ବିହାରରେ ରବିବାର ସକାଳେ ଏକ ବଡ଼ ରେଳ ଦୁର୍ଘଟଣା ଅଳ୍ପକେ ଟଳିଛି। ଆରା ରେଳ ଷ୍ଟେସନ୍‌ରୁ ଛାଡ଼ିବାର କିଛି ସମୟ ପରେ ସିକ୍କିମ୍ ମହାନନ୍ଦା ଏକ୍ସପ୍ରେସ୍‌ର ୨ଟି ଚକ ଟ୍ରାକ୍‌ରୁ ଖସିଯାଇଥିଲା। ତେବେ ଘଟଣାରେ କୌଣସି ଯାତ୍ରୀ ଆହତ ହୋଇନଥିବା ଜଣାପଡ଼ିଛି।

୧୫୪୮୩ ନମ୍ବର ଟ୍ରେନ୍‌ ଦିଲ୍ଲୀ ଅଭିମୁଖେ ଯାଉଥିଲା। ରବିବାର ଭୋର ପ୍ରାୟ ୪ଟା ୧୦ ମିନିଟ୍‌ରେ ଏହା ଆରା ଷ୍ଟେସନ୍‌ର ପ୍ଲାଟଫର୍ମ ନମ୍ବର ୨ରୁ ଛାଡ଼ିଥିଲା। ପ୍ଲାଟଫର୍ମ ଅତିକ୍ରମ କରିବା ପରେ ଯାତ୍ରୀମାନେ ଏକ ଜୋରଦାର ଶବ୍ଦ ଶୁଣିବା ସହ ଟ୍ରେନ୍‌ରେ ଜୋର ଝଟକା ଅନୁଭବ କରିଥିଲେ।

ଘଟଣା ସମୟରେ ଅନେକ ଯାତ୍ରୀ ଶୋଇଥିଲେ। ହଠାତ୍ ଶବ୍ଦ ଓ ଝଟକା ପରେ କିଛି ସମୟ ପାଇଁ ଟ୍ରେନ୍‌ରେ ଆତଙ୍କ ସୃଷ୍ଟି ହୋଇଥିଲା। ପରେ ଟ୍ରେନ୍‌ର ୨ଟି ଚକ ଟ୍ରାକ୍‌ରୁ ଖସିଥିବା ଜଣାପଡ଼ିଥିଲା।

ଯାତ୍ରୀମାନଙ୍କ କହିବା ଅନୁସାରେ, ଟ୍ରେନ୍‌ଟି ନିୟନ୍ତ୍ରିତ ବେଗରେ ଚାଲୁଥିବାରୁ ବଡ଼ ଦୁର୍ଘଟଣା ଟଳିଯାଇଥିଲା।

ରେଳ ଚଳାଚଳ ପ୍ରଭାବିତ

ଘଟଣା ପରେ ଅପ୍ ଲାଇନ୍‌ରେ ପ୍ରାୟ ଅଢ଼େଇରୁ ୩ ଘଣ୍ଟା ପର୍ଯ୍ୟନ୍ତ ଟ୍ରେନ୍ ଚଳାଚଳ ପ୍ରଭାବିତ ହୋଇଥିଲା। ରେଳ ବିଭାଗର ବୈଷୟିକ ଟିମ୍ ଘଟଣାସ୍ଥଳରେ ପହଞ୍ଚି ଟ୍ରାକ୍‌ରୁ ଖସିଥିବା ଚକଗୁଡ଼ିକୁ ପୁଣି ଟ୍ରାକ୍‌କୁ ଆଣିବା ଏବଂ ରେଳ ଚଳାଚଳ ସ୍ୱାଭାବିକ କରିବା ପାଇଁ କାମ ଆରମ୍ଭ କରିଥିଲେ।

ଦାନାପୁର ରେଳ ଡିଭିଜନ୍‌ର Additional Divisional Railway Manager ରାଜୀବ କୁମାରଙ୍କ ସମେତ ବରିଷ୍ଠ ଅଧିକାରୀମାନେ ଘଟଣାସ୍ଥଳରେ ପହଞ୍ଚି ସ୍ଥିତି ସମୀକ୍ଷା କରିଥିଲେ।

ଦୁର୍ଘଟଣାର କାରଣ ଅସ୍ପଷ୍ଟ

ଆରା ଷ୍ଟେସନ୍ ମ୍ୟାନେଜର ଏନ୍.କେ. ରାୟଙ୍କ ସୂଚନା ଅନୁସାରେ, ପ୍ଲାଟଫର୍ମ ନମ୍ବର ୨ ଅତିକ୍ରମ କରିବାର କିଛି ସମୟ ପରେ ଟ୍ରେନ୍‌ର ଆଗ ଭାଗର AC କୋଚ୍ ଓ ଏକ ସାଧାରଣ କୋଚ୍ ନିକଟରେ ଚକ ଲାଇନଚ୍ୟୁତ ହୋଇଥିଲା।

ତେବେ ଘଟଣାର ପ୍ରକୃତ କାରଣ ତୁରନ୍ତ ଜଣାପଡ଼ିନାହିଁ। ଟ୍ରାକ୍‌ରେ ବୈଷୟିକ ତ୍ରୁଟି, ଟ୍ରେନ୍‌ରେ ସମସ୍ୟା କିମ୍ବା ଅନ୍ୟ କୌଣସି କାରଣ ଯୋଗୁଁ ଏହା ଘଟିଛି କି ନାହିଁ, ରେଳ ଅଧିକାରୀମାନେ ଯାଞ୍ଚ କରୁଛନ୍ତି।

ରେଳ ବିଭାଗ ପକ୍ଷରୁ ଯାତ୍ରୀମାନେ ସୁରକ୍ଷିତ ଥିବା ଏବଂ କୌଣସି ମୃତାହତ ହୋଇନଥିବା ସ୍ପଷ୍ଟ କରାଯାଇଛି।