ନୂଆଦିଲ୍ଲୀ: ଭାରତର ପରମାଣୁ ଶକ୍ତି କ୍ଷମତା ବୃଦ୍ଧି ଦିଗରେ NTPC ଏକ ବଡ଼ ପଦକ୍ଷେପ ନେଇଛି। ପରମାଣୁ ବିଦ୍ୟୁତ କେନ୍ଦ୍ର ସ୍ଥାପନ ପାଇଁ କମ୍ପାନୀ ମଧ୍ୟପ୍ରଦେଶ, ବିହାର ଓ ଓଡ଼ିଶାରେ ଗୋଟିଏ ଲେଖାଏଁ ସ୍ଥାନ ଚିହ୍ନଟ କରିଛି। 

ଚିହ୍ନଟ ହୋଇଥିବା ତିନିଟି ସ୍ଥାନ ପାଇଁ NTPC ପକ୍ଷରୁ ବିସ୍ତୃତ ସମ୍ଭାବ୍ୟତା ରିପୋର୍ଟ (Detailed Feasibility Report) ପରମାଣୁ ଶକ୍ତି ଆୟୋଗ ନିକଟରେ ଅନୁମୋଦନ ପାଇଁ ଦାଖଲ କରାଯାଇଛି। ଅନୁମୋଦନ ମିଳିଲେ ପ୍ରତ୍ୟେକ ସ୍ଥାନରେ ୨ରୁ ୪ GW ପର୍ଯ୍ୟନ୍ତ ପରମାଣୁ ଶକ୍ତି ଉତ୍ପାଦନ କ୍ଷମତା ସ୍ଥାପନ ହୋଇପାରେ। 

NTPCର ଲକ୍ଷ୍ୟ ହେଉଛି ୨୦୪୭ ସୁଦ୍ଧା ୧୪ଟି ରାଜ୍ୟରେ ମୋଟ ୩୦ GW ପରମାଣୁ ଶକ୍ତି କ୍ଷମତା ଯୋଗ କରିବା। ଏହି ଉଦ୍ଦେଶ୍ୟରେ NTPC ଆମେରିକାର Holtec International ଓ Westinghouse, ରୁଷିଆର Rosatom ଏବଂ ଫ୍ରାନ୍ସର EDF ସହ ପ୍ରଯୁକ୍ତିଗତ ସହଯୋଗ ନେଇ ଆଲୋଚନା କରୁଛି। 

ପ୍ରସ୍ତାବିତ ପ୍ରକଳ୍ପଗୁଡ଼ିକରେ ବଡ଼ Pressurised Water Reactor (PWR) ପ୍ରଯୁକ୍ତି ବ୍ୟବହାର ନେଇ ବିଚାର କରାଯାଉଛି। ପ୍ରଯୁକ୍ତି ଚୟନ ସମୟରେ ପ୍ରଯୁକ୍ତି ହସ୍ତାନ୍ତର, ସ୍ଥାନୀୟକରଣ ଏବଂ ଇନ୍ଧନ ଉପଲବ୍ଧତା ଗୁରୁତ୍ୱପୂର୍ଣ୍ଣ ହେବ। 

NTPC ପରମାଣୁ ଶକ୍ତି କ୍ଷେତ୍ରରେ ପ୍ରବେଶ ପାଇଁ NTPC Parmanu Urja Nigam Ltd ନାମରେ ଏକ ସମ୍ପୂର୍ଣ୍ଣ ମାଲିକାନାର ସହାୟକ କମ୍ପାନୀ ମଧ୍ୟ ଗଠନ କରିଛି। ଏହା ସହିତ ରାଜସ୍ଥାନର Mahi Banswaraରେ ୪ଟି ୭୦୦ MW ୟୁନିଟ୍‌ ବିଶିଷ୍ଟ ପ୍ରକଳ୍ପ ମଧ୍ୟ ବିକାଶ ହେଉଛି।