ପଶ୍ଚିମବଙ୍ଗର ପୂର୍ବତନ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ୨୦୨୧ ନନ୍ଦିଗ୍ରାମ ନିର୍ବାଚନ ସମୟର ଗୋଡ଼ ଆଘାତ ଘଟଣାକୁ ନେଇ ପୁଣିଥରେ ରାଜନୈତିକ ବିବାଦ ଦେଖାଦେଇଛି। ତାଙ୍କ ମେଡିକାଲ ରେକର୍ଡ ସାର୍ବଜନୀନ ହେବାକୁ ନେଇ ମମତାଙ୍କ ଓକିଲ ଅର୍କ ନାଗ SSKM ହସ୍ପିଟାଲ ଓ ବାଙ୍ଗୁର ଇନଷ୍ଟିଚ୍ୟୁଟ୍ ଅଫ୍ ନ୍ୟୁରୋସାଇନ୍ସେସ୍‌କୁ ଆଇନଗତ ନୋଟିସ୍ ପଠାଇଛନ୍ତି। ଏହାର ଏକ କପି ରାଜ୍ୟ ସ୍ୱାସ୍ଥ୍ୟ ବିଭାଗର ପ୍ରିନ୍ସିପାଲ ସେକ୍ରେଟାରୀଙ୍କୁ ମଧ୍ୟ ପଠାଯାଇଛି। 

ନୋଟିସ୍‌ରେ ପ୍ରଶ୍ନ କରାଯାଇଛି ଯେ ମମତାଙ୍କ ୨୦୨୧ର ମେଡିକାଲ ରେକର୍ଡ କିପରି ବର୍ତ୍ତମାନର ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ସୁବେନ୍ଦୁ ଅଧିକାରୀଙ୍କ ନିକଟରେ ପହଞ୍ଚିଲା ଏବଂ ପରେ ସାର୍ବଜନୀନ ହେଲା। ଯଦି ରେକର୍ଡଗୁଡ଼ିକ ଆଇନସମ୍ମତ ଭାବେ ହାସଲ କରାଯାଇଥିଲା, ତେବେ ତାହାକୁ ସାର୍ବଜନୀନ କରିବା ପାଇଁ କୌଣସି କୋର୍ଟ ଆଦେଶ ଥିଲା କି ନାହିଁ, ସେନେଇ ମଧ୍ୟ ସ୍ପଷ୍ଟୀକରଣ ମଗାଯାଇଛି। 

ଏହି ବିବାଦର ମୂଳ ୨୦୨୧ ମାର୍ଚ୍ଚ ୧୦ ତାରିଖର ଘଟଣା। ନନ୍ଦିଗ୍ରାମରେ ନିର୍ବାଚନ ପ୍ରଚାର ସମୟରେ ମମତା ଆହତ ହୋଇଥିଲେ ଏବଂ ପରେ ହ୍ୱିଲଚେୟାରରେ ପ୍ରଚାର କରିଥିଲେ। ନିକଟରେ ସୁବେନ୍ଦୁ ଅଧିକାରୀ ୨୦୨୧ ମାର୍ଚ୍ଚ ୧୧ର ବାଙ୍ଗୁର ଇନଷ୍ଟିଚ୍ୟୁଟ୍‌ର ଏକ ରେଡିଓଲୋଜି ରିପୋର୍ଟ ଦେଖାଇ ଏଥିରେ ଫ୍ରାକ୍ଚର କିମ୍ବା ଡିସ୍ଲୋକେସନ୍‌ର ପ୍ରମାଣ ନଥିବା ଦାବି କରିଥିଲେ। ଏହାକୁ ଆଧାର କରି ସେ ମାମଲାରେ ନୂଆ ତଦନ୍ତ କରାଯିବ ବୋଲି କହିଛନ୍ତି। 

ତେବେ ମମତାଙ୍କ ଓକିଲଙ୍କ ଦାବି ହେଉଛି, ମେଡିକାଲ ରେକର୍ଡ ବ୍ୟକ୍ତିଗତ ଓ ଗୋପନୀୟ ତଥ୍ୟ। ଅନୁମତି ବିନା ଏହାକୁ ପ୍ରକାଶ କରାଯାଇଥିଲେ ମେଡିକାଲ କନ୍ଫିଡେନ୍ସିଆଲିଟି ନିୟମ ଉଲ୍ଲଂଘନ ହୋଇଥାଇପାରେ। ନୋଟିସ୍‌ରେ ପ୍ରକାଶିତ ଦଲିଲଗୁଡ଼ିକ ମୂଳ ମେଡିକାଲ ରେକର୍ଡ କି ନୁହେଁ, ସେନେଇ ମଧ୍ୟ ସ୍ପଷ୍ଟୀକରଣ ମଗାଯାଇଛି।