ମିଆଁମାରରେ ଏକ ସିଭିଲିଆନ୍ ବିମାନ ଉପରେ ଡ୍ରୋନ୍ ଆକ୍ରମଣ ଘଟଣାକୁ ନେଇ ଦିଲ୍ଲୀ କୋର୍ଟରେ ବଡ଼ ଦାବି କରିଛି ଜାତୀୟ ତଦନ୍ତକାରୀ ସଂସ୍ଥା (NIA)। ଆମେରିକୀୟ ନାଗରିକ ତଥା ଭାଡ଼ାଟିଆ ଯୋଦ୍ଧା ମାଥ୍ୟୁ ଆରନ୍ ଭାନ୍ଡାଇକ୍ଙ୍କ ସମେତ ୭ ଜଣ ବିଦେଶୀ ନାଗରିକ ଏହି ଡ୍ରୋନ୍ ଆକ୍ରମଣରେ ସମ୍ପୃକ୍ତ ଥିବା NIA କୋର୍ଟକୁ କହିଛି।
ଏହି ୭ ଜଣଙ୍କ ମଧ୍ୟରେ ଭାନ୍ଡାଇକ୍ଙ୍କ ସହ ୬ ଜଣ ୟୁକ୍ରେନୀୟ ନାଗରିକ ଅଛନ୍ତି। ମାର୍ଚ୍ଚରେ ଆତଙ୍କବାଦୀ କାର୍ଯ୍ୟକଳାପ ସହ ସମ୍ପର୍କ ଅଭିଯୋଗରେ ସେମାନଙ୍କୁ ଗିରଫ କରାଯାଇଥିଲା। ବର୍ତ୍ତମାନ ସମସ୍ତେ ତିହାର ଜେଲ୍ରେ ରହୁଛନ୍ତି।
NIA ୟୁକ୍ରେନୀୟ ନାଗରିକ କାମିନସ୍କି ଭିକ୍ଟର ଏବଂ ମାଥ୍ୟୁ ଭାନ୍ଡାଇକ୍ଙ୍କୁ ଜେଲ୍ ଭିତରେ ପଚରାଉଚରା କରିବା ପାଇଁ ଦିଲ୍ଲୀ କୋର୍ଟର ଅନୁମତି ମାଗିଥିଲା। ଅଗଷ୍ଟ ୩୧ରେ କୋର୍ଟ ଏହି ଆବେଦନକୁ ଅନୁମୋଦନ କରିଥିଲେ।
NIAର ଆବେଦନ ଅନୁସାରେ, ମିଆଁମାରରେ ଏକ ସିଭିଲିଆନ୍ ବିମାନ ଉପରେ ଡ୍ରୋନ୍ ଆକ୍ରମଣରେ କିଛି ୟୁକ୍ରେନୀୟ ନାଗରିକ ଓ ଜଣେ ଆମେରିକୀୟ ନାଗରିକଙ୍କ ସମ୍ପୃକ୍ତି ଥିବା ନେଇ କେନ୍ଦ୍ର ସରକାରଙ୍କୁ ‘ବିଶ୍ୱସନୀୟ ସୂଚନା’ ମିଳିଥିଲା।
ତଦନ୍ତକାରୀ ସଂସ୍ଥାର ଦାବି ଅନୁସାରେ, ୧୪ ଜଣ ୟୁକ୍ରେନୀୟ ନାଗରିକ ବିଭିନ୍ନ ସମୟରେ ଟୁରିଷ୍ଟ ଭିସାରେ ଭାରତକୁ ଆସିଥିଲେ। ସେମାନେ ବିମାନ ଯୋଗେ ଆସାମର ଗୁଆହାଟୀ ଯାଇଥିଲେ ଏବଂ ସେଠାରୁ ବାଧ୍ୟତାମୂଳକ Restricted Area Permit (RAP) କିମ୍ବା Protected Area Permit (PAP) ବିନା ମିଜୋରାମ ଯାଇଥିବା ଅଭିଯୋଗ ହୋଇଛି।
ପରେ ସେମାନେ ବେଆଇନ ଭାବେ ମିଆଁମାର ପ୍ରବେଶ କରି ଡ୍ରୋନ୍ ଯୁଦ୍ଧ, ଡ୍ରୋନ୍ ଅପରେସନ୍, ଡ୍ରୋନ୍ ଆସେମ୍ବଲି ଓ ଜାମିଂ ଟେକ୍ନୋଲୋଜି ସମ୍ପର୍କିତ ପୂର୍ବ ନିର୍ଦ୍ଧାରିତ ତାଲିମ ନେଇଥିବା NIA ଦାବି କରିଛି।
ଏହି ତାଲିମ ମିଆଁମାରରେ ସକ୍ରିୟ Ethnic Armed Groups (EAGs) ପାଇଁ ଉଦ୍ଦିଷ୍ଟ ଥିଲା ଏବଂ ଏହି ଗୋଷ୍ଠୀଗୁଡ଼ିକ ଦେଶର ସାମରିକ ଜୁଣ୍ଟା ବିରୋଧରେ ଲଢ଼ୁଥିବା NIA କହିଛି।
ଗିରଫ ଅଭିଯୁକ୍ତଙ୍କଠାରୁ ଜବତ ହୋଇଥିବା ଇଲେକ୍ଟ୍ରୋନିକ୍ ଡିଭାଇସରୁ ମିଳିଥିବା ତଥ୍ୟର ଯାଞ୍ଚ ବେଳେ ଛବି, ଭିଡିଓ ଓ ଭଏସ୍ ସାମ୍ପଲ ଆକାରରେ ‘ଅପରାଧ ସୂଚକ ତଥ୍ୟ’ ମିଳିଥିବା NIA କୋର୍ଟକୁ କହିଛି।
ତଦନ୍ତର ଅଂଶ ଭାବେ ଏହି ତଥ୍ୟକୁ ଗିରଫ ଅଭିଯୁକ୍ତଙ୍କ ସମ୍ମୁଖରେ ରଖି ତାଙ୍କ ବୟାନ ସହ ଏହାର ସମ୍ପର୍କ ଯାଞ୍ଚ ଓ ପୁଷ୍ଟି କରିବା ଆବଶ୍ୟକ ବୋଲି NIA ଦର୍ଶାଇଛି।
NIAର ଆବେଦନକୁ ଅନୁମତି ଦେବା ବେଳେ ଦିଲ୍ଲୀ କୋର୍ଟ କହିଥିଲେ ଯେ ଏପରି ପଚରାଉଚରାକୁ ରୋକିବା ପାଇଁ କୌଣସି ନିର୍ଦ୍ଦିଷ୍ଟ ଆଇନ କିମ୍ବା ରାୟ ନାହିଁ। ଚାଲୁଥିବା ତଦନ୍ତରେ ସାଧାରଣତଃ କୋର୍ଟ ହସ୍ତକ୍ଷେପ କରିବା ଉଚିତ ନୁହେଁ ବୋଲି ମଧ୍ୟ କୋର୍ଟ କହିଛନ୍ତି।
ତେବେ ଅଭିଯୁକ୍ତଙ୍କ ପକ୍ଷର ଓକିଲ NIAର ଏହି ପର୍ଯ୍ୟାୟରେ ପଚରାଉଚରା ଦାବିକୁ ବିରୋଧ କରିଥିଲେ। ଏହି ନିଷ୍ପତ୍ତି ପଛରେ ପର୍ଯ୍ୟାପ୍ତ ଆଇନଗତ କିମ୍ବା ତଥ୍ୟଗତ ଆଧାର ନଥିବା ଡିଫେନ୍ସ ପକ୍ଷରୁ ଦାବି କରାଯାଇଥିଲା।
ମାର୍ଚ୍ଚରେ NIA ତିନୋଟି ସହରର ତିନୋଟି ବିମାନବନ୍ଦରରୁ ୭ ଜଣ ବିଦେଶୀ ନାଗରିକଙ୍କୁ ଗିରଫ କରିଥିଲା। ଭାନ୍ଡାଇକ୍ଙ୍କୁ କୋଲକାତାରୁ ଗିରଫ କରାଯାଇଥିବା ବେଳେ ୬ ଜଣ ୟୁକ୍ରେନୀୟଙ୍କ ମଧ୍ୟରୁ ୩ ଜଣଙ୍କୁ ଲକ୍ଷ୍ନୌ ଓ ୩ ଜଣଙ୍କୁ ଦିଲ୍ଲୀରୁ ଧରାଯାଇଥିଲା।
NIAର ଅଭିଯୋଗ ଅନୁସାରେ, ଭାନ୍ଡାଇକ୍ ଓ ୟୁକ୍ରେନୀୟ ନାଗରିକମାନେ EAGs ସହ ଯୋଗାଯୋଗ କରି ତାଲିମ କାର୍ଯ୍ୟକଳାପରେ ସାମିଲ ହୋଇଥିଲେ। ଏହି EAGsର ଉତ୍ତର-ପୂର୍ବ ଭାରତର ବିଦ୍ରୋହୀ ସଂଗଠନଗୁଡ଼ିକ ସହ ସମ୍ପର୍କ ଥିବା ମଧ୍ୟ ତଦନ୍ତକାରୀ ସଂସ୍ଥା ଅଭିଯୋଗ କରିଛି।
ଏହା ପୂର୍ବରୁ ଭାନ୍ଡାଇକ୍ ତିହାର ଜେଲ୍ର ଖାଦ୍ୟକୁ ନେଇ ଦିଲ୍ଲୀ କୋର୍ଟର ଦ୍ୱାରସ୍ଥ ହୋଇଥିଲେ। ଜେଲ୍ର ଅଧିକ ମସଲାଯୁକ୍ତ ଓ ତେଲିଆ ଖାଦ୍ୟ ଯୋଗୁଁ ଏକ ମାସରୁ ଅଧିକ ସମୟ ଧରି ଖାଇପାରୁନଥିବା ଦାବି କରି ସେ ଜେଲ୍ ଭିତରେ ନିଜେ ଖାଦ୍ୟ ପ୍ରସ୍ତୁତ କରିବାକୁ ଅନୁମତି ମାଗିଥିଲେ।
ଭାରତୀୟ କ୍ରିକେଟ୍ ଦଳର ଷ୍ଟାର୍ ଖେଳାଳି ବିରାଟ କୋହଲି ପୁଣି...
କର୍କଟ ରୋଗର ଚିକିତ୍ସା ଖର୍ଚ୍ଚ ଅନେକ ପରିବାର ପାଇଁ ବଡ଼ ଆର...
ରୋହିତ-କୋହଲିଙ୍କ ପ୍ରତ୍ୟାବର୍ତ୍ତନ, ନ୍ୟୁଜିଲାଣ୍ଡ ବିପକ୍ଷର...
ସୁସ୍ଥ ରହିବା ପାଇଁ ପ୍ରତିଦିନ ସପ୍ଲିମେଣ୍ଟ ଖାଇବା ଜରୁରୀ କ...
‘ଅରାଜକତା ହଟାଅ, ଗଣତନ୍ତ୍ର ବଞ୍ଚାଅ’ ସ୍ଲୋଗା...
ଭାରତୀୟ କ୍ରିକେଟ୍ର ଷ୍ଟାର୍ ବ୍ୟାଟର୍ ବିରାଟ କୋହଲି ପୁଣିଥର...
ଭାରତୀୟ କ୍ରିକେଟ୍‌ର ରନ୍‌ମେସିନ୍ ବିରାଟ କୋହଲି...
ଗବେଷଣା ଓ ଉଚ୍ଚଶିକ୍ଷା କ୍ଷେତ୍ରରେ ନୂଆ ସହଯୋଗ ଉଚ୍ଚଶିକ...
