇଛି।
ଏହି ଗବେଷଣା ସମ୍ପର୍କିତ ରିପୋର୍ଟ ନଭେମ୍ବର ୧୨ ତାରିଖରେ ମୁକ୍ତ ପ୍ରବେଶଯୋଗ୍ୟ ଗବେଷଣା ପ୍ଲାଟଫର୍ମ Zenodoରେ ପ୍ରକାଶ ପାଇଥିଲା।
ଗବେଷକ ଅରୁଣ ମିଶ୍ରଙ୍କ ଅନୁସାରେ, ବିଶ୍ୱର ଅଧିକାଂଶ AI ମଡେଲ୍ ମୁଖ୍ୟତଃ ଇଂରାଜୀ ବର୍ଣ୍ଣମାଳାକୁ ଆଧାର କରି ନିର୍ମିତ ହୋଇଛି। ତେଣୁ ଓଡ଼ିଆ ଭଳି ଜଟିଳ ଲିପି ଥିବା ଭାଷାକୁ ପ୍ରକ୍ରିୟାକରଣ କରିବା ସମୟରେ ଅନେକ ସମସ୍ୟା ଦେଖାଯାଏ।
ଏପରି AI ସିଷ୍ଟମ୍ଗୁଡ଼ିକ ଅନେକ ସମୟରେ ଗୋଟିଏ ଓଡ଼ିଆ ଶବ୍ଦକୁ ଅନେକ ଛୋଟ ଓ ଅସ୍ୱାଭାବିକ ଅଂଶରେ ବିଭକ୍ତ କରିଦିଅନ୍ତି। ଏହା ଫଳରେ ତଥ୍ୟ ପ୍ରକ୍ରିୟାକରଣର ଗତି କମିବା ସହ କମ୍ପ୍ୟୁଟିଂ ଖର୍ଚ୍ଚ ବଢ଼ିଥାଏ। ଏପରିକି ବ୍ୟାକରଣଗତ ତ୍ରୁଟି ଏବଂ ଭୁଲ୍ ତଥ୍ୟ ସୃଷ୍ଟି ହେବାର ଆଶଙ୍କା ମଧ୍ୟ ରହିଥାଏ।
ଏହି ସମସ୍ୟାର ସମାଧାନ ପାଇଁ ଅରୁଣ ମିଶ୍ର ଓଡ଼ିଆ ଭାଷାର ସ୍ୱାଭାବିକ ଶବ୍ଦ ଗଠନ ଏବଂ ଅକ୍ଷର ସହ ମାତ୍ରାର ମିଶ୍ରଣକୁ ଚିହ୍ନିପାରୁଥିବା ଏକ ସ୍ୱତନ୍ତ୍ର ଶବ୍ଦଭଣ୍ଡାର ବ୍ୟବସ୍ଥା ବିକଶିତ କରିଛନ୍ତି।
ଏହି ପ୍ରଣାଳୀ ଓଡ଼ିଆ ଶବ୍ଦର ପ୍ରକୃତ ଗଠନକୁ ଠିକ୍ ଭାବରେ ବୁଝିବାରେ AIକୁ ସହାୟତା କରିବ। ଫଳରେ ଓଡ଼ିଆ ଭାଷାରେ ତଥ୍ୟ ପ୍ରକ୍ରିୟାକରଣ ଅଧିକ ସହଜ ଓ ଦକ୍ଷ ହେବା ସହ ଉତ୍ତରର ସଠିକତା ମଧ୍ୟ ବଢ଼ିବାର ଲକ୍ଷ୍ୟ ରହିଛି।
ଓଡ଼ିଆ ଭାଷା ପାଇଁ ଏଭଳି ସ୍ୱତନ୍ତ୍ର AI ମଡେଲ୍ର ବିକାଶ ଆଞ୍ଚଳିକ ଭାଷାରେ ଡିଜିଟାଲ୍ ପ୍ରଯୁକ୍ତିର ବ୍ୟବହାରକୁ ନୂଆ ଦିଗ ଦେଇପାରିବ ।
♈ ମେଷ ରାଶି (Aries) ଏହି ସପ୍ତାହ ମେଷ ରାଶିର ବ୍ୟକ୍ତ...
♈ ମେଷ ରାଶି (Aries) ଏହି ସପ୍ତାହ ମେଷ ରାଶିର ବ୍ୟକ୍ତ...
ଚର୍ମକୁ ଗୋରା ଓ ସୁନ୍ଦର କରିବାର ଦାବି କରୁଥିବା କିଛି ବ୍ୟୁ...
ମଧୁମେହ ବା ଡାଇବେଟିସ୍‌ ଏକ ଏପରି ରୋଗ, ଯାହା ସବୁବେଳ...
ଜମ୍ମୁ-କାଶ୍ମୀରର କିସ୍ତୱାଡ଼ ଜିଲ୍ଲାରେ ଦୁଇଜଣ ସ୍ପେଶାଲ୍ ପ...
ହାଇଦ୍ରାବାଦ: ଇଟାଲୀର ଜଣେ ରାଜନେତା ଭାରତରେ ଆସି କଂଗ୍ରେସର...
ବାୟୁ ପ୍ରଦୂଷଣ ଏବେ ଭାରତ ପାଇଁ ଏକ ବଡ଼ ଜନସ୍ୱାସ୍ଥ୍ୟ ସଙ୍କ...
ନୂଆଦିଲ୍ଲୀ: ଯମୁନା ନଦୀରେ ପ୍ଲାଷ୍ଟିକ୍ ବୋତଲ ଫିଙ୍ଗିବାକୁ...