କେନ୍ଦୁଝର: ବର୍ଷା ଆସିଲେ କାଦୁଅ ଓ ପିଛଳ ରାସ୍ତା ଛାତ୍ରଛାତ୍ରୀଙ୍କ ପାଇଁ ପାଲଟୁଛି ବଡ଼ ସମସ୍ୟା। କେନ୍ଦୁଝର ସଦର ବ୍ଲକ ଅଧୀନ ରତନପୁର ଗାଁରେ ଏଭଳି ସମସ୍ୟା ଦେଖିବାକୁ ମିଳିଛି। ଗାଁରୁ ସ୍କୁଲକୁ ଯିବା ରାସ୍ତା ବର୍ଷା ହେଲେ କାଦୁଅମୟ ହୋଇଯାଉଥିବାରୁ ପ୍ରତିଦିନ ଛାତ୍ରଛାତ୍ରୀଙ୍କୁ ନାନା ସମସ୍ୟା ମଧ୍ୟରେ ସ୍କୁଲ ଯିବାକୁ ପଡ଼ୁଛି।

ଗ୍ରାମବାସୀଙ୍କ ଅଭିଯୋଗ ଅନୁସାରେ, ୧୯୬୩ ମସିହାରୁ ଗାଁକୁ ଏକ ପକ୍କା ରାସ୍ତା ନାହିଁ। ଏହି ରାସ୍ତା ଦେଇ ସ୍କୁଲ ପିଲାଙ୍କ ସହ ଗ୍ରାମବାସୀ ଓ ରୋଗୀମାନେ ମଧ୍ୟ ଯାତାୟାତ କରୁଛନ୍ତି। ବର୍ଷା ଦିନେ ରାସ୍ତାଟି ଅତ୍ୟନ୍ତ ପିଛଳ ହୋଇଯାଉଥିବାରୁ ଏହାକୁ ଅତିକ୍ରମ କରିବା କଷ୍ଟକର ହୋଇପଡ଼ୁଛି।

କାଦୁଅ ରାସ୍ତାରେ ସ୍କୁଲ ଯାଉଛନ୍ତି ପିଲା

ପ୍ରବଳ ବର୍ଷା ହେଲେ ସ୍ଥିତି ଆହୁରି ଖରାପ ହୋଇଯାଉଛି। ଅନେକ ପିଲା କାଦୁଅ ରାସ୍ତାରେ ଚାଲିବା ସମୟରେ ଖସିପଡ଼ି କାଦୁଅରେ ଲଟପଟ ହେଉଥିବା ଅଭିଯୋଗ ରହିଛି। ରାସ୍ତାର ଏଭଳି ଅବସ୍ଥା ଯୋଗୁଁ କେତେବେଳେ ସ୍କୁଲରେ ପିଲାଙ୍କ ଉପସ୍ଥାନ ମଧ୍ୟ ପ୍ରଭାବିତ ହେଉଛି।

କେବଳ ଛାତ୍ରଛାତ୍ରୀ ନୁହେଁ, ସ୍କୁଲର ମଧ୍ୟାହ୍ନ ଭୋଜନ ସାମଗ୍ରୀ ପହଞ୍ଚାଇବାରେ ମଧ୍ୟ ସମସ୍ୟା ହେଉଛି। ଖାଦ୍ୟ ନେଇ ଆସୁଥିବା ଗାଡ଼ି ମୁଖ୍ୟ ରାସ୍ତାରେ ଅଟକିଯାଉଥିବାରୁ ରୋଷେୟା ଓ ସହାୟକଙ୍କୁ କାଦୁଅ ରାସ୍ତା ଦେଇ ସାମଗ୍ରୀ ବୋହି ସ୍କୁଲ ପର୍ଯ୍ୟନ୍ତ ନେବାକୁ ପଡ଼ୁଛି। ଏହି ସମୟରେ ଖସିପଡ଼ି ସେମାନେ ଆହତ ହୋଇଥିବା ମଧ୍ୟ କୁହାଯାଇଛି।

ମଧ୍ୟାହ୍ନ ଭୋଜନ ରୋଷେୟା ଚନ୍ଦ୍ରମଣି ଗାଗରାଇ କହିଛନ୍ତି, ଖାଦ୍ୟ ନେଇ ଆସୁଥିବା ଗାଡ଼ି ମୁଖ୍ୟ ରାସ୍ତାରେ ଅଟକିଯାଏ। ତା'ପରେ କାଦୁଅ ରାସ୍ତା ଦେଇ ଚାଲି ଖାଦ୍ୟ ସାମଗ୍ରୀ ଆଣିବାକୁ ପଡ଼େ। ବେଳେବେଳେ ରାସ୍ତାରେ ପଡ଼ିଯିବାରୁ ଖାଦ୍ୟ ମଧ୍ୟ ନଷ୍ଟ ହୋଇଯାଏ। ଖାଦ୍ୟର ଅଭାବ ହେଲେ ପିଲାମାନଙ୍କୁ ବିସ୍କୁଟ ଦେବାକୁ ପଡ଼ୁଥିବା ସେ କହିଛନ୍ତି।

ଆମ୍ବୁଲାନ୍ସ ଆସିପାରୁନି, ଚିନ୍ତାରେ ଗ୍ରାମବାସୀ

ରାସ୍ତା ଅବସ୍ଥା ଯୋଗୁଁ ଗାଁରେ ଜରୁରୀକାଳୀନ ସ୍ୱାସ୍ଥ୍ୟସେବା ମଧ୍ୟ ପ୍ରଭାବିତ ହେଉଥିବା ଗ୍ରାମବାସୀ କହିଛନ୍ତି। ଗୁରୁତର ରୋଗୀଙ୍କୁ ନେବା ପାଇଁ ଆମ୍ବୁଲାନ୍ସ ଗାଁ ଭିତରକୁ ଯାଇପାରୁନଥିବାରୁ ପରିବାର ଲୋକଙ୍କୁ ବିକଳ୍ପ ବ୍ୟବସ୍ଥା କରିବାକୁ ପଡ଼ୁଛି।

ଅଙ୍ଗନବାଡ଼ି ସହାୟିକା ସୁନାଫୁଲା ବାଙ୍କିରା କହିଛନ୍ତି, ପିଲାମାନେ ସ୍କୁଲ ଯିବା ସମୟରେ ପ୍ରାୟତଃ କାଦୁଅ ରାସ୍ତାରେ ଖସିପଡ଼ୁଛନ୍ତି ଏବଂ ସେମାନଙ୍କ ପୋଷାକ କାଦୁଅରେ ଭରିଯାଉଛି। ଅସୁସ୍ଥ ଲୋକଙ୍କ ପାଇଁ ସମସ୍ୟା ଆହୁରି ଗମ୍ଭୀର ହେଉଛି ବୋଲି ସେ କହିଛନ୍ତି।

ସ୍କୁଲର ପ୍ରଧାନଶିକ୍ଷକ ରମେଶ କୁମାର ମହାନ୍ତ କହିଛନ୍ତି ଯେ, ସ୍କୁଲରେ ମାତ୍ର ଦୁଇଜଣ ଶିକ୍ଷକ ଅଛନ୍ତି ଏବଂ ପ୍ରତିଦିନ ଏହି କାଦୁଅ ରାସ୍ତା ଦେଇ ପିଲାମାନଙ୍କୁ ସ୍କୁଲ ଆସିବାରେ ସହାୟତା କରିବାକୁ ପଡ଼ୁଛି।

ରାସ୍ତା ନିର୍ମାଣ ପାଇଁ ₹୧୦ ଲକ୍ଷ ମଞ୍ଜୁର

ଏହି ସମସ୍ୟା ନେଇ ସଦର ବ୍ଲକ ବିଡିଓ କହିଛନ୍ତି ଯେ, ରାସ୍ତା ନିର୍ମାଣ ପାଇଁ ₹୧୦ ଲକ୍ଷ ମଞ୍ଜୁର ହୋଇଛି। ତେବେ ବର୍ତ୍ତମାନ ବର୍ଷା ଜାରି ରହିଥିବାରୁ କାମ ଆରମ୍ଭ କରାଯାଇପାରିନାହିଁ।

ବର୍ଷା ଛାଡ଼ିବା ପରେ RD ରୋଡ୍‌ରୁ ରତନପୁର ପର୍ଯ୍ୟନ୍ତ ରାସ୍ତା ନିର୍ମାଣ କାମ ଆରମ୍ଭ ହୋଇ ଏକ ମାସ ମଧ୍ୟରେ ଶେଷ କରାଯିବ ବୋଲି ବିଡିଓ କହିଛନ୍ତି। ଏହାଦ୍ୱାରା ସ୍କୁଲ ପିଲାଙ୍କ ସହ ଗ୍ରାମବାସୀଙ୍କ ଯାତାୟାତ ସୁବିଧାଜନକ ହେବ ବୋଲି ଆଶା କରାଯାଉଛି।