ବ୍ରିଜଟାଉନରେ ଖେଳାଯାଇଥିବା ପାଞ୍ଚ ମ୍ୟାଚ୍‌ ବିଶିଷ୍ଟ ଦିନିକିଆ ଶୃଙ୍ଖଳାର ଚତୁର୍ଥ ମ୍ୟାଚ୍‌ରେ ନ୍ୟୁଜିଲାଣ୍ଡ ରୋମାଞ୍ଚକ ମୁକାବିଲାରେ ୱେଷ୍ଟଇଣ୍ଡିଜ୍‌କୁ ୧ ୱିକେଟ୍‌ରେ ପରାସ୍ତ କରିଛି। ଏହି ବିଜୟ ସହ କିୱି ଦଳ ସିରିଜ୍‌ରେ ୩-୧ରେ ଅଗ୍ରଣୀ ହୋଇପାରିଛି।

ଟସ୍‌ ହାରି ପ୍ରଥମେ ବ୍ୟାଟିଂ କରିଥିବା ୱେଷ୍ଟଇଣ୍ଡିଜ୍‌ ଦଳ ୪୪.୪ ଓଭରରେ ୧୮୮ ରନ୍‌ରେ ଅଲଆଉଟ୍‌ ହୋଇଯାଇଥିଲା। ଅମୀର ଜାଙ୍ଗୁ ଅର୍ଦ୍ଧଶତକ ହାସଲ କରିଥିବା ବେଳେ ଗୁଡାକେଶ ମୋତି ୪୧ ରନ୍‌ ଓ ଆକିମ୍‌ ଅଗଷ୍ଟି ୩୩ ରନ୍‌ର ଅବଦାନ ରଖିଥିଲେ।

ନ୍ୟୁଜିଲାଣ୍ଡ ପକ୍ଷରୁ ମାଥ୍ୟୁ ଫିସର୍‌ ୩ଟି ୱିକେଟ୍‌ ନେଇ ସର୍ବାଧିକ ସଫଳ ବୋଲର ହୋଇଥିଲେ। ମାଇକେଲ୍ ବ୍ରେସୱେଲ୍‌ ଓ ମିଚେଲ୍ ସାଣ୍ଟନର୍‌ ୨ଟି ଲେଖାଏଁ ୱିକେଟ୍‌ ନେଇ ଦଳକୁ ଶକ୍ତିଶାଳୀ ସ୍ଥିତିରେ ରଖିଥିଲେ।

୧୮୯ ରନ୍‌ର ସହଜ ଲକ୍ଷ୍ୟକୁ ପିଛା କରିବାକୁ ଓହ୍ଲାଇଥିବା ନ୍ୟୁଜିଲାଣ୍ଡର ଆରମ୍ଭ ଅତ୍ୟନ୍ତ ଖରାପ ରହିଥିଲା। ଦଳ ଖାତା ଖୋଲିବା ପୂର୍ବରୁ ପ୍ରଥମ ୱିକେଟ୍‌ ହରାଇଥିବା ବେଳେ ୬ ରନ୍‌ରେ ଦ୍ୱିତୀୟ ଓ ୪୬ ରନ୍‌ରେ ତୃତୀୟ ୱିକେଟ୍‌ ହରାଇଥିଲା।

ଏହି ସମୟରେ ମାର୍କ ଚାପମ୍ୟାନ୍‌ ଦାୟିତ୍ୱପୂର୍ଣ୍ଣ ବ୍ୟାଟିଂ କରି ୮୦ ରନ୍‌ର ଲଢ଼ୁଆ ପାଳି ଖେଳିଥିଲେ। ସେ ମାଇକେଲ୍ ବ୍ରେସୱେଲ୍‌ (୩୨) ଓ ମିଚେଲ୍ ସାଣ୍ଟନରଙ୍କ ସହ ଉପଯୋଗୀ ଭାଗୀଦାରି ଗଢ଼ି ଦଳକୁ ବିଜୟ ଆଡ଼କୁ ନେଇଥିଲେ।

କିନ୍ତୁ ବ୍ରେସୱେଲ୍‌ ଆଉଟ୍‌ ହେବା ପରେ ନ୍ୟୁଜିଲାଣ୍ଡ ପୁଣି ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇ ୧୮୦ ରନ୍‌ରେ ୯ଟି ୱିକେଟ୍‌ ହରାଇଥିଲା। ଶେଷ ୱିକେଟ୍‌ରେ ବିଜୟ ପାଇଁ ୯ ରନ୍‌ ଆବଶ୍ୟକ ଥିବାବେଳେ ମିଚେଲ୍ ସାଣ୍ଟନର୍‌ ଅପରାଜିତ ୩୪ ରନ୍‌ର ଗୁରୁତ୍ୱପୂର୍ଣ୍ଣ ପାଳି ଖେଳି ଦଳକୁ ସ୍ମରଣୀୟ ବିଜୟ ଦେଇଥିଲେ।