ନିଟ୍-ୟୁଜି ୨୦୨୬ ପ୍ରଶ୍ନପତ୍ର ଲିକ୍ ବିବାଦ ଏବଂ ପରୀକ୍ଷା ବାତିଲ ପରେ ଜାତୀୟ ପରୀକ୍ଷା ଏଜେନ୍ସି (ଏନ୍ଟିଏ) ପରୀକ୍ଷା ବ୍ୟବସ୍ଥାରେ ବ୍ୟାପକ ଗଠନାତ୍ମକ ଓ ସୁରକ୍ଷାଗତ ସଂସ୍କାର କରିଥିବା ସୁପ୍ରିମକୋର୍ଟରେ ଦାଖଲ ହୋଇଥିବା ସତ୍ୟପାଠରେ ଉଲ୍ଲେଖ କରିଛି।

ସମଗ୍ର ଭାରତ ଚିକିତ୍ସକ ସଂଘ ଏବଂ ୟୁନାଇଟେଡ୍ ଡକ୍ଟର୍ସ ଫ୍ରଣ୍ଟ ପକ୍ଷରୁ ଦାଖଲ ହୋଇଥିବା ଆବେଦନର ଶୁଣାଣି ସମୟରେ ଏନ୍ଟିଏ ଏହି ସୂଚନା ଦେଇଛି। ଆବେଦନକାରୀମାନେ ପରୀକ୍ଷା ପରିଚାଳନା ସଂସ୍ଥାରେ ବ୍ୟାପକ ସଂସ୍କାର ଦାବି କରିଛନ୍ତି।

ଏନ୍ଟିଏ କହିଛି ଯେ, ଉଚ୍ଚକ୍ଷମତାସମ୍ପନ୍ନ ପରିଚାଳନା କମିଟି ପରୀକ୍ଷା ପୂର୍ବ, ପରୀକ୍ଷା ସମୟ ଏବଂ ପରୀକ୍ଷା ପରବର୍ତ୍ତୀ ସୁରକ୍ଷା ବ୍ୟବସ୍ଥାକୁ ଆହୁରି କଡ଼ା କରିବା ପାଇଁ ଅନେକ ସୁପାରିସ କରିଥିଲା।

ଏଥିରେ ସମସ୍ତ ପରୀକ୍ଷା କେନ୍ଦ୍ରରେ ସିସିଟିଭି ଯାଞ୍ଚ, ଅତିକମରେ ୯୦ ଦିନ ପର୍ଯ୍ୟନ୍ତ ଭିଡିଓ ସଂରକ୍ଷଣ, ମକ୍ ଡ୍ରିଲ୍, ବିଦ୍ୟୁତ ବ୍ୟାକଅପ୍ ବ୍ୟବସ୍ଥା, ଜରୁରୀ ଚିକିତ୍ସା ସୁବିଧା ଓ ପାଣିପାଗ ଜନିତ ଜରୁରୀ ସ୍ଥିତି ପାଇଁ ପୂର୍ବ ପ୍ରସ୍ତୁତି ଭଳି ବ୍ୟବସ୍ଥା ସାମିଲ ରହିଛି।

ପରୀକ୍ଷା ପରେ ସିସିଟିଭି ଫୁଟେଜର ବୈଜ୍ଞାନିକ ବିଶ୍ଳେଷଣ କରାଯାଇ ସନ୍ଦିଗ୍ଧ କାର୍ଯ୍ୟକଳାପ ଚିହ୍ନଟ କରାଯିବ ବୋଲି ମଧ୍ୟ କୁହାଯାଇଛି।

ଏନ୍ଟିଏ ସୁପ୍ରିମକୋର୍ଟକୁ ଜଣାଇଛି ଯେ, ଭବିଷ୍ୟତରେ ନିଟ୍ ପରୀକ୍ଷା କମ୍ପ୍ୟୁଟର ଆଧାରିତ ପଦ୍ଧତିରେ ହେବ ନା କାଗଜ-କଲମ ଆଧାରିତ ପଦ୍ଧତିରେ ଜାରି ରହିବ, ସେନେଇ ପରବର୍ତ୍ତୀ ବୈଠକରେ ନିଷ୍ପତ୍ତି ନିଆଯିବ।

ପରୀକ୍ଷା ପରିଚାଳନାକୁ ଆହୁରି ମଜବୁତ କରିବା ପାଇଁ ସଂସ୍ଥାରେ ୧୬ଟି ନୂଆ ବରିଷ୍ଠ ପଦ ସୃଷ୍ଟି କରାଯାଇଛି। ଏଥିସହ ଆଇଆଇଟି, ବିଶ୍ୱବିଦ୍ୟାଳୟ ଅନୁଦାନ ଆୟୋଗ, ସିବିଏସଇ ଓ ଅନ୍ୟାନ୍ୟ ଶିକ୍ଷାନୁଷ୍ଠାନର ବିଶେଷଜ୍ଞଙ୍କୁ ଏହି ପ୍ରକ୍ରିୟାରେ ସାମିଲ କରାଯାଇଛି।

ଦେଶବ୍ୟାପୀ ପରୀକ୍ଷା ସୁରକ୍ଷା ଓ ସମନ୍ୱୟ ପାଇଁ ରାଜ୍ୟ ଓ ଜିଲ୍ଲା ସ୍ତରରେ ସ୍ୱତନ୍ତ୍ର ସମନ୍ୱୟ କମିଟି ମଧ୍ୟ ଗଠନ କରାଯାଇଛି।