କେନ୍ଦ୍ରାପଡ଼ା: ଦୀର୍ଘ ୮ ବର୍ଷର ବ୍ୟବଧାନ ପରେ ଓଡ଼ିଶାରେ ପୁଣି ଫେରିଛି ଛାତ୍ର ସଂସଦ ନିର୍ବାଚନ। ଆସନ୍ତା ଅକ୍ଟୋବର ୧୫ରେ ରାଜ୍ୟର ବିଭିନ୍ନ କଲେଜ ଓ ବିଶ୍ୱବିଦ୍ୟାଳୟରେ ଛାତ୍ର ସଂଘ ନିର୍ବାଚନ ହେବାକୁ ଥିବାରୁ କେନ୍ଦ୍ରାପଡ଼ାରେ ମଧ୍ୟ କ୍ୟାମ୍ପସ୍ ରାଜନୀତି ଜୋର ଧରିଛି।

ବିଭିନ୍ନ ଛାତ୍ର ସଂଗଠନ ଏବେ ନିଜ ନିଜ ସମର୍ଥିତ ପ୍ରାର୍ଥୀ ଚୟନ ପାଇଁ ଆଲୋଚନା ଓ ପ୍ରସ୍ତୁତି ଆରମ୍ଭ କରିଛନ୍ତି। କେଉଁ ପଦବୀ ପାଇଁ କିଏ ଲଢ଼ିବେ, କାହାକୁ ପ୍ରାର୍ଥୀ କରାଯିବ ଏବଂ କ୍ୟାମ୍ପସ୍ରେ କେଉଁ ପ୍ରସଙ୍ଗକୁ ନେଇ ଛାତ୍ରଛାତ୍ରୀଙ୍କ ସମର୍ଥନ ହାସଲ କରାଯିବ—ସେନେଇ ଛାତ୍ର ସଂଗଠନଗୁଡ଼ିକ ରଣନୀତି ପ୍ରସ୍ତୁତ କରୁଛନ୍ତି।

ନିର୍ବାଚନ ଘୋଷଣା ପରେ ରାଜ୍ୟର ବିଭିନ୍ନ କ୍ୟାମ୍ପସ୍ରେ ଛାତ୍ର ନେତା ଓ ଆଶାୟୀ ପ୍ରାର୍ଥୀମାନେ ଛାତ୍ରଛାତ୍ରୀଙ୍କ ସହ ଯୋଗାଯୋଗ ବଢ଼ାଇଛନ୍ତି। ବିଭିନ୍ନ ଛାତ୍ର ସଂଗଠନ ମଧ୍ୟ ନିଜ ସଂଗଠନର ଶକ୍ତି ଓ ଉପସ୍ଥିତି ପ୍ରଦର୍ଶନ ପାଇଁ କାର୍ଯ୍ୟକ୍ରମ କରୁଛନ୍ତି।

ରାଜ୍ୟ ସରକାରଙ୍କ ଘୋଷିତ ସୂଚୀ ଅନୁସାରେ ଅକ୍ଟୋବର ୭ରେ ନିର୍ବାଚନର ନୋଟିଫିକେସନ୍ ଜାରି ହେବ। ଅକ୍ଟୋବର ୯ରେ ନାମାଙ୍କନ ଦାଖଲ, ଯାଞ୍ଚ ଓ ବୈଧ ପ୍ରାର୍ଥୀ ତାଲିକା ପ୍ରକାଶ ପାଇବ। ଅକ୍ଟୋବର ୧୦ରେ ନାମାଙ୍କନ ପ୍ରତ୍ୟାହାର ଓ ଚୂଡ଼ାନ୍ତ ପ୍ରାର୍ଥୀ ତାଲିକା ପ୍ରକାଶ ପାଇବ। ଅକ୍ଟୋବର ୧୫ରେ ସକାଳ ୮ଟାରୁ ଦିନ ୨ଟା ପର୍ଯ୍ୟନ୍ତ ଭୋଟଗ୍ରହଣ ହେବ ଏବଂ ସେହିଦିନ ଭୋଟ୍ ଗଣତି ସହ ଫଳାଫଳ ପ୍ରକାଶ କରାଯିବ। ଅକ୍ଟୋବର ୧୬ରେ ନିର୍ବାଚିତ ପ୍ରତିନିଧି ଶପଥ ନେବେ।

ନିର୍ବାଚନ ପ୍ରକ୍ରିୟାରେ Lyngdoh Committeeର ନିର୍ଦ୍ଦେଶାବଳୀକୁ ଅନୁସରଣ କରାଯିବ। ପ୍ରାର୍ଥୀଙ୍କ ପାଇଁ ବୟସ, ଉପସ୍ଥାନ, ଶିକ୍ଷାଗତ ରେକର୍ଡ ଓ ଅନ୍ୟାନ୍ୟ ଯୋଗ୍ୟତା ନିର୍ଦ୍ଧାରିତ ହୋଇଛି। ଅଣ୍ଡରଗ୍ରାଜୁଏଟ୍ ଛାତ୍ରଙ୍କ ବୟସ ୧୭ରୁ ୨୨ ବର୍ଷ ଏବଂ ପିଜି ଛାତ୍ରଙ୍କ ବୟସ ସର୍ବାଧିକ ୨୫ ବର୍ଷ ହେବା ଆବଶ୍ୟକ। ସେହିପରି ୭୫ ପ୍ରତିଶତ ଉପସ୍ଥାନ ସହ ଅନ୍ୟ ନିର୍ଦ୍ଦିଷ୍ଟ ଯୋଗ୍ୟତା ମଧ୍ୟ ପୂରଣ କରିବାକୁ ପଡ଼ିବ।

ନିର୍ବାଚନକୁ ନେଇ କେନ୍ଦ୍ରାପଡ଼ା ସମେତ କେନ୍ଦ୍ରୀୟ ରେଞ୍ଜ ଅଧୀନ ଜିଲ୍ଲାଗୁଡ଼ିକରେ ପୁଲିସ ମଧ୍ୟ ସୁରକ୍ଷା ବ୍ୟବସ୍ଥା ଉପରେ ଗୁରୁତ୍ୱ ଦେଇଛି। କେନ୍ଦ୍ରାପଡ଼ା ସମେତ ୭ଟି ଜିଲ୍ଲାର SPମାନଙ୍କୁ ନିର୍ବାଚନ ପୂର୍ବରୁ ପ୍ରତିଷେଧକ ଓ ସକ୍ରିୟ ପଦକ୍ଷେପ ନେବା ସହ କଲେଜ କର୍ତ୍ତୃପକ୍ଷଙ୍କ ସହ ସମନ୍ୱୟ ରଖିବାକୁ ନିର୍ଦ୍ଦେଶ ଦିଆଯାଇଛି।

୮ ବର୍ଷ ପରେ ଛାତ୍ର ସଂସଦ ନିର୍ବାଚନ ଫେରୁଥିବାରୁ ଏଥର କେନ୍ଦ୍ରାପଡ଼ାରେ କେଉଁ ଛାତ୍ର ସଂଗଠନ କାହାକୁ ପ୍ରାର୍ଥୀ କରୁଛି ଏବଂ କ୍ୟାମ୍ପସ୍ରେ ଛାତ୍ରଛାତ୍ରୀଙ୍କ ସମର୍ଥନ କିଏ ହାସଲ କରୁଛି, ତାହା ଉପରେ ଏବେ ନଜର ରହିଛି।