ଲୋକପ୍ରିୟ କ୍ରାଇମ୍-ଡ୍ରାମା ୱେବ୍ ସିରିଜ୍ ‘ମିର୍ଜାପୁର’ର ଦୁନିଆ ଏବେ ବଡ଼ ପରଦାରେ ଦେଖିବାକୁ ମିଳିବ। ‘ମିର୍ଜାପୁର: ଦ ମୁଭି’ର ବହୁ ପ୍ରତୀକ୍ଷିତ ଟିଜର ମୁକ୍ତି ପାଇଛି, ଯାହା ଦର୍ଶକଙ୍କ ମଧ୍ୟରେ ବେଶ୍ ଉତ୍ସାହ ସୃଷ୍ଟି କରିଛି।

ଫିଲ୍ମଟି ୱେବ୍ ସିରିଜ୍ର କାହାଣୀ ପୂର୍ବର ଘଟଣାକୁ କେନ୍ଦ୍ର କରି ନିର୍ମିତ ହୋଇଛି। ଏହା ଏକ ପ୍ରିକ୍ୱେଲ୍ ଭାବେ କାମ କରିବ ଏବଂ ଦର୍ଶକଙ୍କୁ ଦେଖାଇବ ଯେ କିପରି ମିର୍ଜାପୁରର ଅପରାଧିକ ସାମ୍ରାଜ୍ୟ ଗଢ଼ିଉଠିଥିଲା।

ଟିଜରରେ ପଙ୍କଜ ତ୍ରିପାଠୀଙ୍କ କାଲିନ୍ ଭୈୟା ଚରିତ୍ରକୁ ପୁଣିଥରେ ଦେଖିବାକୁ ମିଳିଛି। ସେ ନିଜ ପୁଅ ମୁନ୍ନା ଟ୍ରିପାଠୀ ତାଙ୍କ ସାମ୍ରାଜ୍ୟର ଉତ୍ତରାଧିକାରୀ ହୋଇପାରିବ କି ନାହିଁ, ସେଥିପାଇଁ ଚିନ୍ତିତ ଥିବା ଦେଖାଯାଇଛି।

ଅନ୍ୟପଟେ, ଗୁଡ୍ଡୁ ପଣ୍ଡିତ ଓ ବବଲୁ ପଣ୍ଡିତଙ୍କ ଯାତ୍ରା ଟ୍ରିପାଠୀ ପରିବାରର ଶାସନକୁ ଚ୍ୟାଲେଞ୍ଜ କରିବା ଦିଗରେ ଆଗୁଆ ବଢ଼ୁଥିବା ଟିଜରରେ ଦେଖାଯାଇଛି।

ସିରିଜ୍ର ଦ୍ୱିତୀୟ ସିଜନରେ ମୁନ୍ନା ଟ୍ରିପାଠୀଙ୍କ ମୃତ୍ୟୁ ହୋଇଥିଲେ ମଧ୍ୟ, ପ୍ରିକ୍ୱେଲ୍ କାହାଣୀ ହେତୁ ଏହି ଫିଲ୍ମରେ ସେ ପୁଣି ଫେରିଛନ୍ତି। ଦିବ୍ୟେନ୍ଦୁ ଏହି ଚରିତ୍ରରେ ପୁଣିଥରେ ନଜର ଆସିବେ।

ଏଥିସହ ବବଲୁ ପଣ୍ଡିତ ଚରିତ୍ରରେ ଏଥର ବିକ୍ରାନ୍ତ ମାସେଙ୍କ ପରିବର୍ତ୍ତେ ଜିତେନ୍ଦ୍ର କୁମାର ଅଭିନୟ କରୁଛନ୍ତି। ଟିଜରରେ ତାଙ୍କ ଝଲକ ମଧ୍ୟ ଦେଖିବାକୁ ମିଳିଛି।

ଫିଲ୍ମରେ ରବି କିଶନଙ୍କ ଏକ ନୂଆ ଏବଂ ପ୍ରଭାବଶାଳୀ ଚରିତ୍ର ମଧ୍ୟ ରହିଛି, ଯାହା ଦର୍ଶକଙ୍କ ଆଗ୍ରହକୁ ଆହୁରି ବଢ଼ାଇଛି।

ଟିଜର ମୁକ୍ତି ପରେ ସୋସିଆଲ ମିଡିଆରେ ମୁନ୍ନା ଟ୍ରିପାଠୀଙ୍କ ଫେରାକୁ ନେଇ ପ୍ରଶଂସକମାନେ ଉତ୍ସାହିତ ହୋଇପଡ଼ିଛନ୍ତି। ଅନେକ ଫ୍ୟାନ୍ ଏହାକୁ ଫିଲ୍ମର ସବୁଠାରୁ ବଡ଼ ଆକର୍ଷଣ ବୋଲି କହିଛନ୍ତି।

ନିର୍ମାତାମାନେ ସୂଚନା ଦେଇଛନ୍ତି ଯେ, ‘ମିର୍ଜାପୁର: ଦ ମୁଭି’ ଆସନ୍ତା ସେପ୍ଟେମ୍ବରରେ ପ୍ରେକ୍ଷାଳୟରେ ମୁକ୍ତିଲାଭ କରିବ। ଫିଲ୍ମଟିରେ ପୁଣିଥରେ ‘ଭୌକାଲ’ର ଜବରଦସ୍ତ ଡୋଜ୍ ଦେଖିବାକୁ ମିଳିବ ବୋଲି ନିର୍ମାତାମାନେ ଦାବି କରିଛନ୍ତି।