ଗଞ୍ଜାମ: ବାତ୍ୟା ଓ ବନ୍ୟାରେ କ୍ଷତିଗ୍ରସ୍ତ ଚାଷୀ ଓ ସାଧାରଣ ଲୋକଙ୍କ ଦୁର୍ଦ୍ଦଶା ଦେଖି ଭାବବିହ୍ୱଳ ହୋଇଛନ୍ତି ବିରୋଧୀ ଦଳ ନେତା ତଥା ବିଜେଡି ସଭାପତି ନବୀନ ପଟ୍ଟନାୟକ। ଶନିବାର ଗଞ୍ଜାମ ଜିଲ୍ଲାର ବନ୍ୟା ପ୍ରଭାବିତ ଅଞ୍ଚଳ ଗସ୍ତ କରି ସେ କ୍ଷୟକ୍ଷତିର ସ୍ଥିତି ପରଖିବା ସହ ବିପନ୍ନଙ୍କ ସହ ଆଲୋଚନା କରିଥିଲେ। ପ୍ରଭାବିତ ଚାଷୀଙ୍କୁ ତୁରନ୍ତ କ୍ଷତିପୂରଣ ଦେବାକୁ ସେ ରାଜ୍ୟ ସରକାରଙ୍କୁ ଦାବି କରିଛନ୍ତି।

ଶେରଗଡ଼ରୁ ଆରମ୍ଭ ହେଲା ଗସ୍ତ

ନବୀନ ପଟ୍ଟନାୟକ ପ୍ରଥମେ ଶେରଗଡ଼ ଅଞ୍ଚଳରେ ପହଞ୍ଚି ବନ୍ୟା କ୍ଷୟକ୍ଷତିର ସ୍ଥିତି ଦେଖିଥିଲେ। ଏହି ସମୟରେ ଚାଷୀମାନେ ନଷ୍ଟ ହୋଇଥିବା ଧାନ କେଣ୍ଡା ଦେଖାଇ ନିଜ ଦୁଃଖ ଜଣାଇଥିଲେ। ବନ୍ୟା ଯୋଗୁଁ ଧାନ ସହ ଆଖୁ ଫସଲର ମଧ୍ୟ ବ୍ୟାପକ କ୍ଷତି ହୋଇଥିବା ଚାଷୀମାନେ କହିଥିଲେ। ବିପନ୍ନଙ୍କ ଦୁଃଖ ଶୁଣି ନବୀନ ଭାବବିହ୍ୱଳ ହୋଇପଡ଼ିଥିବା ଦେଖିବାକୁ ମିଳିଥିଲା।

ହିଞ୍ଜିଳି, ଆସିକା ଓ ସୋରଡ଼ାରେ ସ୍ଥିତି ଅନୁଧ୍ୟାନ

ଶେରଗଡ଼ ପରେ ନବୀନ ନିଜ ନିର୍ବାଚନମଣ୍ଡଳୀ ହିଞ୍ଜିଳି ସମେତ ହିଞ୍ଜିଳିକାଟୁ ବ୍ଲକ୍ର ନୂଆବୁରୁପଡ଼ା ଗ୍ରାମ ପଞ୍ଚାୟତ ଗସ୍ତ କରିଥିଲେ। ପରେ ଆସିକା ଓ ସୋରଡ଼ା ବ୍ଲକ୍ର ବାଲିଗୋଛା ଅଞ୍ଚଳକୁ ଯାଇ ବନ୍ୟା କ୍ଷୟକ୍ଷତି ଦେଖିଥିଲେ। ଏହି ଅଞ୍ଚଳଗୁଡ଼ିକରେ ଫସଲ ନଷ୍ଟ ହେବା ସହ କେତେକ ସ୍ଥାନରେ ସ୍କୁଲ ଘର ମଧ୍ୟ କ୍ଷତିଗ୍ରସ୍ତ ହୋଇଥିବା ରିପୋର୍ଟରେ ଉଲ୍ଲେଖ ରହିଛି। ସେ ସରକାରଙ୍କ ପକ୍ଷରୁ ଚାଲିଥିବା ପୁନରୁଦ୍ଧାର କାମର ମଧ୍ୟ ସମୀକ୍ଷା କରିଥିଲେ।

ତୁରନ୍ତ କ୍ଷତିପୂରଣ ଦେବାକୁ ଦାବି

ଗସ୍ତ ଶେଷରେ ସୋରଡ଼ାଠାରେ ଗଣମାଧ୍ୟମକୁ ନବୀନ କହିଥିଲେ ଯେ ଶେରଗଡ଼ ଓ ହିଞ୍ଜିଳିରେ ଚାଷୀମାନେ ଅତ୍ୟନ୍ତ ଦୁର୍ଦ୍ଦଶାରେ ଅଛନ୍ତି ଏବଂ ସେମାନଙ୍କୁ ତୁରନ୍ତ ସହାୟତା ଆବଶ୍ୟକ। ବିପନ୍ନମାନେ ଜଣାଇଥିବା ଦୁଃଖ ଓ ଅଭିଯୋଗ ସେ ସରକାରଙ୍କୁ ଜଣାଇବେ ବୋଲି କହିଥିଲେ। ଏପର୍ଯ୍ୟନ୍ତ ବନ୍ୟା ବିପନ୍ନମାନେ ଉପଯୁକ୍ତ ସହାୟତା ପାଇନଥିବା ମଧ୍ୟ ସେ ଅଭିଯୋଗ କରିଥିଲେ।

ଅନ୍ୟପକ୍ଷରେ, ତୁରନ୍ତ କ୍ଷତିପୂରଣ ନମିଳିଲେ ଆଗାମୀ ଦିନରେ ଆନ୍ଦୋଳନ କରାଯିବ ବୋଲି ଗଞ୍ଜାମ ଜିଲ୍ଲା ବିଜେଡି ସଭାପତି ବିକ୍ରମ ପଣ୍ଡା କହିଛନ୍ତି।