ମୟୂରଭଞ୍ଜ ଜିଲ୍ଲାରୁ ଆସିଛି ଏକ ଅତ୍ୟନ୍ତ ଦୁଃଖଦ ଓ ଚିନ୍ତାଜନକ ଘଟଣା। ଚରମ ଦାରିଦ୍ର୍ୟ ଓ ଆର୍ଥିକ ସମସ୍ୟା ମଧ୍ୟରେ ଜଣେ ବାପା ନିଜ ୪ ବର୍ଷର ପୁଅର ଜୀବନ ନେଇଥିବା ଅଭିଯୋଗ ହୋଇଛି।

ଘଟଣାଟି ସାରତ ଥାନା ଅଧୀନ ପୁରୁଣାପାଣି ଗାଁରେ ଘଟିଛି। ପୋଲିସ ସୂଚନା ଅନୁସାରେ, ଅଭିଯୁକ୍ତ ବାପା ସୋହନ ସିଂହ ଗୁରୁବାର ଦିନ ମା’ଙ୍କ କୋଳରୁ ତାଙ୍କ ୪ ବର୍ଷର ପୁଅ ଡୁମ୍ବି ସିଂହଙ୍କୁ ଛଡ଼ାଇ ନେଇଥିଲେ। ପରେ ଏକ ଧାରୁଆ ଅସ୍ତ୍ରରେ ଆକ୍ରମଣ କରିବାରୁ ଘଟଣାସ୍ଥଳରେ ଶିଶୁଟିର ମୃତ୍ୟୁ ହୋଇଥିଲା।

ଘଟଣା ପରେ ସାରତ ପୋଲିସ ଅଭିଯୁକ୍ତ ସୋହନ ସିଂହଙ୍କୁ ଗିରଫ କରି ପଚରାଉଚରା କରିଥିଲା। ପୋଲିସ ଅନୁସାରେ, ପଚରାଉଚରା ସମୟରେ ସେ ଅପରାଧ ସ୍ୱୀକାର କରିଥିବା କୁହାଯାଇଛି। ଅତ୍ୟଧିକ ଆର୍ଥିକ ଅଭାବ ଓ ପରିବାରର ଭରଣପୋଷଣ କରିପାରୁନଥିବା ଚାପ ଯୋଗୁଁ ସେ ଏପରି ପଦକ୍ଷେପ ନେଇଥିବା କହିଥିବା ପୋଲିସ ଜଣାଇଛି।

ସୋହନ ସିଂହଙ୍କର ୫ ଜଣ ସନ୍ତାନ ଥିବା ବେଳେ ଦାରିଦ୍ର୍ୟ ମଧ୍ୟରେ ପରିବାର ଚଳାଇବା ପାଇଁ ସେ ସଂଘର୍ଷ କରୁଥିଲେ। ଆର୍ଥିକ ଚାପ ସହ ତାଙ୍କର ମାନସିକ ସମସ୍ୟା ମଧ୍ୟ ଥିବା ସନ୍ଦେହ କରୁଛି ପୋଲିସ।

ସାରତ ଥାନା ଆଇଆଇସି ରାମାକାନ୍ତ ପାତ୍ର କହିଛନ୍ତି ଯେ, ଘଟଣାର ସମସ୍ତ ଦିଗକୁ ନେଇ ତଦନ୍ତ ଚାଲିଛି। ଏହି ଘଟଣା ପୁରୁଣାପାଣି ଗାଁରେ ଶୋକର ଛାୟା ଖେଳାଇ ଦେଇଛି।

ଏହି ଘଟଣା ଦାରିଦ୍ର୍ୟ, ମାନସିକ ଚାପ ଓ ସାମାଜିକ ସୁରକ୍ଷାର ଆବଶ୍ୟକତା ନେଇ ଅନେକ ପ୍ରଶ୍ନ ଉଠାଇଛି।